Android باپتاۋلارىنىڭ سمارتفوندى ىڭعايلىراق ەتەتىن جاسىرىن فۋنكسيالارى
Android Oج (اندرويد وپەراسيالىق جۇيەسى) ورناتىلعان سمارتفوندار ءار ءتۇرلى پىشىمدە جانە كولەمدە جاساپ شىعارىلادى، ءبىراق ءىش جاعىندا ولاردىڭ بارلىعى ءبىر عانا بازالىق نەگىزدە ىستەيدى. Android كودىنىڭ سمارتفوندى ناقتى پايدالانىپ جۇرگەن ادامنىڭ قاجەتتىلىكتەرىنە بەيىمدەپ بەرەتىن باپتامالارى بار. وكىنىشكە وراي، پايدالانۋشىلاردىڭ وزدەرى سمارتفوندارىن وزدەرىنە قولدانۋعا ىڭعايلى ەتىپ الۋعا اسىقپايدا دا، سمارتفوندى دەفولت (باعدارلامانىڭ باستاپقى زاۋىتتىق نۇسقاسىندا پايدالانىلاتىن ماندەر) بويىنشا پايدالانىپ جۇرە بەرەدى. ءبىز سمارتفوندى جىلدامىراق جانە جاقسىراق ىستەيتىن ەتىپ باپتاۋعا مۇمكىندىك بەرەتىن كەيبىر وزگەرتۋلەردى جيناقتادىق.
كاستومدىق قارا ءتىزىم
بەلگىلى ءبىر كونتاكتىلەردى بۇعاتتايتىن قوسىمشالاردى پايدالانۋدىڭ كادىمگىدەي ءقاۋپى بار — سمارتفونعا نەشە ءتۇرلى بالەنى جۇقتىرۋىڭىز مۇمكىن. جالپى العاندا ولاردىڭ كەرەگى دە جوق: Android جاعىمسىز ابونەنتتەردى تۋرالاپ داۋىستىق پوچتاعا جىبەرىپ وتىرۋعا مۇمكىندىك بەرەدى. قاجەتتى كونتاكتىنى تاڭداڭىز دا، مازىردە «تەك داۋىستىق پوچتانى» بەلگىلەڭىز.
بوس جاد
ەگەر سمارتفونىڭىزعا Android 7.0 Nougat نەمەسە ودان كەيىنىرەك شىققان نۇسقاسى ورناتىلعان بولسا، ءسىز Smart Storage فۋنكسياسىن پايدالانا الاسىز. ول فۋنكسيا اۆتوماتتى تۇردە بوس ورىننىڭ جەتكىلىكسىزدىگىن ايقىندايدى دا، سيرەك قارالاتىن فوتو- جانە ۆيدەوفايلداردى بۇلتتىق قويماعا جىبەرەدى.
ءقاۋىپسىز رەجيم
بۇل پايدالى فۋنكسيا تۋرالى، نەگە ەكەنىن، كوپشىلىك بىلمەيدى. Android پايدالانۋشىعا كەز كەلگەن ساتتە سمارتفوندى Safe mode رەجيمىنە قويۋعا مۇمكىندىك بەرەدى: وپەراسيالىق جۇيە بارلىق بوگدە قوسىمشالاردى ءوشىرىپ، ءوزى قوسىلادى. بۇل قوسىمشالاردىڭ قايسىسى جۇيەنىڭ قاتىپ قالۋىنا اپارىپ سوعىپ وتىراتىنىن انىقتاۋ ءۇشىن نەمەسە قايسىسى باتارەيا رەسۋرسىن باسقالاردان كوبىرەك تۇتىناتىنىن ءبىلىپ الۋ ءۇشىن پايدالى بولماق.
