InfoHub Logo

اينۇر بايقارا — قازاقستان-بريتان تەحنيكالىق ۋنيۆەرسيتەتىن بىتىرگەن. قازىرگى ۋاقىتتا اقش-تا پيتتسبۋرگ ۋنيۆەرسيتەتىندە ماگيستراتۋرادا وقيدى. ماماندىعى IT سالاسى. اينۇر، شەتەلگە وقۋعا قالاي تۇسكەنىن جانە سول جاقتاعى وقۋى، ءومىرى جايلى ايتىپ بەردى.

حالىقارالىق كونفەرەنسيادا

مەكتەپتە وقىپ جۇرگەن كەزىمدە اكەم «مەنىڭ قىزىم امەريكادا وقيدى» دەپ ايتاتىن. اكەمنىڭ سول ءبىر اۋىز ءسوزى ويىمدا جاتتالىپ قالعان سياقتى. قبتۋ-عا اقپاراتتىق جۇيەلەر ماماندىعىنا تۇسكەن كەزدەن باستاپ، شەتەلدە وقۋ تۋرالى جاڭالىقتارعا كوز سالىپ، وقىپ ءجۇردىم. سونىمەن قاتار قبتۋ-داعى پروفەسسورلار اقش-تا بولىپ جاتقان تەحنولوگيالىق جاڭالىقتارمەن ءبولىسىپ تۇراتىن. سول كەزدە سول جاڭالىقتارعا قايران قالىپ، «دامىپ جاتقان تەحنولوگيالىق جاڭالىقتار نە دەگەن كەرەمەت، سولاردى دامىتىپ جاتقان عالىمدارعا جاقىن بولسام عوي» دەپ ويلايتىنمىن. سودان ءۇشىنشى كۋرستىڭ سوڭىنا قاراي شەتەلدە وقىسام دەگەن ويىمدى جۇزەگە اسىرۋدا ناقتى قادامدار جاساي باستادىم. الدىمەن كوپتەگەن ۋنيۆەرسيتەتتەردىڭ باعدارلامالارىن، ستۋدەنتتەرگە قانداي مۇمكىندىكتەر بەرەتىندىگىن، قاي جەردە ورنالاسقاندىعى تۋرالى اقپاراتتارمەن تانىستىم. سودان كەيىن «بولاشاق» باعدارلاماسىنا قۇجاتتارىمدى جينادىم. (شەتەلدە وقۋدىڭ باعاسى وتە قىمبات. سوندىقتان «بولاشاق» سياقتى باعدارلامالاردان كومەك قاجەت) مەن اعىلشىن ءتىلى، قازاق ءتىلى، پسيحولوگيالىق تەست جانە ينتەرۆيۋ كەزەڭدەرىنەن سۇرىنبەي ءوتىپ، ستيپەنديا يەگەرى اتاندىم. اعىلشىن ءتىلىن جەتكىلىكتى دارەجەدە بىلەتىنىمدى IELTS تەستى ارقىلى دالەلدەپ، وقىعىم كەلەتىن بىرنەشە ۋنيۆەرسيتەتتەرگە قۇجاتتارىمدى وتكىزدىم

