InfoHub Logo

ءسىز اپتاسىنا قانشا ساعاتىڭىزدى ءبىلىم الۋعا جۇمسايسىز؟ ءسىز بۇل ءسوزدى جوو بىتىرگەن بويدا ۇمىتىپ كەتكەن شىعارسىز؟ ەندەشە، ەسكە تۇسىرۋگە ەشقاشان كەش ەمەس، ونىڭ ۇستىنە، پراكتيكا كورسەتىپ وتىرعانداي، بۇل ءۇشىن سونشالىقتى كوپ نارسەنىڭ قاجەتى جوق. ءوزىڭىزدىڭ ءبىلىم دەڭگەيىڭىزدى اناعۇرلىم جوعارىلاتۋ، جانە ماڭىزدىلىعى ودان ەش كەم تۇسپەيتىن بەلگىلى ءبىر پراكتيكالىق ناتيجەلەرگە قول جەتكىزۋ ءۇشىن اپتاسىنا بەس ساعاتىڭىزدى ارناساڭىز — جەتىپ جاتىر. بۇل 5 ساعاتتى قالايشا بارىنشا ءتيىمدى پايدالانۋ جونىندە ءبىزدىڭ وسى ماقالامىزدان وقىڭىزدار.

     

5 ساعات ەرەجەسى نە ءۇشىن قاجەت؟  

ءبىلىم دەگەنىمىز — بۇل 21 عاسىردىڭ التىنى. تەحنولوگيالاردىڭ دامۋى كونە، ءداستۇرلى وقىتۋ ادىستەرىنەن الدەقايدا وزىق كەلە جاتىر. ءبىر قادام الدا ءجۇرۋ قيىنداعان ۇستىنە قيىنداپ كەلە جاتىر. اسىرەسە، ءار مينۋت ءۇشىن باسەكەلەستىك وتە-موتە جوعارى بولىپ جۇرگەن قازىرگى زامان قارقىن الىپ تۇرعان جاعدايدا.  

شىعار جول بىرەۋ — وزدىگىنەن ءبىلىم الۋ. ءسىز ۇنەمى جاڭا نارسەنى ءبىلىپ، ۇيرەنۋگە ءتيىسسىز. ءوز بىلىكتىلىگىڭىزدى، جانە دە ءوزىڭىزدىڭ ماماندىعىڭىزدىڭ اياسىندا عانا ەمەس، ودان تىس سالالاردا دا ارتتىرىپ وتىرۋعا ءتيىسسىز. ءپانارالىق ينتەگراسيا — بۇل كوپ جاعدايدا ايرىقشا ناتيجەلەرگە جەتكىزەتىن زاماناۋي الەمنىڭ تاعى ءبىر ترەندى.  

بۇل بولسا، قازىرگى ءداۋىردىڭ تالابى عانا ەمەس: ۇلى ادامداردىڭ بارلىعى وزدىگىنەن وقىپ ءبىلىم العان. ساۋالنامادان وتكەن 200 ميلليونەردىڭ 67% تەلەديداردى كورمەيدى، ولاردىڭ 86% كۇن سايىن كىتاپ وقيدى، ال 63% اۋديوكىتاپتاردى تىڭدايدى. بيلل گەيتس، مارك سۋكەربەرگ، يلون ماسك، ۋوررەن باففەت — وسى كىسىلەردىڭ بارلىعى ءىرى-ىرى كومپانيالاردى قۇرۋ ارقىلى عانا داڭقى الەمگە جايىلعان جوق، سونىمەن قاتار ولار وتە كوپ ۋاقىتىن وزدىگىنەن ءبىلىم الۋعا ارنايتىندىعىمەن دە تانىلدى.    

البەتتە، ءبىلىم الۋعا اپتاسىنا 5 ساعاتتى ارناۋ ءسىزدىڭ ايگىلى باي-باعلانداردىڭ قاتارىنا قوسىلاتىنىڭىزعا (باسقا دا ءتۇرلى فاكتورلارعا بايلانىستى) كەپىل بولا المايدى. دەگەنمەن، ولاردىڭ (بايلاردىڭ) باسىم بولىگى وسى ەرەجەنى بەلگىلى ءبىر دارەجەدە پايدالانعانىن قاپەردەن شىعاراماعان ابزال.

«5 ساعات ەرەجەسى» دەگەن نە؟

5 ساعات ەرەجەسى — بۇل وقىپ-توقۋعا، ويلانىپ-تولعانۋعا جانە تاجىريبە جاساۋعا اپتاسىنا كەم دەگەندە بەس ساعاتتى جۇمساۋ كەرەكتىگىن بىلدىرەتىن ءاردايىم وزدىگىنەن ءبىلىم الىپ وتىرۋ جۇيەسى.  

