InfoHub Logo

12-ناۋرىزدا قازاقستاننىڭ ورتالىق كەڭەستەر كوميتەتىنىڭ 2- جالپى جيىلىسى اشىلدى.

ورتالىق كوميتەتتىڭ بۇل 2-جيىلىسىنىڭ اشىلاتىن كۇنى نيكولاي پاتشانىڭ «باسىنان داۋلەت قۇسى ۇشىپ»، اتا-بابالارى 300 جىل قازعان زىندانىنا ءوزى قۇلاعان كۇنىنە ءدال كەلدى. بۇل ءبىر تاريحي قۋانىشتى ءىس.

جانە وسى ورتالىق كوميتەتتىڭ 2-جيىلىسى 14-ناۋرىزدا كوممۋنيست پارتياسىنىڭ العاشقى نەگىزىنىڭ سالىنعانىنا 25 جىل تولعان ۋاقىتىنا تۋرا كەلەدى. ءام ناۋرىزدىڭ 15-نەن ءارى قاراي قازاقستاننىڭ كوممۋنيست پارتياسىنىڭ 3-جالپى جيىلىسى اشىلادى. بۇنىڭ ءبارى وسى ناۋرىزدا كەلەتىن الداعى ءىس.

ورتالىق كوميتەتتىڭ جالپى جيىلىسىندا قارالاتىن ماسەلەلەردىڭ ەڭ زورى ايماقتىق، جەرگىلىكتى كۇنبەلى تىعىز ىستەردىڭ ىستەلەتىن جوباسى. ولارعا كەرەكتى قاراجاتتاردىڭ قايدان الىناتىن ءام قايدا جۇمسالاتىن تارتىپتەرى.

ايماقتىق ءام جەرگىلىكتى مەكەمەلەردىڭ ارينە ەڭ الدىمەن قاراپ، بار كۇشىن جۇمسايتىن ىستەرى — وقۋ ءىسى ءام ەلدەردىڭ شارۋاسىن جوندەۋ. جيىلىسقا كەلگەن ورتالىق كوميتەت مۇشەلەرى بۇل 2 ماسەلەگە بار ىنتاسىن سالىپ كىرىسىپ، وسى 2 جۇمىستى كوركەيتۋگە، كۇشەيتۋگە كىرىسۋلەرى كەرەك. قازاقستاننىڭ تاعدىرى ورتالىق كوميتەتتىڭ قولىندا، ورتالىق كوميتەتتىڭ مۇشەلەرى قازىرگى ۋاقىتتا ناشار تابىنا نەنىڭ پايدالى، نەنىڭ زيان ەكەنىن بىلۋلەرى كەرەك.

وكتيابر توڭكەرىسى الىپ بەرگەن تەڭدىك، بوستاندىقتى پايدالانىپ قاتاردان قالماۋعا ەڭ الدىمەن ەكى-اق نارسە كەرەك.

ولار: وقۋ ءام مال.

جانە ناۋرىزدىڭ 15-نەن ءارى قاراي قازاقستاننىڭ كوممۋنيست پارتياسىنىڭ ءىىى-جالپى جيىلىسى بولادى دەدىك.

بۇل جيىلىستا دا ءتۇرلى ماسەلە قارالماق. مۇندا قارالاتىن ماسەلەنىڭ ءبىر زورى ەل اراسىندا كوممۋنيست پارتياسىنىڭ ناشار تابىن تاربيەلەۋ ىستەرىن جۇرگىزىپ، ناشارلار تابىن كوممۋنيست پارتياسىنىڭ ساياسىنا مەڭگەرىپ الۋ ماسەلەسى.

ارينە، بۇل تۋرالى دا ءتۇرلى جوبالار، ءتۇرلى نۇسقاۋلار بار. ءتۇرلى تاسىلدەر، ءتۇرلى ادىستەر بار.

كوممۋنيست پارتياسىنىڭ قازاقستانعا ىقپالىن جۇرگىزىپ، ناشارلار تابىن مەڭگەرىپ الىپ كەتۋىنە كوپ بوگەتتەردىڭ بىرەۋلەرى — جاندى بوگەتتەر، بىرەۋلەرى — جانسىز بوگەتتەر.

جاندى بوگەتتەر مىنالار:

1. باققۇمارلىق، ارام ويلىلىق.

2. ارام ويلى ۇلتشىلدىق.

3. وتارشىلدىق ارام ويلىلىق.

مەنىڭ ويىمشا بۇل مەن كورسەتكەن 3 ءتۇرلى بوگەتتىڭ قازىرگى قازاقستانداعى كوممۋنيست پارتياسىنا ەڭ ۇلكەن ءقاۋىپتى بوگەت — باققۇمارلىق، ارام ويلىلىق ءام وتارشىلدىق ارام ويلىلىق.

ءقازىر بىزگە ۇلتشىلدىقپەن كۇرەسۋ وڭاي. ال مىنا ەكى ءتۇرلى: باققۇمارلىق پەن وتارشىلدىققا قارسى كۇرەسۋ وتە قيىن. بۇلار كوممۋنيست پارتياسىنىڭ ەڭ ءقاۋىپتى دۇشپاندارى. بۇلارمەن بايقاپ ارباسىپ، قاتتى كۇرەسۋ كەرەك. بۇلار جويىلماي قازاقستاندا پارتيا ىستەرى وركەندەۋى وتە قيىن. مۇنى پارتيا ازاماتتارى ەندى شىنداپ ويلاۋلارى كەرەك.

بۇلارمەن كۇرەسپەي ءىس وڭبايدى. ارينە، بۇل «ازاماتتار دا» قاراپ جاتپاس. ارام ۋلارىن شاشىپ باعار. ۇيتسە دە كۇرەسۋ كەرەك.

1923 جىل

---