InfoHub Logo

Adamǵa talaı jerdi kórgen artyq,

Tanysyp árkimderdi bilgen artyq.

Mysyrǵa patsha bolyp tursańdaǵy,

Bolmaıdy týyp-ósken jerden artyq.

Shal Kúlekeuly

San ǵasyrlar boıy taǵdyrdyń teperishine shydap, eńsesin túsirmeı, qıyndyqqa qarsy kúresip kelgen meniń elimniń   búginde táýelsizdigi - tuǵyrly, ana tili - aıbarly, eltańbasy - ajarly, ánurany - áýendi! Tarıxymyzǵa kóz júgirter bolsaq, aýmaǵy ushqan qustyń qanatymen, júıitkigen tulpar tuıaǵynyń dúbirimen ólshengen keń de, kelisti ólkeni mekendegen «qazaq» degen - elmiz.

Qazaq – egeýli naıza qolǵa alyp, naızasymen kók tilip, qylyshymen jer jarǵan, at ústinde kún keship, uıqysyz tún, kúlkiciz kún ótkizip, jerge jantaıyp, muz jastanǵan, naızasymen jaý túıregen, kók bórini pir tutyp, bórili baıraq qolǵa alǵan túrkilerden taraǵan, dana sózben daýdyń basyn qaıyrǵan, sózdiń burymyn órip, kórkemdep shashbaýyn syńǵyrlata taqqan, jetimdi esirkep, jesirdi jylatpaǵan, qyryq úıden tyıyp ıbaly qyz, otyz úıden tyıyp ónegeli ul ósirgen, eki sóılegendi er dep bilmeıtin,bassyz iske jol bermeıtin – uly halyq .  

Ańsaǵan azattyq kúni osyndaı berekeli elde ómir súrip jatqan bizde arman joq shyǵar sirá?! Degenmen, bolashaǵy jarqyn memleketimizden bezip, muxıt asyp ketkenderdiń sany jeterlik... Nege?! Ne úshin?! Bul saýaldar sanamdy ýlap, janymdy jegideı jep tastady. Jastarymyzdyń ketkisi keletindikteriniń sebebi nede?! Álde xalyqty tonap baıyǵan, boıynda ne kisiligi, ne kishiligi joq, bilimsiz,biliksizderdiń alshańdap júrgeninen, al qarapaıym xalyqtyń zar jylap, qara sý men qara nanmen ómir súrip jatqanynan sharshaǵandyqtan ba ?! Álde  nebári jıyrma alty jasqa tolyp, táı-táılap qadamyn endi basyp  kele jatqan elden ketip, daıyn jerge top etip túse qalǵysy keledi me?! Otansyz adam qaı jerde júrse de beıshara adam. Ózińniń jerińe, Otanyńa, ata-babańnyń tókken qany men terine adal bolýymyz kerek. Ne de bolsa,týǵan jerdiń qadirin túzde ǵana túsinemiz-aý shamasy... Ómirge nazdanyp, qasıetti jerimizden qashýdyń ornyna erteńimizge nyq senimmen qaraıtyn,arystandaı aıbatty,jolbarystaı qaıratty jastar,ıaǵnı bizder, qarańǵy qazaq túnegine kún bolýymyz kerek emes pe?! 

Endi az ǵana ýaqyttan soń jańa ómirge qadam basamyn. Alda áli uzaq jol, úlken asýlar bar. Sol asýlar men qıyndyqty jeńý úshin bilektiń kúshi men naızanyń ushy kerek emes. Oǵan tek júrek pen bilim, talant pen talap kerek. Qazaq eliniń abyroıyn asyryp, mereıin ústem eter, álem tańǵalar talaı-talaı jańalyq ashar bilimdi jas urpaq, el abyroıyn asqaqtatar jastar  kóbeıedi dep oılaımyn. Sondyqtan da bizge artylar úmittiń de jeńil bolmasy anyq. Elimizdiń kózi ashyq, kókiregi oıaý azamatshasy retinde babalarymyzdyń bilek kúshimen, aq naıza ushymen qorǵalyp, kóziniń qarashyǵyndaı saqtalyp, amanat etilgen týǵan jerimizdi ardaqtap, baǵalaý - meniń basty paryzym. Sebebi qazaq eliniń taǵdyry – meniń taǵdyrym, elimniń taǵylymy mol tarıhy – meniń tarıhym. Men, óz kezegimde egemen elimniń  taǵdyryna jaýapty ekenimdi aıtqym keledi. 

"El eldiń bári jaqsy,óz eliń bárinen jaqsy"-demekshi, qazaq elimniń erteńi jarqyn bolsyn! Laıym, kógildir týym men qasıetti kók baıraǵym beıbit kógimde jelbireı bersin degen júrekjardy tilegim bar!

---