InfoHub Logo

(Qazaly aýdany, Qojabaqy aýylyndaǵy №25 orta mektebi jaıynda jazylǵan)

№25 mektep óziniń tarıhyndaǵy talaı-talaı tamasha ustazdarymen maqtana alady. Olardyń esimderi aldyńǵy tolqyn shákirtterdiń jadynda kóbirek saqtalyp qalýy - zańdylyq. Sebebi olar sol ustazdardan dáris aldy, tálimin kórdi. Tolqyndy tolqyn qýady. Aldyńǵy býyn ustazdardyń birshamasynyń úlgisin kórip, kúni keshe ǵana №25 mektepte aǵa býyn muǵalimderdiń qataryn qurap júrgen bir top ustazdardyń ózderi de bul kúnde ardager ustazdardyń sapyn tolyqtyrǵan edi. Bul ustazdardyń qatarynan eń alǵashqy bolyp sol kezde aǵa býyn ustazdardyń aldynda júrgen matematıka pániniń muǵalimi, bir kezde ózi de osy mektepke basshylyq jasaǵan Amangeldi Esetovtiń esimi atalady. Osy býyn ári qaraı myna ustazdarmen jalǵasqan edi:

Mektep basshysy bolyp istep, qurmetti demalysqa shyqqan, tarıh pániniń muǵalimi Temirbaev Almas, mekteptiń tárbıe jumystarynyń meńgerýshisi bolǵan, matematıka pániniń muǵalimi Baınazarov Dosbol, bıologıa pániniń muǵalimi Mahamashev Tilek, matematıka pániniń muǵalimi Jumaǵambetova Raıhan, qazaq tili pániniń muǵalimi Óteshova Kúlán, shet tili pániniń muǵalimi Kádirova Qýanysh, orys tili pániniń muǵalimi Sahıev Qýantqan, dene tárbıesi pániniń muǵalimi Qýatbaev Murat.

Medısına ǵylymdarynyń doktory Begaly Áıtpembetov, fılologıa ǵylymdarynyń doktory Toqbolat Eńsegenovter osy №25 mekteptiń bir kezdegi túlep ushqan túlekteri edi. Budan ózge de ǵylym jolyndaǵy bir kezgi mektep túlekteri bolyp ushqan bir shoǵyr er-azamattar qatary az emes. Endi osy bir er-azamattar qalyptastyrǵan úrdis názik jandylarmen jalǵasyn tapty. Taǵylymdy eńbekterimen kórinip júrgen avtor, ulaǵatty ustaz, óner ıesi, pedagogıka ǵylymdarynyń kandaıdaty Sarash Sahıqyzy Qońyrbaeva osy mekteptiń 32-túlegi edi.

Qazaqstan Jazýshylar odaǵynyń músheleri Seıil Boranbaev, Ánes Narymbetov, Meshitbaı Quttyqov sekildi talantty aqyndar osy mekteptiń qabyrǵasynan qanat qaqty. Budan keıin de qalamgerlik joldy jalǵastyrǵan esimderi kópke tanymal bolǵan er-azamattar qatary az emes. Osy aǵalar jolyn nazik jandy qyz balalar jalǵastyra bastady. Birneshe jyr músháıralarynyń jeńimpazy, júldegeri, jas aqyn Dına Bókebaı osy mekteptiń bıylǵy 68-túlekteriniń qatarynda arman kógine samǵamaq.

Osydan 37 jyl buryn mekteptiń qos birdeı uly qatarynan mektepti úzdik támamdap, altyn medalmen bitirip shyqqan edi. Bular ózderinen burynǵy túlekter, mekteptiń alǵashqy medal ıegerleri - mektepti kúmis medalmen bitirip shyqqan Ábı Dáýletkerimov, mektepti altyn medalmen bitirip shyqqan Alpysbaı Qaramoldaev bastaǵan bir shoǵyr shákirt uldardyń zańdy jalǵasy edi. Olardyń arasynda eki birdeı mektepti altyn medalmen bitirip shyqqan názik jandy shákirt qyzdar boldy. Shákirt uldar qalyptastyrǵan osy bir úrdis budan keıingi jyldarda tek qana mektepti úzdik bitirýshi qyz balalardyń úlesine ǵana tıip kelgen bolsa, mektepti 2016 jyly mekteptiń 67-túlegi Eltaı Abylaıhan "Altyn belgige" bitirip shyqty.

Orta mektep retinde irgetasy qalanǵanyna 2017-2018 oqý jylynda 70 jyl tolǵaly turǵan mektep 2019 jyly óziniń 70-túlekterin qanat qaqtyrmaq.

Mektep jaıly aıta aldyq pa biz uǵa,
Shákirtine qaraıtyn el qyzyǵa.
"25-ten edim" deıtin uly da,
"25-ten edim" deıtin qyzy da.

Mektebiniń bilim atty gúl baǵy
Daıyndap edi, berdi ómirge tulǵany.
"25-te oqyǵam" deıdi sondyqtan
Ár shákirti - qyzdary men uldary.

Ár túlektiń eńbegi etken baǵaly
Mektebiniń esinde ár kez qalady.
Talaı bilim synaǵynda eńkeımeı
25-tiń bıik turǵan jalaýy.

Talaı shákirt ótkenine qaraǵan
Shyǵarmaıdy óz mektebin sanadan.
Jıyrma bes te sportta, óner, bilimde
Myqtylardyń aldyn talaı oraǵan.

Ustaz aty, ǵajap ediń sen netken,
Tabys joly alynbaıdy esh ertekten.
Bul jerde de talaı ustaz bala úshin
Eńbek etken, tynshymastan ter tókken.

Qojabaqy - kıeli ol da el edi,
Artqy tolqyn aldyńǵyǵa eredi.
Sol dástúrmen bolashaqqa umtylyp
XXI-diń jas urpaǵy keledi.

Kútsin deıdi el jas urpaqty tań kúlip,
Jeteleıdi bolashaq dep alǵa úmit.
Alda - asýlar, al sanada mekteptiń
Tarıhy da tura beredi jańǵyryp.

---