InfoHub Logo

Ulttyq qaýipsizdik komıtetiniń ókilderi baılanys jelileriniń jumysy men ınternet-resýrstaryn shekteýge qatysty túsinikteme berdi.

2016 jylǵy 22 jeltoqsandaǵy «Qazaqstan Respýblıkasynyń keıbir zańnamalyq aktilerine ekstremızmge jáne terorızmge qarsy is-qımyl máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń zańy men «Baılanys týraly» zańnyń 41-1 baby, kelesi mazmundaǵy 1-2 tarmaǵymen tolyqtyryldy;

«Keıinge qaldyrýǵa bolmaıtyn jáne aýyr jáne asa aýyr qylmystardyń, sondaı-aq qylmystyq top daıyndaıtyn jáne jasaıtyn qylmystardyń jasalýyna ákep soǵýy múmkin jaǵdaılarda Qazaqstan Respýblıkasy Ulttyq qaýipsizdik komıtetiniń tóraǵasy, onyń orynbasarlary nemese Qazaqstan Respýblıkasy Ulttyq qaýipsizdik komıtetiniń aýmaqtyq organdarynyń bastyqtary ne olardy almastyratyn adamdar keıinnen baılanys salasyndaǵy ýákiletti organdy jáne Qazaqstan Respýblıkasynyń Bas prokýratýrasyn jıyrma tórt saǵat ishinde habardar ete otyryp, jedel-izdestirý qyzmetiniń barlyq sýbektileriniń múddesin úshin baılanys jelileriniń jáne (nemese) quraldarynyń jumysyn, baılanys qyzmetteriniń kórsetilýin, ınternet-resýrstarǵa jáne (nemese) olarda ornalastyrylǵan aqparatqa qol jetkizýdi toqtata turýǵa quqyly.

Baılanys jelileriniń jáne (nemese) quraldarynyń jumysyn, baılanys qyzmetteriniń kórsetilýin, ınternet-resýrstarǵa jáne (nemese) olarda ornalastyrylǵan aqparatqa qol jetkizýdi toqtata turý tártibi Qazaqstan Respýblıkasynyń Bas prokýratýrasymen kelisý boıynsha jedel-izdestirý qyzmeti sýbektileri men baılanys salasyndaǵy ýákiletti organnyń birlesken normatıvtik quqyqtyq aktisinde aıqyndalady»;

Budan ózge kórsetilgen baptyń 1) tarmaqshasy, 3-tarmaǵy kelesideı ózgertildi:

«1) ýákiletti organnan nemese Qazaqstan Respýblıkasynyń ulttyq qaýipsizdik organdarynan osy baptyń 1, 1-1 jáne 1-2-tarmaqtarynda kórsetilgen nusqamany nemese sheshimdi oryndaý jóninde sharalar qoldaný týraly talapty alǵannan keıin ony baılanys jelileriniń jáne (nemese) quraldarynyń jumysyn, baılanys qyzmetteriniń kórsetilýin, ınternet-resýrstarǵa jáne (nemese) olarda ornalastyrylǵan aqparatqa qol jetkizýdi ýaqytsha toqtata turý jolymen úsh saǵattan aspaıtyn ýaqyt ishinde oryndaýǵa mindetti;».

Qazirgi kezde zańnamada kórsetilgen ózgertýlerge keıbir sýbektiler tarapynan teris túsinik berý baıqalýda. Osy oraıda Qazaqstan Respýblıkasynyń Ulttyq qaýipsizdik komıteti birshama túsiniktemeler berýdi qajet dep tapty.

Atap aıtqanda, joǵaryda kórsetilgen quqyq normasy óńirlik ınternet-servısteri men baılanys jelilerin jappaı toqtatýdy kózdemeıdi. Sebebi qoldanystaǵy zańnamada Bas prokýror men baılanys salasyndaǵy ýákiletti organǵa antıterrorlyq operasıa júrgizý barysynda, qoǵamdyq tártip pen BAQ salasyndaǵy ózge de zańnamalardy buzýshylyq týyndaǵan jaǵdaıda jeliler men baılanys quraldaryn paıdalanýdy shekteý úshin quqyqtyq negiz qarastyrylǵan («Terorızmge qarsy is-qımyl týraly» jáne «Baılanys týraly» Qazaqstan Respýblıkasynyń zańdary)

Sonymen birge ulttyq qaýipsizdik organdary tarapynan baılanys qyzmetin toqtatý týraly sheshim aýyr jáne asa aýyr qylmys jasaýǵa soqtyrýy múmkin sybaılastaryn aqparattandyrý jáne is-áreketin úılestirýge jol bermeý maqsatynda naqty abonentterge qatysty qabyldanatyn bolady.

«Jeliler men baılanys quraldary qyzmetin toqtatý Qazaqstan Respýblıkasynyń Bas prokýratýrasymen kelisilgen jedel-izdestirý qyzmeti sýbektileri men baılanys salasyndaǵy ýákiletti organnyń birlesken buıryǵy negizinde tıisti operatorlarmen iske asyrylatyn bolady»,-delingen QR UQQ-niń baspasóz qyzmeti taratqan málimetterde.

---