InfoHub Logo

Zeńgi baba sıyr ishindegi buzaýdyń túr-túsin naqtap aıtatyn, jańylmaı tabatyn kóripkel, áýlıe bolypty. Onyń ómirlik qosaǵy Ánýar ananyń da ishtegi buzaýdyń qańdaı ekenin ajyrata alatyn synshylyq qasıeti bar eken. Birde zaıyby erinen:

— Men sizdiń áýlıelik isińizge ortaqpyn ba? Saýapqa serikpin be? — dep surapty. Zeńgi oǵan qarap;

— Sen saýapqa serik bola almaısyń. Ózim taqýamyn, sondaı taza isimmen áýlıelikke ıemin. Bul qasıet ózimnen, oǵan sen ortaq emessiń, — depti.

Ánýar ana eri Zeńgini erekshe yqylasymen kútip, as-aýqatyn taza daıyndap, qyzmet etedi eken. Ol as daıyndaǵanda, ydystardy toǵyz márte jýyp, shaıqap, shaıatyn kórinedi.

Birde Ánýar tús mezgilinde as daıyndap jatyp, aýqattyń ishinde áldene qarań ete qalǵanyn kózi shalyp, baıqap qalady. «Bir noqatta qara daq bar eken ǵoı-aý» dep, qansha aýystyryp, izdese de taba almapty. «Osy arada júr me eken» dep shamalap, astyń bir-eki shómishin alyp, tógip tastaıdy. Pada baǵyp, ashyǵyp, ystyq kúnniń astynda qap-qara bop ózin kútken eriniń jaı-kúıin oılap, aýqatty asyǵa Zeńgige alyp barady. Baba ony lezde iship qoıady.

Arada biraz ýaqyt ótedi. «Álgi qarań etken nárse as ishinen alyndy ma, joq pa?» — degen kúmán Ánýar ananyń kóńilinen ketpeıdi. Ol sony baıqaý nıetimen ıirile jatqan sıyrdyń shetki bireýin qolymen nusqaı kórsetip:

— Anaý sıyr qandaı buzaý týady? — dep suraıdy. Sol kezde baba:

— Túsi qyzyl, mandaıy qasqa buzaý, — dep jaýap beredi.

Sonda jubaıy sál ezý tartyp, jymıyp:

— Quıryǵynyń ushy aq, qyzyl buzaý, — depti.

Ýaqyty jetip, sıyr boshalap, quıryǵynyń ushy aq, túsi qyzyl buzaý týady.

Ánýardyń aıtqany týra shyqqan soń Zeńgi odan:

— Men qalaı jańyldym? — dep surapty.

— Sizdiń jańylǵanyńyz, sol kúni aýqattyń ishinde bir noqatta kishkentaı qara daq ketip, qansha izdesem de, taba almaǵan edim. Sol kózińizge perde bop tutylyp, ishtegi buzaýdyń quıryǵy qaırylyp, aıaǵynyń arasynan ótip, mandaıyna tıip jatqanyn baıqaı almadyńyz, — deıdi jubaıy.

Sol ýaqytta Zeńgi;

— Meniń áýlıelik qasıetim seniń jasaǵan qylaýsyz taza qyzmetińmen baılanysty boldy. Eger sen tazalyǵyńnan sál ǵana múlt ketseń, men ol qasıetimnen aırylyp, jarym-jartylap, tolyq kúıde bola almaıdy ekenmin, — dep moıyndaǵan eken.

---