University of Pittisburgh قالاي ءتۇستىم؟

اقش ۋنيۆەرسيتەتتەرىنە ءتۇسۋ ءۇشىن تاپسىراتىن قۇجاتتارعا توقتالسام. ءبىرىنشى مىندەتتى تۇردە انىقتاما (انكەتا) تولتىراسىز. ەكىنشى ءار ۋنيۆەرسيتەتتىڭ وزىندىك تالاپتارى (requirements) بار. ادەتتە اعىلشىن ءتىلىن جەتىك بىلەتىنىڭىز تۋرالى IELTS تەستىنەن وزگە قوسىمشا GRE، GMATH تەستتەر بار. مەنىڭ ماماندىعىم IT بولعاندىقتان GRE تەستىن تاپسىردىم. ءۇشىنشى شەتەلدىك ستۋدەنت بولعاندىقتان ولار اعىلشىن ءتىلىن ءبىلۋ دەڭگەيىنە دە نازار اۋدارادى. تىلگە بايلانىستى ءار ۋنيۆەرسيتەتتىڭ سۇرانىسى ءارتۇرلى. ەگەر IELTS تاپسىرساڭىز، باكالاۆيراتقا IELTS 5.5-6.5 بولسا، ال ماگيستراتۋرا مەن دوكتورانتۋراعا IELTS ناتيجەسى 7.0 جوعارۋ بولۋى كەرەك. دەگەنمەن تىلگە بايلانىستى اتاپ وتكەن تالاپتار ۇزىلدى-كەسىلدى ەمەس. مىسالى IELTS بىرنەشە رەت تاپسىرىپ قاجەتتى باللدى بەلگىلى ءبىر سەبەپتەرمەن الا المايتىن بولساڭىز، كوميسسياعا تۇسىنىكتەمە جازساڭىز بولادى. جاقسى جازا الاتىنىڭىزدى كورسەتسەڭىز، وقۋعا ءتۇسىپ كەتە الاسىز. ءتورتىنشى ۋنيۆەرسيتەتتەرگە تاپسىراتىن قۇجاتتاردىڭ اراسىنداعى ەڭ ماڭىزدى قۇجاتتىڭ ءبىرى ول — موتيۆاسيالىق حات (personal statement). بۇل قۇجات ارقىلى كوميسسيا مۇشەلەرى ستۋدەنتپەن جاقىنىراق تانىسادى. سوندىقتان موتيۆاسيالىق حاتتا جازعان ءاربىر ءسوز ماڭىزدى. ءار ۋنيۆەرسيتەتتى تاڭداۋ سەبەبىم ءارتۇرلى بولعاندىقتان بىرنەشە موتيۆاسيالىق حات جازدىم. سولاردىڭ بارلىعىن تاپسىرىپ بولعاننان كەيىن كوميسسيا شەشىمىن كۇتتىم. كوميسسيا ءسىزدى تاڭداسا، شاقىرتۋ جىبەرەدى. شاقىرتۋ العان سوڭ «بولاشاق» باعدارلاماسى ءوز كومەگىن كورسەتىپ، ماگيستراتۋراعا كەتەتىن شىعىندى قارجىلاندىرادى.  

مەن ءتورت ۋنيۆەرسيتەتكە تاپسىرىپ، ەكەۋىنەن شاقىرتۋ الدىم. سولاردىڭ اراسىنان Univەrsity of Pittsburgh تاڭدادىم. ءدال وسى ۋنيۆەرسيتەتتى تاڭداۋ سەبەبىم، ماگيستراتۋراداعى وقۋ باعدارلاماسى ستۋدەنتكە ىڭعايلى قۇراستىرىلعان. قالاي ىڭعايلى دەگەندە، ساباق كەستەسىندە پاندەردى ءوزىڭ تاڭداۋعا مۇمكىندىك بەرەدى. كەيبىر جوعارى وقۋ ورىندارىنىڭ باعدارلامالارى ۇنامادى، سەبەبى ولاردىڭ باعدارلامالارى تەك ءبىر باعىتپەن جۇرەدى دە، وقۋ باعدارلاماسىنداعى پاندەردى اۋىستىرۋعا ستۋدەنتكە مۇمكىندىك بەرمەيدى. ال University of Pittsburgh ماعان ەركىندىك بەرگەندىكتەن وسى ۋنيۆەرسيتەتتى تاڭدادىم. ۋنيۆەرسيتەتتەردى تاڭداعان كەزدە وقۋ باعدارلامالارىنا (curriculum) كوپ كوڭىل ءبولۋ قاجەت. سەبەبى مۇنداي وقۋ باعدارلامالارى بولاشاق ماماندىعىنا دەن قويعىسى كەلگەن ستۋدەنتتەرگە ارنالعان دەپ ويلايمىن. مەن ماگيستراتۋراعا تاپسىرار كەزدە اقپاراتتىق جۇيەلەردىڭ قاي باعىتىندا جۇمىس جاساعىم كەلەتىندىگى جايلى ناقتى شەشىم قابىلداماعان ەدىم. اقپاراتتىق جۇيەنىڭ ىشىندە بىرنەشە سالالارى بار: جاساندى ينتەللەكت (Artificial Intelligence)، دەرەكتەردى تالداۋ (Data Analyis)، اقپاراتتىڭ جۇيەلەردىڭ قاۋىپسىزدىگى (Information Systems Security)، ماشينالاردى وقىتۋ (Machine Learning) جانە ت.ب. ماگيستراتۋرادا سول سالالاردىڭ بىرەۋ نەمەسە ەكەۋىن تەرەڭدەتىپ وقىتادى. پيتتسبۋرگ ۋنيۆەرسيتەتىنىڭ وقۋ باعدارلاماسى ماعان بولاشاقتاعى ارنايى سالامدى تاڭداۋعا سەپتىگىن تيگىزدى.  

