InfoHub Logo

17 aımaqta qalyptasqan ýnıversıtetter bar. Solardyń bazasynda bilim berý ınstıtýttaryn qurý kerek. Bul týraly Ortalyq komýnıkasıalar qyzmetinde ótken brıfıńte QR JOO Rektorlar keńesi tóraǵasy Erlan Sydyqov aıtty.

«Elimizde ýnıversıtetter kóp. 18 mıllıon halqy bar elge eki jerdiń birinde kópsalaly ýnıversıtet ashý ońaı emes. Osy turǵyda joǵary oqý oryndaryn beıimdeý máselesin alǵa qoıyp otyrmyz. Oqý baǵdarlamasy ekonomıkanyń ár salasyna qaraı negizdelgen, baǵyttalǵan, sol saladaǵy jumys berýshilermen tikeleı baılanystaǵy joǵary oqý oryndary bolsa - bul naryqqa tótep beretin joǵary oqý oryndary bolary sózsiz», - deıdi Erlan Sydyqov.

Ol osy másele aıasynda pedagogıkalyq mamandar ázirleý kerektigin alǵa tartady.

«Taıaýda ótken Úkimet múshelerimen ótkizilgen jıynda Prezıdent Qasym-Jomart Kemeluly da pedagogıkalyq mamandar men ınstıtýttardy tártipke keltirý kerek ekenin aıtty. Tártipke keltirýdiń birden bir joly retinde QR Bilim jáne ǵylym mınıstrligi óz usynysyn aıtty. 17 aımaqta qalyptasqan ýnıversıtetter bar. Solardyń bazasynda pedagogıkalyq ınstıtýttar quryp, onyń basshysy fakúltet emes, ınstıtýt dırektory jáne sol ýnıversıtet rektorynyń orynbasary bolyp qyzmet atqarsa jańa baza salýdyń qajeti bolmas edi. 17 aımaqtyń bárine pedagogıkalyq mamandar birdeı kerek. Pedagogıkalyq ınstıtýt bir jerde ashyp, ekinshi jerde ashpaýǵa bolmaıdy. Al barlyq aımaqqa birdeı pedagogıkalyq ınstıtýt salyp berý múmkindigi joq. Sol sebepti, joǵaryda atap ótkendeı, ýnıversıtetterdiń qalyptasqan bazasynda bul mamandardy daıyndaýǵa bolady. Bul máselede jergilikti bılik belsendilik kórsetýi kerek, sebebi muǵalimder jergilikti jerlerge kerek. Keı óńirde 300-den bastap 1000-ǵa deıin mektep bar. Ol mektepterge jylyna 2 muǵalim barady dep eseptesek, 1000 mektepke 2 myń muǵalim kerek degen sóz. Osyny retteý úshin QR Bilim jáne ǵylym mınıstrligi júıeli jumysyn bastap ketti», - deıdi ol.

---