InfoHub Logo

Bıyl mektep túlekteri ulttyq biryńǵaı testileýdi 2 ret tapsyra alady. Bul týraly búgin QR Bilim jáne ǵylym vıse-mınıstri Mıras Dáýlenov aıtty.

«Naýryzdyń 10-y men sáýirdiń 10-y aralyǵynda UBT aqyly negizde ótedi. Oǵan úmitkerler bir ret qana qatysa alady. Al 15 sáýir men 30 maýsym aralyǵynda UBT tegin bolady. Bul rette úmitkerler UBT-ny eki ret tapsyrý múmkindigine ıe. Olar bilim granttaryn bólýge qatysady. Sáýir-maýsym aralyǵyndaǵy UBT-ǵa bıyl mektep bitiretin 120 myń túlektiń qatysatyndyǵy josparlanǵan», - dedi ol mınıstrliktiń apparat jınalysynda.

Onyń atap ótýinshe, elimizdiń óńirlerinde UBT ótkizý pýnkteriniń sany jetkilikti.

Bıyl UBT-ny mektep bitirýshiler, ótken jyly orta bilim uıymdaryn bitirgender, kásibı-tehnıkalyq orta bilim alǵandar, Qazaqstan azamaty emes tulǵalar, shetelderdegi bilim uıymyn bitirgender tapsyrady.

«Ótken jyly biz olarǵa UBT-ny pandemıaǵa baılanysty qashyqtan ótkizgen edik. Sondyqtan olarda UBT-ny elektrondy formatta tapsyrý tájirıbesi bar jáne bul olar úshin jańalyq emes», - dedi Mıras Dáýlenov.

---