InfoHub Logo

Úıdi ártúrli qajetsiz qoqystan tazartý ońaı emes. Al ony retke keltirý odan da qıyn. Úıdiń shashylmaýyn qamtamasyz etetin myna ádetterdi ustanýǵa tyrysyńyz.

Úıdi retke keltirýdiń eń jaqsy amaly – júıesiz tutynýdy doǵarý. Úıińizde zat az bolǵan saıyn, ony retteý de, jınaý da ońaı. Sondyqtan kereksizin laqtyryp, nemese syılap jiberińiz.

Qaǵaz poshtany birden retteńiz

Qaǵaz poshtanyń jumys ústelinde nemese kireberistegi týmbochkada jınala beretin qasıeti bar. Siz hatty oqyp, sol jerge jınaı beresiz, nátıjesinde bir tóbe makýlatýra jınalady.

Qaǵaz hattardy birden ashyp, arnaıy bir orynǵa salýdy ádetke aınaldyryńyz – qoqys jáshigine nemese jumys ústelindegi papkaǵa. Sonymen qatar chekter men kepil talondaryn bir jerge jınańyz, jáne ara arasynda merzimi ótkenderin tastap otyryńyz.

Tamaq iship bolǵan soń ydystardy birden jýyńyz

Ydys jýýdy jek kórseńiz de dál osylaı isteńiz. Betine tamaq qatyp qalǵan bir qora ydysty jýyp turǵansha bir-eki ydysty jýa salý ońaı. Bar-joǵy eki mınýt ýaqytyńyz ketedi, al as úıińiz taza turatyn bolady.

Ár tańda tósegińizdi jınap júrińiz

Bylyq – bylyqty týdyrady. Dál osy prınsıpti jatyn bólme jaqsy kórsetedi. Tósegińiz jınalmaǵan kúıde qalsa, aınalasynda bylyq týa bastaıdy. Sondyqtan ár tańda tósegińizdi jınap ketip júrińiz.

As ústeldiń betindegi zattardyń bárin alyp tastańyz

Bylyq týdyrǵysh taǵy bir oryn – ol dastarhan. As úı ústeli árdaıym taza bolýyn qadaǵalańyz: tap-taza ústeldiń ústine artyq zat qoıǵyń da kelmeı qalady. Tústený de jaǵymdy bolady.

Zattardy oryn-ornyna qoıyńyz

Ár zattyń óz orny bar. Kúnde keshkisin ár zatty óz ornyna jınańyz. Bala kezimizde muny mıymyzǵa quıdyrǵanymen, osyny ádetke aınaldyrmadyq. Bul kóp ýaqytyńyzdy almaıdy, esesine tańerteń taza bólmede oıanasyz jáne zattardy izdep álek bolmaısyz.

Bir-eki mınýt ýaqytyńyzdy alatyn isterdi dereý istep tasańyz

Bylyq kóbine bolmashy isterdi keıinge qaldyrýdan bastalady. Qarapaıym erejeni este saqtańyz: eger birdeńeni eki mınýtta oryndap tastaýǵa bolatyn bolsa, dereý istep tasańyz.

Qoqysty shyǵaryńyz, kir kıimderdi kir jýǵysh mashınaǵa salyńyz, teledıdar púltyn ornyna qoıyńyz, shań basqan monıtordy súrtińiz. Kishigirim tapsyrmalardy oryndaǵan saıyn úıdi retteýge bir qadam jasap otyrasyz.

Keńistikti bosatyńyz

Kishigirim bólmede tym kóp zat bolǵan kezde, úıdiń astan-kesteńi shyǵady: shkafta kóp kıimniń bolýy, jáshikte tósek-oryn zattarynyń kóp mólsheri, jýynatyn bólmede tym kóp zat, sóredegi kitaptar, gadjetter men basqa da zattar.

Úıińizdiń bir buryshy zattarǵa tolyp ketse, keńistikti bosatyńyz – bárin rettep, kerek emesin tasyńyz. Jáne muny keıinge qaldyrmańyz, bul 15 mınýttaı ýaqyt alady, jáne bylyqtyń bir qaınarkózi joıylady.

Osy atalǵan ádetterdiń árqaısysy - sizge úıdi retteýge kómektesedi. Jáne, árıne, zat az bolǵan saıyn osy erejelerdi ustaný da ońaı bolady.

Úıdi tazalyqta ustaǵyńyz kelse – artyq zat almańyz. Al siz tazalyq jáne jınaqylyqty saqtaý úshin ne isteısiz? Qandaı keńesterińiz bar? Tómende pikirlerińizben bólisińizder!

---