InfoHub Logo

Abaıdyń Iassaýı hıkmetimen tanys ekenin otyz besinshi qara sózi baıandaıdy: «Mahsharda Allahý ta’ala qajy, molda, sopy, jomart, sheıit — solardy qatar qoıyp, surar deıdi. Dúnıede ǵızzat úshin, syı-qurmet almaq úshin qajy bolǵandy, jomart bolǵandy, sopy bolǵandy, molda bolǵandy, sheıit bolǵandy bir bólek qoıar deıdi. Ahıretke bola, bir ǵana Allahý ta’alanyń razylyǵyn tappaq úshin bolǵandardy bir bólek qoıar deıdi. Dúnıe úshin bolǵandarǵa «Sender dúnıede qajeke, moldeke, sopeke, myrzeke, batyreke atalmaq úshin óner qylyp edińder, ol dúnıeń munda joq. Senderdiń ol qyzyqty dúnıeń harap bolǵan. Sonymen qylǵan ónerleriń de bitti. Endi munda qurmet almaq túgil, suraý berińder! Mal berdim, ómir berdim, ne úshin sol maldaryńdy, ómirlerińdi, betińe ahıretti ustap, din nıetiń dúnıede turyp, jurtty aldamaq úshin saryp qyldyńdar?» deıdi. Ana shyn nıetimenen ornyn taýyp, bir qudaıdyń razylyǵy úshin óner qylǵandarǵa aıtar deıdi: «Sender bir ǵana meniń razylyǵymdy izdep maldaryńdy, ómirlerińdi saryp qylyp edińder, men razy boldym. Sizderge laıyqty qurmetti ornym bar, daıyn, kirińder! Hám ol razylyqtaryńnan basqa osy mahshar ishinde, senderdiń osy qylǵanyńa ózi qylmasa da, ishi erip, yntyq bolǵan dostaryń tabylsa, shafaǵat qylyńdar!» - dep aıtar deıdi».

Bul qara sóz 1896 jyly jazylǵan. Bul Abaıdyń ahıret úshin tolǵanysqa túsken kezeńimen sáıkes keledi. Adamnyń «Ómirdiń máni ne? Ne úshin ómirge keldim? Bul dúnıedegi atqarar boryshym, artqan jaýapkershiligim qandaı? Erteń ómirden ótkennen keıin ne bolady?» degen suraqpen betpe-bet keletin sáti. Abaı ózine kerek kiaptardy Semeı, Túrkistan, Omby, ishki Reseıden aldyrtyp otyrǵan. Abaı Shyǵys danalyǵy, sopylyq ilim týraly kitaptardy Muhtardyń atasy Áýez arqyly Túrkistannan aldyryp otyrǵan.

---