InfoHub Logo

Ultaraqtaı bolsa da,

Ata-qonys jer qymbat.

At tóbelindeı bolsa da,

Týyp-ósken el qymbat.

Týǵan jer, týǵan el, Otan – bir-birimen irgesi bir uǵymdar. Otan men júrek te egiz sekildi. Adamnyń júreksiz ómir súre almaıtyny belgili bolsa, óz Otanynsyz da ómir súre almasy taıǵa tańba basqandaı. Júrek toqtasa – ómirińniń bitkeni, ajalyńnyń jetkeni, Otanyńnan tirideı aıyrylsań – kókiregińde janyńnyń ushqany, kómeıińde tilińniń kesilgeni.

Árbir pendeniń shyr etip jerge túskennen-aq tamyr jaıar topyraǵy – týǵan jeri. Týǵan jerin tastap, Otanynan bólingendi bóri jeıdi. «Otansyz adam – ormansyz bulbul». Qandaı da bir ózge eldiń baılyǵy taýdaı úıilip jatsa da, tabıǵatynyń ǵajaptyǵy álem jurtshylyǵyna máshhúr bolyp taralsa da, óz elińniń jýsan, sasyryna, oılap aıtqan sózińdi de, oınap aıtqan sózińdi de kótere biletin baýyrmal jandardyń kóńiliniń keńdigine, nıetiniń páktigine teń kele almaıdy. Meniń Qazyǵurtyma da eshbir ólke parapar kele almaıdy. Keýdemnen janym shyqsa shyǵar, biraq týǵan jerimniń esimi sanamnan óshpeıdi. Qozykósh jer júrseń de, qurlyq asyp ketseń de, kúnde bola bermeıtin saǵynysh sezimi boıyńdy órtep, ish qusa bolyp, júregiń shemendeı sherlenedi. «Taýda týǵan qulynnyń eki kózi tasta bolady» demekshi, jer betiniń qaı buryshynda júrsem de, kıeli Qazyǵurtyma qaraı búıregim buryp turady. Birligi men tirligi jarasqan, tiregi men tilegi bir, táýelsizdigi men jasampazdyǵy berik Qazaqstan deıtin qasıetti eldiń topyraǵynda dúnıege kelgenimdi maqtanysh etem. Qazaqstanym men Qazyǵurtymnyń esimin júregimniń túkpirinen óshirmeımin, ózgeniń óshirýine de jol bermeımin.

«Jer máselesi – qazaqtyń tiri ne óli bolýynyń máselesi» - deıtin Ahmet Baıtursynulynyń sózi bar. Osy sózdiń tereńine súńgip, túbin kózdesek, týǵan jer – halyqtyń ótkeni, búgini men keleshegi ekendigin meńzep tur-aý. Jerimizden aıyrylsaq - álem kartasynan atymyzdyń óshkeni, dinimizden adasyp, tilimizdi joǵaltqanymyz. El úshin emirenip, jer úshin tebirenetin sáttiń ýaqyty jetip, saǵaty soqqan kezde asyl erler kijinýi de, kıligýi de kóp jaýyz jaýlaryn qabaqtarynan qar jaýǵan kúıi qarsy aldy. Aq bilektiń kúshimen, aq naızanyń ushymen el qorǵanyna aınalǵan qazaqtyń batyr da, batyl azamattary shabýyl otyn týǵyzǵan jaýlardyń barshasyn búrkit basqan túlkideı etip otyrdy, beldeskenniń belin búgip, tireskenniń tizesin syndyrdy. Olardy mundaı iske barýǵa yqpal etip otyrǵan kózge kórinbeıtin, qulaqpen estı almaıtyn, sózben jetkize almaıtyn erekshe bir sezim bar, ol – týǵan jerge degen mahabbat, Otanǵa degen súıispenshilik, týǵan elge degen qurmet. Mine, kezinde ata-babalarymyzdyń qasyq qanymen qorǵaǵan jerinde beıbitshilik uranymen, baqytty da baıandy ǵumyr keship jatyrmyz. El arasyna jaryq jyldamdyǵyndaı tez taraǵan eren erlikterdi týǵyzǵan týǵan jerge degen súıispenshilik bizdeı jastardyń da júreginen oıyp turyp oryn alǵan. Ózge eldiń jaqsysy bolyp kún keshkenshe, óz elimizdiń saqshysy bolý – eń mártebeli is. Júgirgen ańnyń aıaǵy, ushqan qustyń qanaty talatyn ulan-ǵaıyr jerimizdi kózimizdiń qarashyǵyndaı saqtap, kúnnen-kúnge kórkeıip, keń qanat jaıýyna jańbyr sýynyń bir tamshysyndaı bolsa da úles tıgizý – bizdiń qolymyzda!

---