Ujdandyny maqtaıdy tamam adam,
Meıli ǵalym bolsa da, meıli nadan.
Ar, nysappen is qylyp, azap tartyp,
Aq jolynda óledi birtalaı jan.
Razy qylam deıtuǵyn qudaıy joq –
«Ólgen soń tirilmeımin» dep oılaǵan.
Osyny tereń oımen tekserelik,
Sorlyny ar, nysaby nege aıdaǵan?
«Ólgen soń jurt maqtasyn,– deı me,– meni»,
Olaı bolsa, is bar ma munan jaman?
«El túzeýge qurbanmyn» dep-aq aıtar,
Ózi qandaı paıda alar onysynan.
Adal jolda ólgenniń armany joq,
Degeni bolmaı ma eken qury maqtan.
Ar, nysaptyń qumary osy dese,
«Qumaryń ne?» dep sura zulymdyqtan.
Artynda azap ta joq, rahat ta joq,
Emes pe eregesken eki duspan.
Sen anany súıesiń, ol mynany,
Munan aqyl jırendi ne qylmystan?
Ar, nysaptyń osydan úmiti ne,
El túzelse, ólgen soń ne paıda oǵan?
Ne din emes, ne tynysh ómir emes,
Artqy úshin arpalysty nege osyǵan?
«El jóndep, tarıhta aty qalar» deıdi,
Aqylym toıa almaıdy meniń buǵan.
Joq, shyraǵym, janymyz joǵalmaıdy,
Eki ómirdiń azyǵy – osy ujdan.
Áıtpese oǵan bul ómir tóleý emes,
Tóleýi – túpsiz rahat, tozbas zaman.
Ar, nysaptyń paıdasyn jan sezedi,
Ólgen soń báıge alaryn bilip tur jan.
Aq júrek, adal nıetti bola almaıdy,
Ujdannyń bul syryna shyn nanbaǵan.
Shyn naný – aqylymen qabyldaýy,
Qalady zulymdyqtan sóıtkende aman.
Áıtpese ólgen soń da maqtanbaqshy,
Jorymasqa jolym joq solaı taman.
Aq, aram, ujdan, zulym dep ne kerek,
Syı almaı, ne qınalmaı joǵalsa jan
Sholaq oıly, dálelsiz sholtańdaǵan
«Fanatık dinshilsiń ǵoı» der-aq maǵan.
Tamam dertten saý aqyl – meniń synshym,
Myń aıtyp uqtyra alman deımin saǵan.

---