ابايدىڭ اقىندىق سىنى
اباي – ومىرگە وي تەربەتىپ، اقىلى مەن قۇدىرەتىن تانىتقان اقىن. سوندىقتان ونىڭ قاي تۋىندىسى بولماسىن، بەلگىلى ءبىر دارەجەدە دانالىقتىڭ كىلتى بولىپ تابىلادى. ۇلتىمىز تاۋەلسىزدىگىن العالى بەرى رۋحاني مۇرامىزدى ۇلىقتاۋ، سونىڭ ىشىندە اباي مۇراسىنا جاڭاشا كوزقاراسپەن، زامان تالابى تۇرعىسىنان قاراپ، زەردەلەۋ بۇگىنگى ابايتانۋ عىلىمىنىڭ وزەكتى ماسەلەلەرىنىڭ ءبىرى بولىپ وتىر. اباي مۇراسىنىڭ اسا ءبىر ءماندى دە ءنارلى بولىگى – ونىڭ ولەڭدەرىندەگى ادامگەرگەرشىلىك قاسيەتتەر، يماندىلىق پەن جان-جاقتى اقىل-وي سيپاتى تۋرالى تولعانىستارى.
اباي قۇنانباي ۇلى - ءوز زامانىندا قاتال سىنشى بولعان تۇلعا. ادام بويىنداعى اسىل قاسيەتتەردى دارىپتەگەن ابايدىڭ ماقساتى – حالقىن سىنمەن تۋرا جولعا سالىپ، كوزىن اشۋ بولعان. قاراڭعى قازاق دالاسىندا بولىپ جاتقان زاڭسىز ارەكەتتەر مەن زۇلىمدىقتار ويشىلدى قاتتى ويلاندىرعان بولسا كەرەك-تى. ابايدىڭ ءبىر ادامدى سىنعا العانى - سول سياقتى ءبۇتىن ءبىر قاۋىمدى سىناعانى دەپ قاراۋىمىزعا بولادى. ۇلى اقىن قازاق حالقىنىڭ تۇرمىس-جاعدايىنا ءجىتى قاراپ، ءوز سىني كوزقاراسىن قاعازعا ءتۇسىرىپ وتىرعان. ياعني، اقىن شىعارمالارى اقىننىڭ ەلىنىڭ قارەكەتى مەن احۋالىن سيپاتتاپ،سىن كوزىنەن وتكىزگەنىن ۇعىندىرادى. ابايدىڭ سىنشىل پىكىرىن مىنشىلدىگى دەپ قاراۋىمىزعا بولمايدى. اقىن تەك ادام بويىنداعى مىنەز-قۇلىقتى عانا ەمەس، قوعامدىق جانە الەۋمەتتىك، عىلىمي ت.ب باعىتتاردى قامتيدى. بۇدان ءبىز ابايدىڭ شىعارمالارى ءار تاراپتى، ءارى اۋقىمدى ەكەنىن بايقاي الامىز. اباي ءوز تاقىرىپتارىندا الدىمەن ۇلت مىنەزىن، ارسىزدىق، ۇياتسىزدىق، يمانسىزدىقتى قاتال سىنايدى. ۇلى ويشىلدىڭ سىنشىلدىق سىرى – ساندارلى، كوكسەۋى - اسقاق، ويى – كۇردەلى.
اباي ۇلى اقىن. ءوز زامانىنداعى بولىپ جاتقان توناۋ مەن ادام قۇقىعىنىڭ تاپتالۋىنا، قاناۋشىلىققا كوز جۇما قاراي الماعان اقىن، ۇنەمى ادامداردى جاماننان جيرەنىپ، جاقسىدان ۇيرەنۋگە شاقىرىپ وتىرعان. ءوز ولەڭدەرىن 19 عاسىردا ەتەك العان وسىنداي ۇلكەن ماسەلەلەرگە ارناعان. دانا اقىن ءوز ەڭبەكتەرىندە ناعىز ادامنىڭ بويىندا بولۋى كەرەك ادامي قاسيەتتەر تۋرالى جازىپ، سول ادام بەينەسىنە انتونيم قاسيەتتەردى سىناۋ ارقىلى ادامزاتتى ىزگىلىككە تاربيەلەگەن. كەشەگى 19 عاسىردا بولعان ءتۇرلى كەلەڭسىزدىكتەر مەن كەمشىلىكتەر تەك اباي ءومىر سۇرگەن زامانعا عانا ەمەس، بۇگىنگى قوعامعا دا ءتان.
ايشات ناقا
You Might Also Like
-
جايشىلىقتا دارىندى ەردى بىلمەيسىز، كەيدە كوزگە ىلەمىز دە، ىلمەيمىز. ءومىر ءوتىپ، ەل ەسكەرىپ جاتسا ەگەر، سوندا عانا قاسىمىزدا ءجۇر دەيمىز.
-
ەرەسەكتەرمەن سالىستىرعاندا بالالاردىڭ كوزىمەن ءومىر قىزىقتى، ءارى وتە قاراپايىم. بالانىڭ ءتىلى بال بولاتىنى راس ەكەن-اۋ. ۇيگە كەلگەنىڭدە ولاردىڭ سان ءتۇرلى سۇراقتارى مەن بىلدىرلاپ سويلەگەن ءتاتتى سوزدەر...
