InfoHub Logo

Memleketimiz táýelsizdikke qol jetkizgeni, jetken árbir jetistikteri ustazdardyń tynymsyz eńbegi men izdenimpazdyǵynyń arqasy deýge ábden bolady. Qaı mamandyq ıesi bolmasyn ustazdan bilim alatyny barshamyzǵa aıan. Halqymyzda «Bir árip úıretkenge, qyryq jyl sálem ber» degen ataly sóz de bar. Árbir sanaly azamattyń júrek túkpirinde muǵalimderge degen qurmet pen sheksiz alǵystyń bary sózsiz. Bul sózimizge Elbasy Qasym-Jomart Toqaevtyń  «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty joldaýynda «Pedagog mártebesine» erekshe nazar aýdarýy dálel bola alady. Úkimetke keler jyldan bastap «Pedagog mártebesi» týraly zańdy ázirlep, qabyldaýdy tapsyrǵan memleket basshysy atalǵan qujattyń muǵalimder men mektepke deıingi mekemelerdiń qyzmetkerleri úshin barlyq ıgilikti qarastyryp, júktemeni azaıtýy, jónsiz tekserister men mindetten tys fýnksıalardan arashalaýy tıis degen oıyn jetkizgen edi.

«Pedagog mártebesi» týraly zańnyń qabyldanýy ustazdar qaýymy úshin tek qurmet qana emes jańa mindetter dep qaraýymyz kerek. N.Nazarbaev óz jodaýynda mektepke deıingi bilim berý sapasyn túbegeıli jaqsartý kerektigin de atap kórsetken bolatyn. Oılaý negizderi, aqyl-oı men shyǵarmashylyq qabiletter, jańa daǵdylardyń bala kezden qalyptasatynyn eskergen ol bilim berý isinde 4K modeline, ıaǵnı, kreatıvtilikti, synı oılaýdy, komýnıkatıvtilikti damytýǵa jáne komandada jumys isteı bilýge basty nazar aýdarýdy kózdeıdi. Bul degenimiz birinshi synyptyń ózine jan-jaqty oılaý qabileti damyǵan oqýshylar qabyldana bastaıdy degen sóz. Bastaýysh synyptan bastap synı oılaý qabileti qalyptasqan, burynǵy oqýshylardan ózgesheleý oılap, oıyn ekshep, anyq jetkize alatyn balany ári qaraı damyta túsý qazirgi tańda qolymyzda bar oqytý bazasymen ońaıǵa túspeıtini belgili. Sol sebepten de orta bilim berý júıesinde belgilengen negizgi tásilderdiń oryndalýyna basa nazar aýdarǵan jón. Ult kóshbasshysy elimizdegi N.Á.Nazarbaev atyndaǵy zıatkerlik mektepteriniń oqytý júıesi men ádistemesin memlekettik mektepter úshin biryńǵaı standart etip alýdy usynady. Bilim sapasyn baǵalaý júıesi halyqaralyq standarttarǵa negizdelýge tıis. Orta mektepterdiń ózinde balalardy meılinshe suranysqa ıe mamandyqtarǵa beıimdep, kásibı dıagnostıka júrgizý mańyzdy. Mańyzdy maqsatty alǵa qoıǵan ustazdar úshin burynǵysynan da kóp izdenýge týra keledi. Qandaı mamandyqtyń aldaǵy tórt-bes jyldyqta burynǵysynsha suranysqa ıe ekendigin boljap, elimiz ben alys jaqyn shet memleketterge analız júrgizý jáne oqýshynyń jeke beıimdiligin eskere otyryp olarǵa durys baǵyt silteý ustazǵa júkteletin asa mańyzdy mindettiń biri. Mundaı jaýapty júktemeni, ıaǵnı, burynnan bergi ustazdyń negizgi fýnksıonaldyq mindetin nátıjeli oryndaý úshin Elbasy aıtqandaı árbir qazaqstandyqtyń elimizdegi ózgerister úrdisine atsalysýy kerek. Árbir qazaqstandyq júrgizilip jatqan reformalardyń mánin jáne olardyń Otanymyzdy órkendetý jolyndaǵy mańyzyn jete túsinýge tıis. Reformalardy tabysty júzege asyrý úshin qoǵamymyzdyń ortaq maqsatqa jumylýy asa mańyzdy.

Ustaz mártebesiniń túrli jaǵdaılarǵa baılanysty alasaryp qalǵany jasyryn emes. Ustazyn qolbala etken qoǵamnyń uzaqqa barmaıtyny jıi aıtylsa da, oǵan qulaq asqandar az bolǵan. Al keler jyly qabyldanatyn jańa zań bul olqylyqtyń orynyn toltyryp, muǵalimderdi ǵana emes, bilim berý salasynyń tynys-tirshiligine beıjaı qaraı almaıtyndardy da bir serpiltip tastady. Jańa zańnyń qabyldanýy Maǵjan Jumabaev aıtqandaı, «Alty Alashtyń balasy bas qossa, tór – muǵalimdiki» bolatyn kúnniń jaqyndyǵy.

---