شەتەلدەگى وقۋ مەن ءومىر

University of Pittsburgh اقش-تىڭ پەنسيلۆانيا شتاتىنداعى پيتتسبۋرگ قالاسىندا ورنالاسقان. ۋنيۆەرسيتەت 1787 جىلى نەگىزى قالانعان. باكالاۆر، ماگيستراتۋرا جانە دوكتورانتۋرا ستۋدەنتتەرىن قوسقاندا 28 مىڭعا جۋىق شاكىرت ءبىلىم الادى. ۋنيۆەرسيتەت قۇرامىندا 17 كوللەدج بەن فاكۋلتەت كىرەدى. University of Pittsburgh مەديسينالىق زەرتتەۋلەر بويىنشا اتى شىققان. بۇل ۋنيۆەرسيتەتتى public school دەيدى. وسى شتات ۇكىمەتىنىڭ قارجىلاندىراتىن وقۋ ورنى. جەكەمەنشىك ەمەس. سوندىقتان وتە ۇلكەن. مەن پيتتسبۋرگ ۋنيۆەرسيتەتىندە ماگيستراتۋرانى باستاماس بۇرىن، فيلادەلفياداعى پەنسيلۆانيا ۋنيۆەرسيتەتىندە (University of Pennsylvania) جارتى جىل اعىلشىن ءتىلى كۋرسىن وقىدىم. ەكى ۋنيۆەرسيتەتتى سالىستىرسام، ماعان University of Pittsburgh ۇنايدى. سەبەبى وسى جەردە ستۋدەنتتەرگە وقۋعا بارلىق جاعداي جاسالىنعان.

شاعىن جوبا جاساۋ ۇستىندە

ۋنيۆەرسيتەتتەگى پروفەسسورلارىم اشىق، ءبىلىمدى ءارى جاقسى ادامدار. وسى جەردەگى وقىتۋشىلارىمنىڭ كوبىسى ستۋدەنتتەردىڭ بەلسەندى بولعانىن جانە كوپ سۇراق قويعانىن قالايدى. مەن ەڭ العاش كەلگەن كەزدەردە كوپ ساۋال سۇراعاننان كىشكەنە ىڭعايسىزداناتىنمىن. «اقىماق بولىپ كورىنگىم كەلمەيدى» دەپ كوپ سۇراق قويمايتىنمىن. ءبىراق پروفەسسورلار «ەشتەڭە ەتپەيدى، سۇراڭدار» دەيدى. وسى جەردە ءبىر پروفەسسوردىڭ ءسوزىن ايتقىم كەلىپ وتىر. ول «سۇراق قويىندار. بەلگىلى ءبىر كونسەپتتەردى تۇسىنبەسەڭدەر مىندەتتى تۇردە سۇراڭدار، ال كونسەپتتەردىڭ بارلىعىن تۇسىنسەڭىزدەر، مەنىڭ ورنىما تۇرىپ ساباق بەرۋلەرىڭ كەرەك» دەپ ايتقان بولاتىن. سول سەبەپتى مەن ساباقتا وتە بەلسەندى بولۋعا تىرىسامىن. سۇراقتىڭ ساپاسىنا قاراماي تۇسىنبەگەن كەزدە مىندەتتى تۇردە سۇرايمىن. اقىماق بولىپ كورىنىپ قالامىن-اۋ دەپ قورىقپايمىن. (كۇلدى)

ۋنيۆەرسيتەتتىڭ ستۋدەنتتەرگە بەرەتىن بارلىق مۇمكىنشىلىكتەرىن قولدانۋعا تىرىسامىن. جاقىندا وقۋ ورنىمنىڭ دەمەۋشىلىك جاساۋىمەن حيۋستونداعى كونفەرەنسياعا قاتىستىم. (Grace Hopper Celebration 2018). كونفەرەنسيادا ءوز سالامنىڭ مىقتى ماماندارىمەن تانىستىمەن.

