InfoHub Logo

Qazirgi ýaqytta ustaz mártebesi men bedeli, onyń biliktiligi jaıly otandyq BAQ betterinde kóp talqylanatyn mańyzdy taqyrypqa aınaldy. «Ult bolashaǵy - urpaq desek, urpaq - bolashaǵy ustazdardyń qolynda » ekeni qaı kezde de belgili. Sondyqtan da, keıbir saıttar ustazdyń qoǵamdyq ómiri týraly jazady, keı biri sabaq berý ádisi men tájirıbesin jazady. Al búgingi ustaz tegin qoǵamdyq jumys kúshine aınaldy, senbilikter de, túrli áleýmettik-kópshilik jumystar da qosalqy mamannyń mindetin atqaryp júr dep dabyl qaǵatyndar da az emes.

Kóptegen BAQ-dy oqyǵan kezde ustazdar ómirdegi eń tómengi deńgeıdegi jáne quqy buzylǵan qoǵam múshesi retinde tanystyrylady. Degenmen, qazirgi zamanda ustaz degenimiz kim jáne dárejesi qandaı degen suraqqa naqty jaýap beretin ýaqyty keldi.

Ózimizden bastasaq, qazirgi orta býyn ókilderi, oqýshy bolǵan kezderinde ata-analar tarapynan ustaz mártebesi týraly tárbıelik jumystar júrgiziletin. Sebebi, bizdiń ata-analarymyzdyń nazarynda ,ustaz - bedeli bıik jáne ómirlik tájirıbesi baı, joǵary saýatty maman edi. Ustazdy qadirleý jáne joǵary baǵalaý , bolashaq urpaqty tárbıeleýde mańyzdy ekenin ata-analarymyz túsingen edi.

Osyndaı tárbıe alǵan biz ustazdardy qadirlep, dárejesin odan ári kótere túsýimiz qajetti edi. Kerisinshe, biz ustazdardy tıisti dárejede qadirleı almaıtyn boldyq. Buǵan ne sebep? Tárbıe máselesinde olqylylyq jiberip aldyq pa, álde ustaz degen atqa kir keltiretin ustazdar kóbeıdi me? Joq, bolmasa ustazdy mensinbeıtin shákirtter, ustazdyń kim ekenin tanyǵysy kelmeıtin ata-ana kóbeıdi me?

Shyntýaıtyna kelgende, munyń barlyǵy bizdiń ustazdarymyzdy jan-dúnıesin túsinip, tıisti dárejede taný múmkindigin jiberip alýymyzda. Iaǵnı, ustazdarymyzdy BAQ-ta beriletin aqparattar arqyly ǵana tanyp bilýimizde. Qazirgi ýaqyttaǵy ata-analar kópshiligi joǵary bilimdi, oqyǵan nemese ózderin bilimdi sanaıtyn adamdar.

Dese de kóbimizdiń ustazdardyń bedeli men biliktiligi týraly biletinimiz tek qana, BAQ-tyń aınalasyndaǵy aqparattar ǵana. Árıne, qazir mektepke, ýnıversıtetterge barsańyz, sabaq berýge qatysyp kórseńiz, ustazdyń joǵary bilimdi jáne kásibı maman ekenin kórýge múmkindigimiz bar. Kabınetterde ustaz jáne oqýshy jetistigi, kórkemdik materıaldarmen kórinip tur. Bul jetistikti kóretin ustazdar men oqýshylar ǵana. Al, ustazdyń eńbeginiń nátıjesin naqtylaıtyn jáne jalǵastyratyn Ata-ana bul jetistikterden eshqandaı habary joq.

Ustaz týraly aqparat jetispeýshilikten Ustazdy tıisti dárejede syılaı bilý jetispeıtini belgili. Sondyqtan, Ustazdarymyzdy kásibı jaǵynan jańasha tanytyp, qoǵamda Ustaz mártebesin ózgeshe tanytýdyń ýaqyty keldi. Olqylyqtardyń ornyn toltyryp, muǵalim bedelin kóterýdiń naqty joldaryn kóp bolyp oılastyrsaq eken? Mysaly, Serpin Medıa aqparat ortalyǵy osy baǵyttaǵy qyzmetteri úlgi retinde kórsetýge bolady!

Temirhan Ábdikov, Arys qalasyndaǵy J.Baıǵuttıev atyndaǵy óner mektebiniń oqytýshysy

---