InfoHub Logo

UBT-ǵa az ǵana kún qaldy dep konspektilerdi qaıtalap oqýǵa, durys bilmeıtin jerlerińizdi qaıta tolyqtyrýǵa nemese ózińiz arnaıy qurǵan jospar boıynsha daıyndalýǵa bolady. Osylaısha esińizge kóbirek aqparat saqtap, daıyndyqty azaıtqanyńyz durys. Olaı bolsa nazarlaryńyzǵa UBT-ǵa jyldam daıyndalý tehnıkasyn usynamyz:

1. Daıyndyqty josparlaý. Birinshiden, ózińizdiń bıologıalyq rıtmińizdi anyqtańyz. Iaǵnı erte jatasyz ba, álde kesh uıyqtaısyz ba? Osyǵan sáıkes keste quryńyz. Ár kúni qandaı taqyryptardy daıyndaıtyndyǵyńyzdy naqty anyqtap alyńyz. UBT-nyń aldynda bir kún buryn jaqsylap demalyp, taza aýada serýendeńiz. 

2. UBT-ǵa daıyndalýǵa arnalǵan «3-4-5» tehnıkasy. 2015 jyly UBT-ǵa deıin qalǵan ýaqytty (apta, aı, jyl) 3 bólikke bólińiz. Mysaly, ózińizde bar 15 kúndi bes-besten bólińiz. Alǵashqy 5 kúni barlyq materıaldy 3 degen baǵaǵa meńgerińiz. Ekinshi 5 kúnde eń nashar biletin taqyryptaryńyzdy jaqsylap meńgerip alyńyz. Al sońǵy 5 kúnniń ishinde bilimińizdi test kómegimen tekserińiz.

UBT kezinde este saqtaý qabileti jaqsaratyn mezgildi de eskergenińiz jón. Tańerteńgi saǵat 8-12 arasynda adamnyń materıaldardy meńgerý múmkindikteri artady. Budan keıingi jaqsy mezgil – saǵat 17-19 arasy. Báribir oqyǵan sabaqtaryńyz este qalmaıtyndyqtan, saǵat 13-15 arasynda daıyndalmaǵan abzal.  

3. Birinshi qıyny. Daıyndyqty árdaıym ózińiz nashar biletin sabaqty oqýdan bastańyz. Daıyndyq pen demalysty kezektestirip otyryńyz: 40 mınýt daıyndyq, 10 mınýt úzilis. Demalys kezinde belsendi qozǵalýǵa tyrysyńyz. Úıdegi gúlderge sý quıyńyz, jattyǵýlar jasańyz, dýshqa túsińiz jáne 1 staqan sý nemese kók sháı iship alyńyz. Sýsyn mıdyń jumysyn jaqsartady. UBT-nyń aldynda eń qıyn suraqtardy taǵy da bir ret qaıtalap shyǵý úshin 1 kún qaldyryńyz.

4. UBT testilerimen daıyndalý. Ózińizden úlken ápkelerińiz ben aǵalaryńyzdan test kitapshalaryn surańyz. Internet saıttaryndaǵy testilerdi oryndańyz. Munyń kómegimen bolashaqta qandaı suraqtar bolýy múmkin ekenin biletin bolasyz.

5. Qysqasha konspekt daıyndańyz. Ózińiz bilmeıtin suraqty tereńirek taldap, ony qaǵaz betine sýret arqyly nemese syzba arqyly túsirińiz. Eger estigenińizdi este jaqsy saqtaıtyn bolsańyz, oqyǵan konspektilerińizdi aýdıojazba retinde jazyp otyryńyz. Olardy avtobýsta, serýendep júrgen kezde tyńdaýǵa bolady.

6. UBT jáne qur jattaý. Bul tásildi eń sońǵy múmkindik retinde ǵana qarastyrǵan jón. Ony UBT-ǵa az ýaqyt qalǵan kezde ǵana paıdalanýǵa bolady. Iaǵnı ózińiz tolyq túsinbeı jatqan materıaldy taqpaq sekildi zýdyratyp jattap alyńyz.

7. UBT jáne qaýyrt daıyndyq. Bul jaǵdaıda aqparatty tańdap alyp jattańyz. Meńgerý kerek materıaldy 7 bólikke bólińiz. Sebebi bizdiń mıymyz bir ýaqytta 7 túrli aqparatty ǵana óńdep shyǵara alady. Artynsha ár taqyrypqa arnalǵan 7 qaǵaz alyńyz. Olardyń árqaısysyna naqty málimetterdi jazyńyz: tirek sózder, qysqa frazalar, formýlalar, datalar. Jazyp otyrǵan kezde oqýlyqtardy paıdalanabaı, tek este saqtaý qabiletińizge súıenińiz. Budan keıin jazǵandaryńyzdy kitaptaǵymen salystyryńyz. Qateńizdi túzep, durys jaýapty da jazyńyz. Ýaqytyńyz bolsa, bul ádisti qosymsha taqyryptarǵa da qoldanýyńyzǵa bolady. Synaq testin tapsyrar kezde osy qaǵazdarǵa zer salyńyz.

8. Budan keıin ýaqytpen daıyndalyp úırengen jón. Bir suraqqa 2 mınýttan artyq ýaqytyńyz ketpeýin qadaǵalańyz.

9. Ár taqyrypqa arnalǵan kartochka jasańyz. Taqyrypqa sáıkes formýlalar men tirek sózderdi de jazyp otyryńyz. Munyń barlyǵy UBT-ǵa kirer kezde bir ret jaqsylap qaıtalap alýǵa kómektesedi.

10. Alań bolmańyz! UBT-ǵa óz kúshimmen daıyndalamyn dep sheshken bolsańyz, áleýmettik jelilerden, telefonnan, artyq jıyn-toıdan bas tartyńyz.

Joǵarydaǵy 10 tásildi meńgerý arqyly qalaǵan nátıjemizdi alýǵa bolady.

Derekkóz: massaget.kz

---