مەن العاش كەلگەندە وقۋ جاعىنان ونشا قينالعان جوقپىن. ءبىرىنشى سەمەستردى باستاعان كەزدە باعدارلاما مەن وقۋ جۇيەسى جايلى اسا ۇلكەن قيىندىقتارعا جولىقپادىم. بۇل جاعىنان ماعان قبتۋ-دا العان ءبىلىمىم كوپ كومەكتەستى. ساباقتاردان قينالىپ جاتسام، پروفەسسوردىڭ، دوكتورانتتاردىڭ نەمەسە بىرگە وقيتىن ستۋدەنتتەردىڭ كومەگىنە جۇگىنەمىن. جالپى وقىعىسى كەلگەن ادامعا كوپتەگەن ەسىكتەر اشىق دەپ ويلايمىن. ال ءومىر ءسۇرۋ جاعىنان ايتسام، اقش-تىڭ ءار شتاتى ءارتۇرلى. سوندىقتان ءار شتاتتاعى ستۋدەنتتەر ءارتۇرلى جاۋاپ بەرۋى مۇمكىن. مۇندا كەلگەندە تۇراتىن جەر تابۋ قيىن بولدى. سەبەبى ماگيستراتۋرا ستۋدەنتتەرىنە جاتاقحانا بەرىلمەيدى، بەرگەن كۇننىڭ وزىندە ول ۇزاق پروسەسس. وعان ۇلگەرمەي قالدىم. ال پاتەردى قاي سايتان ىزدەۋ كەرەك، ول جاعىن مۇلدە بىلمەدىم. ماعان سول جاعى قيىن بولدى. ءقازىر پيتتسبۋرگ قالاسىندا ۋنيۆەرسيتەتىم ماڭىندا پاتەر جالداپ تۇرامىن. باسىندا باعالاردىڭ ءبارىن تەڭگەگە اۋداراتىنمىن. ماعان تىم قىمبات بولىپ كورىندى. كەيىن بىرتىندەپ ۇيرەندىم. پيتتسبۋرگ اسا قىمبات قالا ەمەس. ورتاشا. قىمبات قالا دەپ نيۋ-يوركتى ايتار ەدىم.

ۋنيۆەرسيتەتتىڭ كىتاپحاناسى

ءبىر كۇنى قالاي وتەدى؟

ءبىر كۇنىمدى سيپاتتاۋ قيىن. ءار كۇنىم ءارتۇرلى وتەدى. ورتا ەسەپكە كەلتىرەتىن بولسام، ءبىر كۇنىم تومەندەگىدەي بولادى. تاڭەرتەڭ جۇمىسقا (كىتاپحانادا جۇمىس ىستەيمىن) كەتەمىن، سودان كەيىن ساباققا بارامىن. كىتاپحاناداعى جۇمىس 2-3 ساعاتتان كەيىن بىتەدى، سوندا دا كىتاپحانادا قالىپ، ساباعىمدى قارايمىن. ساباق كەيدە تۇستە، كەيدە كەشتە بولادى. سونىڭ اراسىندا تاماق ءىشىپ، تاپسىرمالاردى جاساپ ۇلگىرۋ قاجەت. كەستەم تىعىز بولعاندىقتان ءبىر كۇندىك تاماعىمدى الدىن الا جاساپ، ۋنيۆەرسيتەتكە وزىممەن بىرگە الىپ كەلەمىن. ساباق بىتكەننەن كەيىن، سپورتزالعا بارىپ، جۇزەمىن نەمەسە جۇگىرەمىن. دەنەمدى جاتتىقتىرىپ بولعاننان كەيىن قايتادان كىتاپحاناعا ورالىپ، ءۇي تاپسىرمالارىن ورىندايمىن. سونداي-اق ستۋدەنتتىك ۇيىمنىڭ پرەزيدەنتىمىن. ۇيىمعا بايلانىستى تىرلىكتەردى ساباق اراسىندا جاساپ ۇلگەرۋگە تىرىسامىن. ونىڭ ۇستىنە ۋنيۆەرسيتەتتەگى لابوراتورياعا بارىپ، پروفەسسورلارعا تاجىريبە جاساۋ كەزىندە كومەكتەسەمىن. سولاي ۇيگە ياعني پاتەرىمە كەش باتقاندا كەلەمىن. دۇيسەنبىدەن جۇماعا دەيىنگى كۇندەرىم وسىلاي بولادى. ال دەمالىس كۇندەرى تەك قانا دەمالۋدى ءجون كورەمىن.

