InfoHub Logo

كورگەن ءتۇسىن جورىتىپ، ونىڭ ورىندالۋىن تاعاتسىزدانا كۇتەتىندەر بار. ىرىمشىل بىزدەر ءۇشىن بۇل جاعداي تاڭسىق ەمەس. كەرىسىنشە، كورگەن ءتۇسىن ەلەۋسىز قالدىرىپ، بۇگىنگىمەن ءومىر سۇرەتىن ادامدار دا از ەمەس. تومەندەگى بىرنەشە مىسال "ءتۇس - تۇلكىنىڭ بوعى" ەكەندىگىن عىلىمي تۇرعىدان دالەلدەيدى. ەگەر تۇسىڭىزدە نەبىر وقيعالاردىڭ كۋاسى بولىپ، وڭىڭىزدە ءوز كوزىڭىزگە ءوزىڭىز سەنبەي جۇرسەڭىز، ناقتى سالدارىن ماقالادان بىلە الاسىز.

ادام ۇيىقتاعان كەزدە مي جاسۋشالارىنىڭ بارلىعى دەرلىك "ۇيقىعا" كەتە قويمايدى، كەيبىر بولىمدەرى قىزۋ جۇمىس ىستەيدى. وسى بولىكتەر ارقىلى ءبىز بۇرىن كورگەن، ەستىگەن، ءدامىن تاتقان زاتتاردىڭ بەينەلەرى ميدا قايتادان "تىرىلەدى". ءارى ۇيقىداعى ادامنىڭ ميى جارتىلاي  تەجەلۋگە ۇشىرايتىندىقتان، ويلاۋ دارەجەسى تومەندەپ، تۇستە نەبىر اقىلعا سىيىمسىز وبرازدار بەينەلەنەدى.

ادامنىڭ كۇندىز باسىنان كەشكەن وقيعالارى، تىلەگى مەن ارمانى، وزگەلەرمەن قارىم-قاتىناسى، كۇندەلىكتى قىزمەتى سىندى ارەكەتتەر ءتۇس كورۋگە بىردەن-بىر سەبەپ. فيزيولوگيالىق تۇرعىدا مي جاسۋشالارىنا كەز كەلگەن قيمىل-قوزعالىس (اعاش جاپىراعىنىڭ سىلدىرى، قوڭىراۋ سىڭعىرى، اتەشتىڭ شاقىرعانى، ەسىكتىڭ اشىلعانى)، ءتىپتى ۇيالى تەلەفونداعى ۆيبراسيا دا اسەر ەتەدى. اعزاڭىزدا (جۇرەك، اسقازان) جايسىزدىقتىڭ ورىن الۋى دا تۇسىڭىزگە قاي-قايداعى "كەرەمەتتەردى" كىرگىزەدى. ماسەلەن، ۇيقىداعى ادامنىڭ جۇرەگىنە سالماق تۇسسە، كەنەتتەن قاتتى سوعا باستايدى. تۇسىڭىزدە بىرەۋمەن توبەلەسىپ، ياكي قاشىپ جۇرسەڭىز نەمەسە اقشاڭىزدى جوعالتىپ سابىلۋىڭىز دا جۇرەك سوعىسىنىڭ اسەرىنەن ەكەن. سول سەبەپتى، "وڭىمدە اقشام جوعالادى-اۋ" دەپ قورقۋدىڭ ەش قاجەتى جوق.

ومىردە ەستىمەگەن، كورمەگەن دۇنيەلەردىڭ تۇسكە كىرمەيتىندىگى دالەلدەۋدى قاجەت ەتپەيتىن اكسيوما: تۋعاننان كورۋ قابىلەتىنەن ايىرىلعان ادامنىڭ تۇسىنە كوزگە كورىنەتىن بەينەلەر كىرمەيدى، ەسەسىنە ءيىس، ەستۋ، ءدام ارقىلى قابىلدانعان نارسەلەرى ەنەتىن كورىنەدى.

قاتتى شارشاپ، قالعىپ كەتكەندە، جارتاستان نەمەسە بيىكتەن قۇلاپ بارا جاتقانداي كۇي كەشىپ، وزدىگىڭىزدەن شوشىپ وياناتىن كەزدەر دە بولادى. سەبەبى، ادام كلينيكالىق ولىمگە ۇشىراپ كەتۋى ىقتيمال بولسا، ميدان سيگنال بەرىلەدى. سول كەزدە قورقىنىشتى ءتۇس كورگەندەي شوشىپ ويانىپ، قايتادان ءتاتتى ۇيقىعا كەتەسىز. وسىنداي جاعداي ءجيى قايتالانسا، "پەرىشتەم قاقتى" دەپ ەسەپتەڭىز.

"ءيتتىڭ تۇسىنە سۇيەك كىرسە، ساۋداگەردىڭ تۇسىنە اقشا كىرەدى". ءتۇسىڭىز شىنايى ومىردە ورىندالىپ، قۋانىشقا كەنەلۋىڭىز، ياكي ورىندالماي ارماندا كەتۋىڭىز دە عاجاپ ەمەس. سول سەبەپتى شىنايى عۇمىر كەشەيىك!

ءتۇننىڭ تىنىشىن، ءتۇستىڭ دۇرىسىن بەرسىن!

 اراي جۇماتاي 

---