باستى ەكراندى تازالاۋ
بارلىق قوسىمشالار ادەپكى ءتارتىپ بويىنشا باستى ەكرانعا تاڭباشالارىن ورناتادى. اڭگىمە پايدالى قوسىمشا تۋرالى بولسا، بۇل وتە ىڭعايلى، ال ءجيى قولدانىلمايتىن قوسىمشا تۋرالى بولسا، جىنعا ءتيىپ بىتەدى. Google Play باپتاۋلارىن اشىڭىز دا، پوزيسيادان «تاڭبالاردى قوسۋ» قۇسبەلگىسىن الىپ تاستاڭىز. ايتپاقشى، سول جەردە قوسىمشالاردىڭ اۆتوماتتى تۇردە جاڭارتىلىپ وتىرۋىن ءوشىرىپ تاستاۋىڭىزعا بولادى.
جىلدام باپتاۋ
ەكى ساۋساعىڭىزبەن ەكراندى تومەن قاراي سيپاساڭىز، Android-تىڭ جىلدام باپتاۋ پانەلى اشىلادى. ول Wi-Fi، Bluetooth، قولشام سياقتى باپتاۋلارعا دەرەۋ كىرۋدى قامسىزداندىرادى. ونىڭ ۇستىنە، پانەلدى كاستوميزاسيالاپ جىبەرۋگە بولادى: تومەنگى سول جاق بۇرىشتاعى قالام بەلگىسىن (كەي قۇرىلعىلاردا تومەنگى وڭ جاق بۇرىشتا «وڭدەۋ» دەگەن ءسوز تۇرادى، سونى ءتۇرتۋ كەرەك) باسساڭىز، وسى جەرگە كەز كەلگەن قوسىمشانى سالىپ قويا الاسىز.
تەلەفوندى ىزدەۋ
تەلەفوندى جوعالتىپ قويۋدان قورقاسىز با؟ وندا Android-تىڭ ورناتىلىپ قويعان قۇرىلعىنىڭ قايدا ەكەنىن قاداعالاپ وتىرۋ جۇيەسىن قوسىپ قويىڭىز: «باپتاۋلاردى» اشىڭىز، «قاۋىپسىزدىك جانە ورنالاسقان جەرگە» ءوتىڭىز دە، «مەنىڭ قۇرىلعىمدى تابۋدى» ءتۇرتىڭىز.
شريفت ولشەمىن ۇلكەيتۋ
Android-تاعى كوبىنەسە قولايسىز بولىپ كەلەتىن شريفتتەردى وقىعاندا كوزدى سىعىرايتۋدىڭ جانە تالدىرۋدىڭ ەندى قاجەتى جوق. «باپتاۋلار» قوسىمشاسىن اشىڭىز دا، «ەكراندى» تاڭداڭىز، سودان سوڭ، وزگەرتۋلەر ەنگىزۋ ءۇشىن، «شريفت ولشەمىن» باسىڭىز. وزگەرتۋلەردى ەنگىزۋ ءۇشىن سىلتەۋىشتى (ۋكازاتەل) سىرعىتپا (پولزۋنوك) بويىمەن جىلجىتىڭىز جانە اقىرعى ناتيجە قانداي بولاتىنىن انىقتاۋ ءۇشىن الدىن الا كورۋ تەرەزەسىن تەكسەرىڭىز. Android-تىڭ قاجەتتى شريفت ولشەمى ورناتىلعان سوڭ قوسىمشالاردىڭ كوپشىلىگى ونى اۆتوماتتى تۇردە قولدانىپ وتىرادى.
You Might Also Like
-
ءارقايسىمىز ومىرىمىزدە ونشا جاقسى ەمەس باستىقتارعا تاپ بولعان بولۋىمىز مۇمكىن. ءوز ومىرىڭىزدەگى ەڭ جامان باستىقتى ەسىڭىزگە الىڭىز. ءسىز ونى «دۇنيە جۇزىندەگى ەڭ جەكسۇرىن باستىق» دەپ سيپاتتا...
-
«سىبايلاسۋ»، «پارا الۋ»، «كوررۋپسيا» - ءمانى مەن ماعىناسى سايما – ساي، ەگىز ۇعىمدار. قازىرگى تاڭدا وزەكتى ماسەلەلەردىڭ الدىڭعى شەبىندە تۇرعان، تامىرى تەرەڭگ...
