10-سىنىپ وقۋشىلارىنا بيزنەستىڭ قىر-سىرى ۇيرەتىلەدى
2019 جىلدان باستاپ 10-سىنىپ وقۋشىلارى كاسىپكەرلىك پەن بيزنەس نەگىزدەرىن وقيتىن بولادى. بۇل تۋرالى بۇگىن ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا ق ر بعم مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى شولپان كارينوۆا ايتتى.
«بۇل باعدارلاما مينيسترلىك تاراپىنان «اتامەكەن» ۇلتتىق كاسىپكەرلەر پالاتاسىمەن بىرگە ازىرلەندى. بۇگىنگى كۇنى وقۋ باعدارلاماسى دايىن. وقۋلىقتار دايىندىق ۇستىندە. جالپى وقۋشىلارعا تەك پاندىك ءبىلىم بەرىپ قانا قويماي ومىرلىك داعدىلارعا باۋلۋ، ومىردە ءوز ورنىن تابۋعا جانە العان بىلىمدەرىن ومىردە پايدالانا بىلۋگە ۇيرەتۋ - بۇل جاڭارتىلعان ءبىلىم مازمۇنىنىڭ نەگىزگى ۇستانىمى. سوندىقتان كاسىپكەرلىك جانە بيزنەس نەگىزدەرىن وقىتۋ بۇگىنگى زامان تالابى»، - دەدى دەپارتامەنت باسشىسى.
ونىڭ سوزىنە قاراعاندا، مينيسترلىك «اتامەكەن» ۇكپ-مەن وقۋ باعدارلاماسىن ازىرلەۋ بارىسىندا وقۋشىلاردىڭ، مۇعالىمدەردىڭ جانە بيزنەسمەندەردىڭ پىكىرلەرىن ەسكەرگەن.
«وقۋلىقتار بۇگىنگى كۇنى ساراپتاماعا تاپسىرىلدى. جالپى 10 سىنىپتا وسى ءپاندى پاريتەتتىك وقۋ جوسپارى بولىگىندە وقىتۋ كوزدەلگەن ەدى. ءبىراق بىزدە 10-سىنىپقا جاڭارتىلعان ءبىلىم مازمۇنىن ەنگىزۋ 2019-2020 جىلدارى جۇرگىزىلەدى. سوندىقتان ءبىر جىلدان كەيىن اتالعان وقۋلىقتار ءتيىستى ساراپتامالىق جۇمىستاردان وتكىزىلىپ، ەنگىزىلەدى»، - دەدى شولپان كارينوۆا.
قازاقپارات
You Might Also Like
-
الداعى وقۋ جىلىنان باستاپ 3، 6 جانە 8ء-ىنشى سىنىپ وقۋشىلارى وقۋلىقتاردى پلانشەتكە جۇكتەپ وقي الادى. بۇل تۋرالى بۇگىن ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا ق ر بعم مەكتەپكە دەيىنگ...
-
كوپ نارسەگە قول جەتكىزگىسى كەلەتىن، ءبىراق جەتىستىككە جەتە الاتىنىنا سەنبەيتىن جاندارعا ارنالعان بىرنەشە كەڭەس.
