InfoHub Logo

الداعى وقۋ جىلىنان باستاپ 3، 6 جانە 8ء-ىنشى سىنىپ وقۋشىلارى وقۋلىقتاردى پلانشەتكە جۇكتەپ وقي الادى. بۇل تۋرالى بۇگىن ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا ق ر بعم مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى شولپان كارينوۆا ايتتى.

«ق ر ءبىلىم جانە عىلىم مينيسترلىگى جاڭارتىلعان ءبىلىم مازمۇنىن ەنگىزۋ جانە وقۋلىقتاردىڭ ساپاسىن ارتتىرۋ بويىنشا جۇيەلى تۇردە جۇمىس  جۇرگىزۋدە.  الدىمىزداعى وقۋ جىلىندا 3، 6 جانە 8-سىنىپتار جاڭارتىلعان بىلىمگە كوشەدى. بولجام بويىنشا 800 مىڭنان  استام وقۋشى وسى سىنىپتارعا كەلەدى  دەپ كۇتىلۋدە. ءبىزدىڭ ماقساتىمىز اتالعان وقۋشىلاردى ساپالى وقۋلىقتارمەن قامتاماسىز ەتۋ»، - دەدى ول.

ونىڭ ايتۋىنشا، مينيسترلىك تارابىنان وقۋلىقتاردى ازىرلەۋ، اپروباسيادان  وتكىزۋ جانە ءبىلىم مەكەمەلەرىن وقۋلىقتارمەن قامتاماسىز ەتۋ بويىنشا نورماتيۆتىك-قۇقىقتىق نەگىزدەمەگە وزگەرىستەر  ەنگىزگەن. جاڭا قاعيداعا سايكەس بارلىق مەكتەپتەردەگى ءبىلىم دەڭگەيى بويىنشا وقۋلىقتار سىناقتان وتكىزىلەدى. سونىمەن قاتار مەكتەپتەرگە ارنالعان وقۋلىقتار مەن وقۋ ادىستەمەلىك كەشەندەردى جازاتىن اۆتورلىق قۇرامدا مىندەتتى تۇردە عالىم، ادىسكەر، مەكتەپ ءمۇعالىمىنىڭ بولۋى بەكىتىلدى.

«سونىمەن قاتار باسپالارعا وقۋلىقتاردىڭ ەلەكتروندى نۇسقاسىن قوسا  بەرۋ مىندەتتەلدى. بۇل وقۋشىلاردىڭ ولاردى پلانشەتتەرگە نەمەسە تەلەفونعا جۇكتەپ پايدالانۋىنا مۇمكىندىك بەرەدى. وقۋلىقتاردىڭ كولەمى مەن فورماتىنا بايلانىستى اتا-انالار تاراپىنان سىن بولدى. وسىنى ەسكەرىپ، مۇعالىمدەرمەن جانە اتا-انالارمەن كەلىسىپ، مينيسترلىك وقۋلىقتاردى ازىرلەۋشى باسپاعا ۇسىنىمدار جاسادى. كەلەسى وقۋ جىلىنان باستاپ ءار مەكتەپ وقۋشىلاردىڭ سانىنا، ناقتى قاجەتتىلىككە بايلانىستى وقۋلىقتار الادى»، - دەدى شولپان كارينوۆا.

قازاقپارات

---