InfoHub Logo

ەرەسەكتەرمەن سالىستىرعاندا بالالاردىڭ كوزىمەن ءومىر قىزىقتى، ءارى وتە قاراپايىم. بالانىڭ ءتىلى بال بولاتىنى راس ەكەن-اۋ. ۇيگە كەلگەنىڭدە ولاردىڭ سان ءتۇرلى سۇراقتارى مەن بىلدىرلاپ سويلەگەن ءتاتتى سوزدەرى بىردەن شارشاعانىڭدى ۇمىتتىرىپ جىبەرەدى. بالالار نەگىزىنەن اسەرشىل، تەز ەلىكتەگىش كەلەدى عوي. ەرەسەكتەردىڭ ءاربىر قيمىلىن، سوزدەرىن سول كۇيى قابىلداپ الىپ، ونى  ۇلكەن ومىرگە الىپ كەتەدى. سوندىقتان ۇلكەندەرگە  سالماقتى ءسوز سويلەپ، سانالى ىس-ارەكەت جاساعان جوندىرەك.

بالاسىز ءۇي - مازار، بالالى ءۇي - بازار" دەپ اتام قازاق بەكەردەن بەكەر ايتپاسا كەرەك. مەن دە بالا بولدىم. ءبارى جان-جاقتان قىزىعىپ سۇراق قويىپ، القىمىمنان الاتىن ەدى. ءقازىر ءوزىم دە كىشكەنتاي جيەندەرىمە ءتۇرلى سوزدەردى ايتقىزىپ، قىزىق كورىپ ءجۇرمىن. ءبىر جيەنىمە "وزىڭە ءبىر نارسە الارسىڭ" دەپ مايدا تيىندار بەرگەنمىن. تيىندى العان جيەنىم "ءبارىن جيناپ، ماماما اپارىمىن" دەپ سومكەسىنە سالىپ، تىعىپ قويىپ جاتقانى ەرەكشە اسەر قالدىردى. قازىرگى بۇلدىرشىندەردىڭ زەرەك، اقىلدى، ءارى ءبارىن باقىلاپ وتىراتىنىنا  كوزىم جەتتى.      

21 عاسىردىڭ بالالارى تەز جەتىلىپ كەلەدى. ولار تەحنيكانىڭ ءتىلىن تەز مەڭگەرەدى. كومپيۋتەر مەن ۇيالى تەلەفونداعى ويىنداردى ەركىن ويناپ وتىرعان 4-6 جاستان اسقان بالانى كورسەك تاڭعالمايتىن بولدىق. ەسەسىنە، بالالاردىڭ دالادا توپ قۇرىپ، ءبىزدىڭ كەزىمىزدەگىدەي قىزىقتى ويىن تۇرلەرىن ويلاپ تاۋىپ، تانىمدىق قابىلەتىن ارتتىراتىن ويىنداردان قاپى قالعانىن بايقاۋعا بولادى. بالاپاندارعا ەرتە جاستان ۇلكەن ادامدارشا قارىم-قاتىناس جاساپ، اياق كيىمىنىڭ باۋىن ءوزى بايلاپ، قىز بالا شاشتارىن ءوزى ورە الاتىنداي ەتىپ داعدىلاندىرۋ كەرەك سەكىلدى. سونداي-اق وتباسىندا قازاقشا سويلەپ، ءتىلىمىزدىڭ دامۋىنا دا كوڭىل ءبولۋىمىز وتە ماڭىزدى.ويتكەنى بۇگىنگى جاقسى تاربيە الىپ، ءوزىن باقىلاۋدا ۇستاي بىلەتىن بالا، ەرتەڭگى كۇنى ەل بولاشاعىنا پايداسىن تيگىزەتىن تۇلعا بولاتىنىنا سەنەمىن.بالانىڭ وسى باستان-اق جاقسى جاققا دامۋى، بۇل- بولاشاق كەپىلى.

ەركەناز جالمۇقاشيەۆا  

حالەل دوسمۇحامەدوۆ اتىنداعى اتىراۋ ۋنيۆەرسيتەتىنىڭ جۋرناليستيكا فاكۋلتەتىنىڭ 3 كۋرس ستۋدەنتى

---