InfoHub Logo

QR Bilim jáne ǵylym mınıstri Erlan Saǵadıevtyń aıtýynsha, qazirgi ulttyq biryńǵaı testileýde kásibı-texnıkalyq bilimniń barlyq pánderi qarastyrylmaǵan. Kolejder osy máseleni burynnan beri kóterip keledi. Sebebi onyń kesirinen kolej túlekteriniń kóbisi joǵary oqý oryndaryna túse almaı jatady, dep QazAqparat xabarlaıdy.

«Qazirge kezde kolej túlekteri joǵary oqý ornyna túsý úshin ulttyq biryńǵaı testileýdi tapsyrady. Alaıda testte kórsetilgen tapsyrmalardyń basym bóligin olar kolejde oqymaıdy. Sol sebepti kolejder kópten beri bólek emtıxandy engizýdi talap etip keledi. Kelesi jyldan bastap ondaı emtıxan engiziledi», - dedi Úkimettiń búgingi otyrysynda E.Saǵadıev.

Mınıstrdiń sózine qaraǵanda, keshendi testileýdiń jańa júıesi boıynsha kolej túlekteri 60 suraqqa jaýap berýi tıis. Sonyń ishinde 20-sy jalpy pánder boıynsha jasalsa, 40 suraq onyń óz mamandyǵy boıynsha bolady.

«Alaıda kolej túlegi basqa salaǵa baratyn bolsa, ulttyq biryńǵaı testileýdi tapsyrýǵa týra keledi. Máselen, pedagogıka boıynsha bilim alǵan kolej túlegi joǵary oqý ornyna óz mamandyǵy boıynsha qujat tapsyrsa, testti jańa júıe boıynsha tapsyrady. Al basqa mamandyqty tańdasa, ulttyq biryńǵaı testileýden ótedi», - dep atap kórsetti Saǵadıev.

---