InfoHub Logo

QR Bilim jáne ǵylym vıse-mınıstri Mıras Dáýlenov bıylǵy Ulttyq biryńǵaı test tapsyrý formatyna engizilgen ózgerister jaıynda aıtty.

«Bizde testileý uzaqtyǵy 4 saǵatty, ıaǵnı 240 mınýtty quraıdy. Osy oraıda myna jaıttarǵa nazar aýdarǵym keledi. Buryndary biz jaýaptardy toltyrýǵa, boıaýǵa, testileýdiń ózin uıymdastyrýǵa, ıaǵnı, barlyǵynyń aýdıtorıada otyrýyna ýaqyt bóletinbiz. Al búginde UBT tapsyrýǵa kirisetin mektep túleginde 240 mınýt bolady. Demek, ol «testileýdi bastaý» túımeshegin bastaǵan sátten bastap test tapsyrady. Soǵan oraı túlek basqa túlekterdiń ýaqytyna qaramastan test tapsyrýǵa kirisip, bitken soń «testileýdi aıaqtaý» túımeshegin basady», - dedi ol mınıstrliktiń apparat jınalysynda.

Onyń atap ótýinshe, UBT barysynda túlek qate jibergen jaýaptaryn túzetýge de múmkindik alady.

«UBT-ny qaǵaz túrde ótkizýden elektrondy formatta tapsyrýdyń taǵy bir basymdyǵy jaýapty ózgertýge bolady. Qaǵaz túrinde jaýap boıalǵannan keıin ony ózgertý múmkin emes. Al elektrondy formatta túlek qandaı da bir tapsyrmanyń durys jaýabyn tapsa, qandaı da bir aqparatty eske túsirse, onda suraqqa qaıta oralyp, jaýabyn ózgerte alady. Onyń ústine ózgertilgen jaýap UBT aıaqtalǵannan soń jáne saqtalǵannan keıin de jazylady», - dedi vıse-mınıstr.

---