ستۋدەنتتىك ۇيىم

ستۋدەتتىك ۇيىمنىڭ اتى Data Dojo. 2017 جىلى قۇرىلعان. مەن سايلاۋدان كەيىن 2018 جىلدان باستاپ ءبىر جىلعا ۇيىمنىڭ پرەزيدەنتى بولىپ تاعايىندالدىم. مەنىڭ ۇيىمىم مەكتەپتىڭ باستى ۇيىمىنا (SCIGSO) باعىنادى. مەكتەپ دەگەن سەبەبىم، ۋنيۆەرسيتەت بىرنەشە مەكتەپتەردەن قۇرالعان. مەنىڭ مەكتەبىمنىڭ اتى School of Computing and Information. سونداي-اق وسى سەمەستردەن باستاپ مەكتەپتىڭ ەڭ باستى ۇيىمىنىڭ ۋاقىتشا پرەزيدەنتى بولدىم. مەنى مەكتەبىمدەگى ستۋدەنتتىك شارالارعا جاۋاپ بەرەتىن مامان تاعايىندادى. ۋاقىتشا بولعان سەبەبى، مەكتەپتىڭ ەڭ باستى ۇيىمىنىڭ جۇمىسىن قايتا جاڭارتۋ ماڭىزدى بولدى. سوندىقتان مەن جانە باسقا ەكى ۇيىمنىڭ پرەزيدەنتتەرىمەن قوسىلىپ ۇيىمدى ورنىنا كەلتىرۋدەمىز. باستى ماقساتىمىز ۇيىمنىڭ باسىن بىرىكتىرۋ، كەلەسى جىلعا جاڭا ۇمىتكەرلەر ىزدەۋ، كونستيتۋسيا جازۋ دەگەن سياقتى جۇمىستاردى اتقارىپ جاتىرمىز. ودان بولەك ستۋدەنتتىك ۇيىمنىڭ پرەزيدەنتى رەتىندە ستۋدەنتتەرگە ءارتۇرلى سەمينارلار ۇيىمداستىرامىز. كەيدە ۋنيۆەرسيتەتتەگى ساباقتاردا ۇيرەتپەيتىن داعدىلار (skills) بار. سەبەبى IT سالاسىنداعى تەحنولوگيالىق قۇرالدار تەز اۋىسىپ تۇرادى. ايتالىق، ينتەرنەت پاراقشاسىن جاسايتىن بىرنەشە قۇرىلىمدار (frameworks) جىل سايىن جاڭارىپ تۇرادى. سول اعىممەن ۇلگەرۋ ماقساتىندا ءبىزدىڭ ۇيىم يندۋسترياداعى ءوز ءىسىنىڭ مىقتى ماماندارىن شاقىرىپ، ستۋدەنتتەرگە ارناپ سەمينارلار جاساپ تۇرادى. وسى ناۋرىز ايىنىڭ ورتالارىنا قاراي API قولدانۋ ارقىلى اقپارات جيناپ سارالاۋ تۋرالى ءۇش ساعاتتىق سەمينار ۇيىمداستىرىپ جاتىرمىز.

 

ستۋدەنتتىك ۇيىمنىڭ بەلسەندى قاتىسۋشىلارىمەن بىرگە

ستۋدەنت ستاتۋسىنا قانداي جەڭىلدىكتەر بار؟

ۋنيۆەرسيتەتتە ستۋدەنتتەرگە وتە جاقسى جاعداي جاسالىنعان. كىتاپحانا دۇيسەنبى مەن بەيسەنبى ارالىعىندا 24 ساعات جۇمىس جاسايدى. وقۋ ورنىمدا ءتورت جاتتىعۋ (ترەناجەر) زالى، ەكى ءجۇزۋ باسسەينى بار، تەگىن قىزمەت كورسەتەدى. قالالىق اۆتوبۋستار مەن ۋنيۆەرسيتەتتىڭ ءوز اۆتوبۋستارى ستۋدەنتتەرگە تەگىن. تەاترلار ستۋدەتتەرگە جەڭىلدىكتەر جاسايدى. كەز كەلگەن دۇكەنگە نەمەسە قانداي دا ءبىر جەرگە بارعاندا ستۋدەتتىك كارتاڭىزدى كورسەتسەڭىز، 10-20% جەڭىلدىك بەرەدى. ءبىراق بۇل جەڭىلدىك بارلىق ۋنيۆەرسيتەتتەرگە ءتان دەگەن ءسوز ەمەس. ءار ۋنيۆەرسيتەتتىڭ ستۋدەنتتەرگە بەرەتىن مۇمكىنشىلىكتەرى ءارتۇرلى. مەن پيتتسبۋرگ قالاسىنا دەيىن فيلادەلفيادا تۇرىپ جارتى جىل اعىلشىن كۋرسىن وقىدىم دەپ جوعارىدا ايتتىم عوي. وندا تەك كىتاپحانادا عانا جەڭىلدىكتەر بولدى. ال پيتتسبۋرگ قالاسىندا ستۋدەنتتەرگە وتە كوپ مۇمكىنشىلىكتەر بار. وسى جاعى وزىمە قاتتى ۇنايدى. بۇل جەردى ستۋدەنتتەرگە ارنالعان قالا دەپ تە ايتسام بولادى.

