InfoHub Logo

Ustaz...  Aıtqanyńda júregińdi terbeıtin, estigende kóńilińdi qozǵaıtyn osy bir aıaýly esim árbir azamattyń sanasynda máńgilik jattalyp qalǵan bolar. Mektep tabaldyryǵyn tarydaı bolyp attaǵannan qolyńnan jetektep, dáris alatyn partańa otyrǵyzyp, sóz anasy – sálemdesýden bastap barlyq ádeptilik erejelerin qulaǵyńa sińirgen, bilim bere otyryp, ómirińe yqpal eter baǵyt-baǵdar kórsetip, tyǵyryqqa tirelgenińde súıenishiń, qaıǵyǵa batqanyńda jubanyshyń bolyp jol siltegen aıaýly jan – muǵalim. Birinshi anań – aq sútin berip, alaqanyna salyp ósirgen, jylaǵanyńda jubatqan, jabyrqaǵanyńda qýantqan týǵan anań bolsa, ekinshisi – bilim aralyna bastaıtyn baǵytty aıqyndap ta, aıshyqtap beretin ekinshi anań – muǵalim.

Álemniń jarty bóligin jaýlaǵan adamzat tarıhyndaǵy uly qolbasshy Aleksandr Makedonskııdiń ustazy jaıly qaldyrǵan pikirin estýińiz bar ma?  «Men ózimniń ustazyma ákemnen kem qaryzdar emespin: ákemnen ómir alsam, al Arıstotelden ómirimdi jaqsy ótkizý týraly bilim aldym», - degen eken Makedonskıı.  Ustaz ben shákirttiń baılanysy ana men balanyń kirshiksiz mahabattymen parapar. Ustazyńnyń bergen bilimi men aıtqan aqyly ata-anańnyń tárbıesinen artyq bolmasa, kem túspeıdi.

Ustazdyq – qıyndyǵy da, qyzyǵy da mol, aýyry men jeńili qatar júretin, ashysy men tushshysy qatar seziletin ómirdiń uzaq joly. Sondaı joldyń aýyrtpalyqtary men qıynshylyqtaryn moıymaı kóteretin, shákirtiniń sapaly bilimi men sanaly tárbıesi úshin tańnan qara keshke deıin erinbeı eńbektenetin muǵalim atty ardaqty jannyń jolyn kesip ótýge jer betin basyp júrgen bir de bir jannyń quqy joq. Sebebi, ómirdiń ózi – muǵalim. Al bilim ordasynda saǵan bar bilgenin qajymaı úıretip, bilim atty kemege mingizip, ÓMİR deıtin mektepke, úlken synaq alańyna daıyndaıtyn da – óz ustazyń. «Bir árip úıretkenge qyryq jyl sálem ber», - degen eken qazaqtyń belgili jazýshysy Júsipbek Aımaýytov. Erligimen jer-dúnıege máshhúr bolǵan batyr da, sózderimen óleń óre bilgen aqyn da, halyqty aýzyna qara shybyndaı úımeletken sheshen de bas ıgen muǵalimge biz nege bas ımeımiz? Elimizdiń mártebesin bıikke kóterip, bolashaqqa degen úmit shamyn óshirmeıtin jastardy tárbıelep, shynyqtyryp, bilimniń bıik shyńyna qondyratyn ustazdarǵa myń taǵzym!

---