InfoHub Logo

Aǵylshyn tili muǵalimi Qazaqstan mektepterin tozaqqa teńedi.

Mekteptegi boıamasyz ómirdi sýrettep, aǵynan jarylǵan muǵalimniń úshbýhaty Pandaland jýrnalynda jaryq kórdi.

«Internette jaryq kórgen nemese moraldyq aqy talap etip, tikeleı ózime shyǵatyn ata-analardyń qoqan-loqysy kóńilimdi qatty buzady.

Biraq olarǵa aıtarym, sypyryp alatyndaı bizdiń túgimiz joq. Qazaqstandaǵy muǵalimniń ál-aýqaty qaıyrshylyq deńgeımen para-par.

Oǵan júıkeniń tozýyn qosyp qoıyńyz. Kóbisi bul sózim úshin meni jek kórip, bul mamandyqty QAIYRYMDY dep, pir tutar. Biraq qaıyrym men alǵa qoıǵan maqsatyńyzdy sabaq bergen birinshi jyldan keıin umyta bastaısyz.

Onyń pikirinshe, ustaz jaqsy aqsha taýyp, kóbirek bos ýaqyty bolýy kerek.

Al qazirgi jaǵdaıda jas muǵalimge otbasyn quryp, óz balalaryn tárbıeleýdi josparlaýdyń esh múmkindigi joq.

«Meniń jasym — 30-da. Jalpy bilim beretin mektepte aǵylshyn tilinen sabaq beremin.

Meniń jeke ómirime ýaqyt joq, basy artyq aqsham da joq, bastysy ózim aınalysyp júrgen isten qandaı da bir lázzat almaımyn. Qazaqstandaǵy muǵalim — betimen ketken oqýshylarǵa, topas dırektorǵa jáne bilim júıesindegi haosqa qarsy turý úshin damylsyz typyrlaıtyn eshqandaı quqyǵy joq tirshilik ıesi.

Endi sózimdi dáıekteı túsý úshin áńgimeni balalardan bastaıyn. Men alǵash ret mektep tabaldyryǵyn ustaz bolyp attaı salysymen, «London is the capital of Great Britain» degennen basqa eshteńeni úıretpegen balalardy shet tilin meńgerýge basqasha qushtar etýge kiristim. Oqýshylardyń aǵylshynsha jaqsy kóretin óleńderin aýdarýǵa, berilgen jattyǵýlardy tez oryndaýǵa barymdy saldym. Óıtkeni qalǵan 15 mınýtta olar tanymal serıaldardy sýbtıtr arqyly kórýi kerek bolatyn. Kóp uzamaı bul tásil óz nátıjesin berdi. Oqýshylar ózimen aǵylshyn tilinde sóılesýdi suraı bastady. Men olardyń kózderinen ot kórdim.

Oqýshylar endi menen «shiritkishtiń» (balalardyń jargon sózi) ornyna shet tilin qyzyqty ótkizýdiń tásilderin kóbeıtseńiz dep suraı bastady. Shiritkish dep olar otandyq avtorlardyń oqýlyqtaryn aıtqan edi. Shyndyǵynda, ol kitapttar mektepke deıingi bilim berý úshin jasalǵan sekildi. Árıne, ondaǵy amaldar ábden eskirgen.

Men joǵary synypqa sabaq berdim. Árıne, balalar ártúrli bolady. Ásirese olardyń alyp-ushpa jasóspirim kezeńde ekenin umytpaǵan jón. Men bárine árdaıym túsinistikpen qaraýǵa tyrysatyn adammyn. Biraq júıke tozdyratyn kez de kelip jetti, onsyz bola ma? Sonyń bireýin mysalǵa keltire keteıin.

Únemi sabaqqa keshigip keletin, sabaq oqymaıtyn, al sabaq ústinde telefonynan bas almaı, habarlama almasyp otyratyn 9-synypta oqıtyn bir qyzǵa 3 qoıǵanda naǵyz shaıqas bastaldy. Onyń ata-anasy mektepke kelip, úlken aıqaı-shý shyǵardy, sotqa beremin, taǵy basqa qoqan-loqylarymen meni úrkitip-qorqyta bastady.

Al dırektor ne istedi deısiz ǵoı? Meni shaqyryp, álgi qyzǵa 4 qoıyp qutylaıyq deıdi. Ákesiniń qoly uzyn eken degen áńgime de aıtyldy. Rasynda, balasyna baǵa satyp alatyn «úlken» adamdarǵa qarsy turýǵa bizdiń shama qaıda? Árıne, kózdi jumýǵa týra keldi. Esesine, ábden erkinsigen qyz meniń sabaǵyma múlde qatyspaýdy jón dep tapqan. Qudaıǵa shúkir, basqa balalardyń tárbıesinde másele joq, olar da bul jaıtqa túsinistikpen qarady.

Endi jumys kestesine kelsek. 24/7 — bul bizdiń devız.

Olımpıadalar, senbilik, mádenı shara, bitpeıtin qaǵazdardy toltyrý, ata-anaǵa habarlasý, jınalys ótkizý! BUL — AQYSY TÓLENBEITİN MUǴALİMNİŃ QOSYMSHA JUMYSTARY.

Ótkizgen saǵatyna qaraı aqsha tóleıdi, bir synypty jetekshilikke alsań, oǵan bonýs qosady. Bonýs degen árıne qulaqa jaǵymdy estiledi, al aqysyn kórseńiz, kúlkińiz keledi, 5 myń teńge me sondaı.

Komısıa — bul óz aldyna bir bólek másele. Syılyqqa aqshany ún-túnsiz jınaımyz, ondaǵy oıymyz — jónsiz kelip kılige bermese eken degen.

Bizdiń mektepke taǵatyn kiná da joq. Keshirińiz, eger jabdyq berilmese, kúrdeli jóndeýge aqsha bólinbese, eden jýýshylarǵa 50 myń teńge tólense, endi ne dep tıisesiz? Al biz bolsa, syılyq jasaımyz olarǵa. Aqshasy kópterge…

Mektepte «mártebeli» jalǵyz kasta bar. Ol — osy jumystan qandaı da bir lázzat alatyn zeınet jasyna jaqyndap qalǵan myqty muǵalimder. Aldaǵy zeınetkerligi, osyǵan deıin jınaǵan bedeli jáne eńbek ótili ol adamdarǵa qosymsha aqyǵa balany oqytýǵa múmkindik beredi. Mine, bonýs degen osy.

Al jastarǵa jumys satysymen kóterilý degen joq. Men osy jyly jumystan óz erkimmen kettim. Ol tozaqqa qaıtyp barǵym kelmeıdi. Árıne, balalar izdep, mazalap jatyr… Saǵynamyz deıdi, men de olardy saǵynamyn. Qaıtemin endi, úırenisip qalǵan oqýshylarmen toq bolmaısyń.

Sondyqtan qurmetti ata-analar, biz týraly jaman jazbas buryn bizdiń ornymyzda ózderińizdi bir ret qoıyp kórińizdershi. Bul arada bir saǵatqa shydap bere almas edińizder. Al aı sońynda qolyńyzǵa tıyn-teben tıgende kózińizge jas úıirletinine kepil bere alamyn. Sókpeńizder. Odan da balalaryńyzdy baıqus ustazdyń eńbegine janashyrlyqpen qaraýdy úıretińizder!» delingen hatta.

Derekkóz: 365info.kz