شەتەلدىكتەردىڭ قازاقستان جايلى پىكىرى

جۇرگەن جەرىمدە قازاقستان تۋرالى اقپاراتتاردى تاراتىپ جۇرەمىن. قازاقستان جايلى بىلەتىن دە بىلمەيتىن دە ادامدار بار. بىلسە، قازاقستان تۋرالى كوبىرەك اقپارات بەرۋگە تىرىسامىن، بىلمەسە كارتانى اشىپ كورسەتەمىن. كوبىسى جەرىمىزدىڭ اۋدانىنىڭ ۇلكەندىگىنە تاڭ قالادى. وسىعان قاراپ كەيدە گەوگرافيانى ءبىزدىڭ ەلدە عانا جاقسى ۇيرەتەدى مە دەگەن وي كەلەدى. مەنىڭ ۋنيۆەرسيتەتىمدەگى پروفەسسورلار قازاقستان تۋرالى جاقسى بىلەدى. ولار كوپتەگەن جوبالارعا قاتىسىپ قازاقستانعا ىس-ساپارمەن بارعان. جاقىندا ۋنيۆەرسيتەتتەگى ءبىر پروفەسسور استاناعا بارىپ كەلدى. ول ەلوردانىڭ سۋىعىنا عانا شاعىمداندى، ال قالعانىنىن بارلىعى ۇناعان.

نيۋ-يوركتاعى Top of the Rock عيماراتىنىڭ ەڭ جوعارى قاباتىندا

Data Center اشقىم كەلەدى

قازاقستاندا «بولاشاق» سياقتى باعدارلامانىڭ بولعانى ءۇشىن وتە قۋانىشتىمىن ءارى العىسىم شەكسىز. سەبەبى وسىنداي مۇمكىندىكتەر كوپتەگەن ەلدەردە جوق. وسى باعدارلامانىڭ كومەگىمەن مۇحيت اسىپ وزگە ەلدە ماگيستراتۋرادا وقۋعا مۇمكىندىك الدىم. الداعى ۋاقىتتا امەريكادا العان ءبىلىمىمنىڭ قازاقستاندا قولدانىسىن تاپقانىن قالايمىن. ءبىلىم سالاسىنا قىزىعۋشىلىعىم زور. ەلگە ورالعان سوڭ اقپاراتتاردى ەلەكتروندى تۇرگە كەلتىرىپ اناليز جاسايتىن Data Center اشقىم كەلەدى. بۇل ورتالىق تەك قانا اناليز جاساپ قويماي سول تاريحي اقپاراتپەن بولاشاقتا بولجامدار جاسايدى. قازىرگى ۋاقىتتا اقش-تا وسى سالا وتە قارقىندى دامىپ جاتىر. مەن قازاقستاننىڭ سول اعىمنان قالماي العا قاراي دامىعانىن قالايمىن!

Just do it!

شەتەلدە وقىعىسى كەلگەن جاستارعا ايتاتىنىم، ارمانىڭ ورىندالعانىن قالاساڭ، «Just do it» كەيدە وزىڭە قاجەت اقپاراتتى تابۋ قيىنعا سوعۋى مۇمكىن. ءبىراق سوعان قاراماستان، ىزدەنۋدى توقتاتپاۋ كەرەك. مەنىڭ سەنىمىم بويىنشا تالپىنعان ادام ءوز ماقساتىنا جەتەدى.

قانيا تابىس

 

وقۋعا كەڭەس بەرەمىز:

گونكونگتاعى وقۋى مەن ءومىرى، ونداعى قيىندىقتارى جايلى قازاق جىگىتىنىڭ اڭگىمەسى

شەتەلدە ءبىلىم الۋ: University of Strathclyde

شەتەلدە وقۋدىڭ ارتىقشىلىقتارى

---