InfoHub Logo

Atyraý oblysy, Jylyoı aýdany, Qulsary qalasy
Jylyoı munaı jáne gaz tehnologıalyq kolejiniń  
II-kýrs stýdenti: Alýanov Asylhan Tólegenuly
Jetekshisi: Ýmbetova Bagdagýl Oıanovna

Senen artyq qasıet joq-ty, jer, tegi,

Sen urpaqtyń kúlip atar erteńi,

Taǵdyryńdy tapsyr maǵan, týǵan jer,

Kórkeıtýge mindettimin men seni – dep belgili aqyn Ábý Sársenbaev jyrlaǵandaı men de týǵan jerimdi kórkeıtýge óz úlesimdi qossam deımin...

 «Otanym» degen jas júregimnen shyqqan asyl sózdi maqtanyshpen, asqaqtyqpen aıta alamyn. Ata-babamyzdyń azattyq jolyndaǵy eren erliginiń arqasynda osynaý arman etken zamanǵa ter tóge, kóp kúsh jumsaı jetken elimdi maqtanysh etemin. Talaı jylǵy uly dúbir, dúrbeleńnen keıin jarqyn bolashaqtyń tańy atyp, erkindik pen teńdik esigin aıqara ashty. Elimizdiń kúni ońynan týyp, jaryq juldyzdar shoǵyry ulttyq namys pen arymyzdy týdaı jelbiretti. Árıne, bul kún ońaılyqpen kelmegeni belgili. Elimizdiń arystary talaı jyldar basyn taý men tasqa uryp, tar jol taıǵaq keshe júrip, elimizdiń bolashaǵy, keler urpaqtyń baqytty ǵumyry úshin aıanbaı kúresip tabandylyq pen asqan qaısarlyq, shydamdylyq pen beriktik tanytty. Barlyq sanaly ǵumyryn ult múddesine arnaǵan bes arys, uly Otan soǵysynda elim dep janyn pıda etken qaıtpas qyran alash azamattary, júrekteri ottaı jalyndaǵan jeltoqsan qaharmandary... Aıta berse jalǵasa berer eliniń asyl ulandary, asqaq rýhty azamattarynyń eren erliginiń arqasy dep bilemin. Elimizdiń kóginde táýelsizdik týy jelbiregennen beri óshkenimiz jandy, ólgenimiz qaıta tirildi, ata-baba dástúri kósh túzedi, halqymyz eńsesin tiktep jarqyn bolashaqqa qol sozdy. Sodan beri atqan oqtaı zýlap, tabandatqan 25 jyl ótti. Qazaqstannyń jıyrma bes jyldyq ǵumyryna kóz salsaq, aýyz toltyra aıtarlyqtaı, kókiregińdi maqtanysh sezimi kernep eske alarlyqtaı jetken jetistikteri, asqan asýlary men baǵyndyrǵan jańa belesteri bar. Búgingi Qazaqstan Astanasyn bas qala etip, damyǵan mádenıet pen ekonomıkanyń, bilim men ǵylymnyń ortalyǵyna aınaldyra, eliniń turaqtylyǵy men birligin saqtap, dúnıe júzine tanytýǵa kúsh salýda. Buǵan memleketimizdiń Birikken ulttar uıymyna, Eýropadaǵy qaýipsizdik pen yntymaqtastyq uıymy sıaqty halyqaralyq qaýymdastyqtarǵa múshe bolyp dúnıe júzi elderimen tyǵyz baılanys ornatýy jáne osy jolda atqaryp jatqan qyrýar isteri dálel bola alady. Kemeńger Elbasymyzdyń «Qazaqstan – 2030» baǵdarlamasy óz baǵytymen júzege assa, keleshekte Qazaqstan memleketi dúnıe júzindegi iri memleketter qataryna qosylady degen senimdemin. «Otan - ottan da ystyq» degen dana halqymyz, adam balasynyń júreginde eń birinshi, aq sút bergen týǵan anasyna degen sezim oryn alsa, ekinshi, Otanǵa degen jalyndy, ystyq sezim oryn alady eken.

Qazir adamdar tirliktiń qamymen, balalarynyń bolashaǵy úshin oqý-bilim izdep, mektebi bar jerlerge qonystandy. Sol úshin de týǵan jerinen shalǵaıǵa ketýge májbúr boldy. Sóıtse de, olardyń  qaı-qaısysy bolmasyn, “týǵan jerim ne boldy eken?” dep, alańdap, ata-baba mekenin ańsap, saǵynýmen júrgeni ótirik emes. Dám buıyryp jatsa, júregin qolyna ustap, týǵan jerine alyp-ushyp jeteri sózsiz...

Óıtkeni, olar  keń dalanyń aýasyn, sarqyraǵan sýlaryn saǵynady. Qys óte, jaıdary kóktemmen kelgen jupar aýasyn, býsanǵan jer ıisin, kógalyn saǵynady. Asyq atyp, balyq aýlaǵan, topyraǵyna aýnap, kún kózine qaqtalǵan, asyr salyp oınaǵan, birge júrgen dostaryn saǵynady. Jalpy, týǵan jerge degen adam balasynyń saǵynyshy sheksiz, atamekenin ańsamaıtyn adam bul ómirde joq shyǵar! Ańsamasa, saǵynbasa «Týǵan jerim-baıtaq elim» demes edi, ánge salyp, jyrǵa qospas edi.

Men óz Otanymdy, týǵan jerimdi, qudiretti elimdi súıemin jáne maqtan etemin. Óz elimniń damýyna teńizge tamǵan tamshydaı bolsa da úlesimdi qosamyn dep oılaımyn. Barsha Qazaqstandyqtardy elimniń mereıli mereıtoıymen quttyqtaı otyryp, ashyq aspan kóginde qalyqtaǵan qyrandaı erkindik pen damý, asqan baqyt jáne sheksiz qýanysh, bıik beles pen shyǵar shyń tileımin.

---