InfoHub Logo

1916 jyldyń jazy. «Iýn jarlyǵy shyǵypty, qazaqtardan soldatqa kisi alady» degen habar qulaqqa sap ete qaldy. Keshikpeı-aq 19 ben 31 jastyń arasyn sypyra bastady. Jurt abyrjýda. Barar jer, basar taý, panalaıtyn oryn joq. Adamqaıyr Qoıtasbaev taǵy basqa birneshe jumysshylar Ekibasqa qashyp ketti. Kázirgi baseınimizdegi dańqtylardyń biri Bekbosyn Syıqymbaevtyń Bólegen degen inisi sońynan birneshe jumyskerlerdi ertip patshanyń jarlyǵyna qarsy Spass mańyna toptalǵan halyqtyń kóterilisin basqaryp ketti.

Oı, shirk-i-i-n! Qandaı jigit edi! Janyp turǵan ot edi, shirkin! Sonda:

— Batyl bas aıaqty, kedeıler,
Rýhyńmen kúreske bekemden.
Týdy shaq ózimiz jol ashar,
Bostandyq dúnıege keýdemen.. —

dep óleń aıtatyn. Aıaǵy kóp bolatyn edi, adam aıtpaǵan soń umytyp ta qalady eken.

Sol jyly ıýl aıy edi. Horbatel narádqa keldi. Kekti ashý kernegen jumysshylar ony masqaralaıtyn yńǵaı bildirdi. Aleksandr Gorbatov, Nurmaǵambetov Ysqaq, Altaıbaev Husaıyn degen jumysshylar baıqaýsyzda Horbateldiń artyna táshke ákelip qoıdy. Men ony ıterip, táshkege qulattym. Ázir turǵan jumysshylar táshkeni tarta jóneldi. Olar sol betinde Horbateldi topyraq tógetin jerge, kúresinge aparyp bir-aq qulatty.

Bizdiń shahterler aǵylshyn paıdakúnemderine óziniń kekti ashýyn osylaı bildirip edi.

---