كلاسسيكالىق نۇسقاسىندا بۇل ءاربىر جۇمىس كۇنىندە ءسىز ءبىر ساعات بويى وزدىگىنەن ءبىلىم الۋمەن اينالىساسىز دەگەن ءسوز. امەريكالىق ءبىرتۋار ساياساتكەر بەندجامين فرانكلين ءدال وسى سحەما بويىنشا ارەكەت ەتكەن. ءبىر اپتادا 112 جۇمىس ىستەيتىن ساعات بارىن ەسكەرسەك (كۇن سايىن 8 ساعات ۇيقىعا كەتەدى)، بۇل بۇكىل ۋاقىتىمىزدىڭ 4،4% عانا بولادى. ءبىز تاماق ىشۋگە ودان كەم ۋاقىت جۇمسامايتىنىمىزدى ەسىڭىزدە ۇستاڭىز.

مىيىڭىزدى دامىتۋ ءۇشىن اپتاسىنا 5 ساعات جۇمساۋ — بۇل ءتان ءۇشىن مىندەتتى گيگيەنالىق شارالار سىقىلدى كەرەكتىنىڭ ەڭ تومەنگى دەڭگەيى. ءسىز كۇندەلىكتى جۋىنىپ-شايىناسىز، ءتىسىڭىزدى جۋاسىز، فيزيكالىق جاتتىعۋلار جاسايسىز ت.ب. ءوزىڭىزدىڭ اقىل-پاراساتىڭىزعا (ينتەللەكت) دا كوڭىل بولەتىن كەز كەلدى. ەگەر ءسىزدىڭ مۇمكىندىگىڭىز جانە ىقىلاسىڭىز بولسا، كوبىرەك وقىڭىز. ءبىراق كەم بولماسىن. AT&T كومپانياسىنىڭ باس ديرەكتورى رەندال ستەفەنسون ايتقانداي، ءبىلىم الۋعا اپتاسىنا 5-10 ساعاتىن جۇمسامايتىندار جۋىق ارادا «مورالدىق تۇرعىدا (بۇل ءسوزدىڭ تەحنولوگيالىق ماعىناسىندا) ەسكىرىپ قالادى». 

وزدىگىنەن ءبىلىم الۋدىڭ ءۇش تىرەگى

ساپالى ءبىلىم ايتەۋىر ءبىلىم الا بەرۋدى عانا بىلدىرمەيدى. سونىمەن بىرگە ءسىز العان اقپاراتتى وڭدەۋىڭىز جانە ونى ءىس جۇزىندە پايدالانا ءبىلۋىڭىز كەرەك. وسىعان وراي ءبىز وزدىگىنەن وقۋ كەزىندە ورىنداۋىڭىز قاجەت ءتۇيىندى ءۇش پراكتيكانى ءبولىپ الدىق.

كىتاپ وقۋ

ءسىزدىڭ ەندىگى مىندەتىڭىز — كۇن سايىن كىتاپ وقۋدى ادەتكە اينالدىرۋ. سىزگە ءوزىڭىز ەڭبەك ەتىپ جۇرگەن سالادا دامىپ-جەتىلە تۇسۋىڭىزگە كومەگى تيەتىن كىتاپتاردىڭ ءتىزىمىن ءتۇزىڭىز دە، ولاردى وقۋعا كۇنىنە قۇرىعاندا 20 مينۋتتان ۋاقىت ءبولىڭىز. سونشاما جۇمىسباستى بولساڭىز دا، بۇنىڭ تۇك تە قيىندىعى جوق. ەلەكتروندى كىتاپتاردىڭ ارقاسىندا ءسىز قولىڭىز قالت ەتكەن كەز كەلگەن مەزەتتە، قاي جەردە بولسا دا، وقي بەرە الاسىز.  مىسالى كولىكتە (اۆتوبۋس، ۇشاق..)، كەزەكتە تۇرىپ، ۇزىلىستەر كەزىندە ت.س.س.

ءسىزدىڭ قالاي وقىعانىڭىز دا ماڭىزدى. ناتيجەلى وقۋ جونىنەن بەرىلەتىن كەڭەستەر كوپ، ءبىراق ءبىز وزەكتى بىرەۋىن دارالاپ ايتقىمىز كەلەدى. بلوكنوت باستاڭىز دا، قىسقاشا كونسپەكتىلەردى، قىزىقتى ويلاردى، ءوزىڭىزدى مازالاعان جەكە سۇراقتارىڭىزدى، ەسكەرتپەلەرىڭىزدى جانە يدەيالارىڭىزدى سول جەرگە ءتۇرتىپ الىپ وتىرىڭىز. بۇل ءسىزدىڭ وزدىگىنەن ءبىلىم الۋداعى كەلەسى كەزەڭىڭىزدە پايداڭىزعا جارايدى.   

