الەمنىڭ تانىمال جوو وڭتۇستىكتىڭ دارىندى جاستارىن وقۋعا شاقىردى
شىمكەنتتە حالىقارالىق ءبىلىم كورمەسى وتۋدە. «International Education Fair 2018» اتتى كورمەدە شەتەلدىڭ ەڭ ماقتاۋلى ۋنيۆەرسيتەتتەرىنىڭ وكىلدەرى جاستاردى ستيپەنديالىق باعدارلاما بويىنشا تەگىن وقۋدىڭ ءتيىمدى تەتىكتەرىمەن تانىستىردى.
«حالىقارالىق باعدارلامالار ورتالىعى» اق مەن قازاقستان رەسپۋبليكاسى ءبىلىم جانە عىلىم مينسترلىگىنىڭ قولداۋىمەن ۇيىمداستىرىلعان كورمەگە اقش، ۇلىبريتانيا، ەۋروپا مەن ازيا جانە تمد ەلدەرىنىڭ 83 جوعارى وقۋ ورىندارى، ءتىل ۇيرەتۋ مەكتەپتەرى مەن ءبىلىم اگەنتتىكتەرى قاتىستى. ولار شارا بارىسىندا شەت تىلدەرىندە ەركىن سويلەيتىن، قابىلەتتى جاستاردى وقۋعا شاقىردى. اتالعان جيىنعا ارنايى قاتىسقان وبلىس اكىمى جانسەيىت تۇيمەبايەۆ قوناقتارعا ءوڭىردىڭ ءبىلىم سالاسىنداعى مۇمكىندىكتەرى مەن الەۋەتىن تانىستىرىپ ءوتتى.
«ەلباسىمىز ءاردايىم ءوزىنىڭ حالىققا ارناعان جولداۋلارىندا جاستاردىڭ ءبىلىمدى دە، باسەكەگە قابىلەتتى بولۋ كەرەكتىگىن ۇنەمى ايتىپ كەلەدى. مىنە، وسى ماقساتتا «بولاشاق» حالىقارالىق ستيپەندياسى قۇرىلدى. اتالعان باعدارلاما اياسىندا الەمنىڭ 35-تەن استام ەلىندە 12 مىڭنان استام قازاقستاندىق ازامات ءبىلىم الدى. بۇگىندە باعدارلاما بويىنشا ءبىلىم العان 300-دەن استام وڭتۇستىكقازاقستاندىق جاس ەلىمىزدىڭ ەكونوميكالىق دامۋىنا ءوز ۇلەستەرىن قوسۋدا. حالىق سانى جاعىنان كوش باسىندا تۇرعان ءوڭىرىمىز، «بولاشاق» باعدارلاماسىنا قاتىسۋ بويىنشا دا ءبىرىنشى ورىندا بولۋ كەرەك دەپ ويلايمىن. ال، بىلىكتىلىكتى ارتتىرىپ، ءبىلىمدى جەتىلدىرە تۇسۋگە كەلگەندە مۇنداي تاجىريبە الماسۋ كورمەسىنىڭ ءرولى وراسان دەپ بىلەمىن»، - دەدى جانسەيىت قانسەيىت ۇلى.
كورمەگە ءبىرىنشى كۇننىڭ وزىندە شەتەلدە وقۋدى ارماندايتىن 4 مىڭنان استام جاس كەلدى. شارا بارىسىندا قازاقستاندىق جانە شەتەلدىك جوعارى وقۋ ورىندارىمەن ءبىلىم اگەنتتىكتەرى اراسىندا كەزدەسۋ ۇيىمداستىرىلدى. وندا «بولاشاق» باعدارلاماسىن پايدالانۋ اۋقىمىن كەڭەيتۋ جايى ءسوز بولدى. ماماندار پىكىرىنشە شەتەلدەردە ءبىلىم الاتىن قازاقستاندىق ستۋدەنتتەردىڭ سانى جوسپارداعىدان ايتارلىقتاي از.
«بۇگىندە شەتەلگە بارىپ ءبىلىم الۋعا نيەتتى ازاماتتاردىڭ سانى وتە از. سەبەبى، حالىق «بولاشاق» باعدارلاماسى تۋرالى اقپاراتپەن قانىقپاعان دەپ ويلايمىن. وسى ماسەلەنى شەشۋ ماقساتىندا الەمنىڭ دامىعان ەلدەرىنەن جانە وتاندىق جوعارى وقۋ ورىننىڭ وكىلدەرىن شاقىرىپ، وسىنداي ءبىلىم كورمەسىن ۇيىمداستىرىپ وتىرمىز. ماقساتىمىز - وزگە ەلگە بارىپ ءبىلىم الاتىنداردىڭ قاتارىن كوبەيتۋ. قازىرگى تاڭدا وزگە ەلدەردە وقيتىن جاستاردىڭ 85 پايىزى استانا، الماتى قالالارىنا تيەسىلى. ەندى وڭتۇستىكقازاقستاندىق جاستاردىڭ سانىن ارتتىرساق دەگەن جوسپار بار»، - دەدى «حالىقارالىق باعدارلامالار ورتالىعى» اق-نىڭ پرەزيدەنتى جانبولات مەلدەشوۆ.
ايتا كەتەيىك، «Rixos Khadisha Shymkent» قوناق ۇيىندە ءوتىپ جاتقان شارا ەكى كۇنگە جالعاسادى.
قازاقپارات
You Might Also Like
-
ءومىر – كۇيمە اربامەن ءجۇرۋ سياقتى. بارلىعى جاقسى بولا تۇرا، جولدىڭ تاستى بولىگىنە جەتكەندەگى سىلىكىنىستەن قورعانا الماۋىڭىز مۇمكىن. ال ومىردە جولداعى تاستاردىڭ ءرولىن ءتۇرلى جاعدايلار اتقارادى.
-
كورگەن ءتۇسىن جورىتىپ، ونىڭ ورىندالۋىن تاعاتسىزدانا كۇتەتىندەر بار. ىرىمشىل بىزدەر ءۇشىن بۇل جاعداي تاڭسىق ەمەس. كەرىسىنشە، كورگەن ءتۇسىن ەلەۋسىز قالدىرىپ، بۇگىنگىمەن ءومىر سۇرەتىن ادامدار دا از ەمەس. ...
