InfoHub Logo

Akademıalyq adamdyq lıgasyna múshe joǵary oqý oryndary stýdentter arasynda úshtik baǵanyń azaıyp ketýine alańdaýly.

Akademıalyq adaldyq lıgasy óz quramyndaǵy 12 JOO stýdentteriniń baǵasyna taldaý jasaǵan. Nátıjesinde, stýdentterge "óte jaqsy" jáne "jaqsy" baǵalary jıi qoıylatyny anyqtalǵan.

M. Nárikbaev atyndaǵy QazGÚÝ ýnıversıtetiniń rektory Talǵat Nárikbaevtyń aıtýynsha, stýdentterdi stıpendıadan aıyrmaý úshin oqytýshylar baǵany kótermelep qoıýǵa májbúr.

"Kóptegen oqytýshylar stýdentterge "qanaǵattanarlyq" baǵasyn qoıǵysy kelmeıdi, sebebi memlekettik grantta oqıtyn stýdent úshtik alsa, stıpendıasynan aıyrylady. Stıpendıanyń stýdentke beriletin áleýmettik kómek ekenin eskere otyryp, QR Bilim jáne ǵylym mınıstrliginiń "qanaǵattanarlyq" baǵasyn alǵan stýdentke de stıpendıa berý bastamasyn qoldaımyz. Osylaısha, oqytýshylar stýdentti ádil baǵalaı alady. Mundaı taldaýdy elimizdegi barlyq JOO-da júrgizý kerek", - dedi Talǵat Nárikbaev Astanada ótken QR BǴM Alqasynyń keńeıtilgen otyrysynda.

Onyń aıtýynsha, Akademıalyq adaldyq lıgasyna múshe bilim berý uıymdarynda baǵalardyń 55 prosenti - "óte jaqsy" jáne "jaqsyǵa" tıesili. Keı jaǵdaılarda "qanaǵattanarlyq" jáne "qanaǵatsyz" baǵalary esh stýdentke qoıylmaǵan. 

"Bul jaǵdaı stýdentterdiń jetistigi týraly burys pikir qalyptastyrady. Dál osy balalar ekonomıkanyń naqty sektorlarynda básekege jaramaı jatady. Akademıalyq adaldyq lıgasynyń barlyq músheleri 2019 jyldyń 1 maýsymyna deıin baǵalardyń ortasha kórsetkishin engizýi kerek", - dedi ol.

Alqa otyrysyna qatysqan QR Bilim jáne ǵylym mınıstri Erlan Saǵadıev bul sharalardyń stýdentterdi ádil baǵalaý men sybaılas jemqorlyqtyń aldyn alýǵa da kómektesetinin aıtty.

"Bilim berý salasyndaǵy baqylaý komıteti men İshki aýdıt qyzmetine barlyq JOO stýdentteriniń tıisti stıpendıalaryn alǵanyn tekserýdi tapsyrdym. Buǵan da alqa sheshimi kerek. Eger eshkim qarsy bomlasa, stıpendıalar boıynsha usynystardy talqylaıyq", - dedi mınıstr.

QazAqparat

---