ويلانىپ-تولعانۋ

الدىڭعى كەزەڭدە العان بۇكىل اقپاراتتى ەستە ساقتاپ قانا قويماي، ونى سارالاپ-تالداۋدىڭ دا ماڭىزى زور. وقىپ وتىرعان كەزدە بلوكنوتىڭىزعا ءتۇرتىپ قويعان جازۋ-سىزۋلارىڭىزعا جۇگىنىپ، ولار جايىندا ويلانىپ كورىڭىز. تۇسىنىكسىز جەرلەرى بولىپ جاتسا، قوسىمشا دەرەكتەردى ىزدەستىرىڭىز.  

ەڭ باستىسى، «العان ءبىلىمىمدى ومىردە قالاي قولدانا الامىن؟» دەگەن سۇراققا جاۋاپ بەرىڭىز. بۇل ماڭىزدى نارسە، ويتكەنى، وقىپ بىلگەنىڭىزدى ناقتى، پراكتيكالىق تۇرعىدا پايداعا جاراتا الار-الماسىڭىز وسىعان بايلانىستى عوي.

تاجىريبە جاساۋ

Google-دىڭ تابىسقا جەتۋىنىڭ قۇپيالارىنىڭ ءبىرى سول، ولار وزدەرىنىڭ جۇمىسىندا «20 percent time» قاعيداتىن قولدانادى. ول قاعيداتقا سايكەس قىزمەتكەرلەر جۇمىس ۋاقىتىنىڭ 20% تاجىريبەلەر جاساۋعا جانە وزدەرىنىڭ يدەيالارىن جۇزەگە اسىرۋعا ارناي الادى. مىسالى، ءدال وسى ارقىلى دۇنيە جۇزىندەگى ەڭ ءىرى پوچتالىق سەرۆيس Gmail پايدا بولعان ەدى.  

وقۋ مەن ويلانىپ-تولعانۋ، تاجىريبەلەردى جاساپ كورۋ سياقتى امالدار — بۇل قورشاعان ورتانى ءتانىپ-بىلۋدىڭ ەڭ ماڭىزدى تاسىلدەرىنىڭ ءبىرى. جاسالعان تاجىريبەنىڭ ناتيجەسىندە ءسىز ءوزىڭىزدىڭ تەوريالىق ءبىلىمىڭىزدى پراكتيكادا دالەلدەنگەن، ناقتى نارسەلەرمەن تولىقتىرا الاسىز.  

وقۋ مەن تالداۋ بارىسىندا پايدا بولعان يدەيالارىڭىزعا جۇگىنىڭىز. سودان سوڭ ولاردى، قىسقارتىلعان، وڭايلاتىلعان تۇرىندە بولسا دا، پراكتيكالىق تۇرعىدا قالاي ىسكە اسىرۋعا بولاتىنىن ويلانىپ كورىڭىز. مىسالى رەتىندە، ەگەر ءسىز ءوزىڭىزدى وراتور رولىندە سىناپ كورگىڭىز كەلىپ جۇرسە، دوسىڭىزدىڭ تۋعان كۇنىندە ونى ەرەكشە تۇردە قۇتتىقتاڭىز. بۇعان ۋاقىتىڭىز بەن كۇشىڭىز كوپ كەتپەيدى، ءبىراق ءوزىڭىزدىڭ مۇمكىندىكتەرىڭىزدى باعامداي الارىڭىز انىق.   

قورىتىندى

5 ساعات ەرەجەسى — بۇل ءسىز وزدىگىڭىزدەن ءبىلىم الۋ ءۇشىن بەلگىلەپ قويۋىڭىز كەرەك ەڭ تومەنگى مەجە. بۇل، ارينە، ەگەر شىنىمەن-اق تولايىم ناتيجەگە قول جەتكىزگىڭىز كەلسە. ءۇش پراكتيكانىڭ (وقىپ-توقۋ، ويلانىپ-تولعانۋ جانە تاجىريبەلەردى جاساپ كورۋ) اراسىندا 5 ساعاتتى قالاي ۇلەستىرىپ جۇمسايتىنىڭىز — ول ءسىزدىڭ جەكە باسىڭىزدىڭ نەنى قالايتىنى مەن مۇمكىندىكتەرىڭىزگە بايلانىستى.

وقۋعا كەڭەس بەرەمىز:

ءوزىن-وزى كەمەلدەندىرۋ پسيحولوگياسى

تاباندىلىق پەن اقىل

وقىپ-ۇيرەنۋدى ادەتكە قالاي اينالدىرۋعا بولادى

دارىن vs داعدى. قايسىسى ماڭىزدىراق؟

---