انەكدوتشىل كۇيەۋلەر
- نە انەكدوت؟! نە انەكدوت؟!
- اۋ، ايتايىق تا اۋەلى.
- ال، ايتشى ارماندا قالماي!
- ءبىر كۇنى برەجنيەۆ وليمپيادانى اشىپ جاتقان عوي. سودان ءسوزىن باستاپ جاتىپ "و" دەيدى. جۇرت دۋ قول شاپالاقتايدى. ەكىنشى رەت تاعى دا "و" دەيدى. جۇرت تاعى دا دۋ قول شاپالاقتايدى. ءۇشىنشى رەت "و" دەگەندە، جۇرت تىم-تىرىس. سول كەزدە كومەكشىلەرىنىڭ ءبىرى جۇگىرىپ كەلىپ: "لەونيد يليچ، ءسىزدىڭ وقيتىن تەكستىڭىز تومەنگى جاعىندا. ءسىز وليمپيادانىڭ ەمبلەماسىن وقىپ تۇرسىز"، - دەپتى.
ءبىراق قالدىگۇل ناعي ايتقان بۇل انەكدوتقا كۇلگەن جوق.
- قۇداي، سول مازاق قىلعانىڭ مەن بولسىن! - دەدى.
- نە، سەن برەجنيەۆ پە ەدىڭ؟
- سول مەنىڭ وقىماعاندىعىمدى بەتىمە باسىپ وتىرسىڭ عوي. سەن وقىدىڭ عوي، ال! وقىعاندا، بىردەڭە ءبىتىرىپ جاتسىڭ با؟!
- سەنى بىرەۋ وقىماعان دەپ جاتىر ما؟
- قۇداي، ءوزى ءبىزدىڭ ءۇيدىڭ قىزدارىنىڭ باقىتىن اشپاي قويعان عوي ءبىراق. ساپاگۇلدىڭ دە، تازاگۇلدىڭ دە. ساپابەكتىكى نە دەسەيشى، بولماسا، وڭكيىپ الىپ. كۇيەۋدىڭ ۇلكەنىمىن دەپ تۇرعان ول جوق. قيت ەتسە، برەجنيەۆ جايلى انەكدوت ايتادى. قايتا ءبىزدىڭ ءۇيدىڭ قىزدارىنىڭ ىشىندە وقىعانى ساپاگۇل شىعار. ساپاگۇلگە نە دەپ كىنا تاعادى؟ اكەم دەگەن قانداي قىلىپ وقىتتى ساپاگۇلدى. سونى ءبىلىپ وتىرعان ساپابەك بار ما؟!
- ساپابەككە نە بوپتى؟ - دەدى ناعي. - ساپابەك - اقكوڭىل، ءازىلقوي جىگىت.
- ءيا، قويشى! نارتايدىكى نە دەسەيشى، ال؟ كۇيەۋدىڭ كىشىسىمىن دەپ تۇرعان ول بار ما؟
- نارتايعا نە بولدى؟
- وتكەندە مامامنىڭ ۇيىنە ءىشىپ بارىپتى. اشەيىندە ساۋ كەزىندە بارمايتىن ەدى سول ۇيگە! وتكەندە مامام دەگەن جارتى قاپ ۇندى كوتەرىپ قالامىن دەپ، بەلى كىلت ەتە قالىپتى. سول ۇندى قويىپ بەرەتىن بالا سول! زىڭگىتتەي نەمە، قايىرى جوق!
- اۋ، ايتسا، قويىپ بەرەدى عوي.
- نەسىن قويىپ بەرەدى ەندى، كىلت ەتەتىن جەرى كىلت ەتىپ بولعاسىن؟! ەندى كەتە قوياتىن شىعار دەسە... جوق! كەتۋدىڭ ورنىنا... مامامنىڭ جانىنا جايعاسىپ وتىرىپ الىپ... قۇداي، توبەڭدى كورمە، نارتاي! ءوي، انا سىيلاپ كورمەگەن نەمە!
- اۋ، نە ىستەگەن سونشاما؟
- نە ىستەيتىن ەدى؟ انەكدوت ايتقان دا!
- نە انەكدوت ايتقان سونداي-اق؟
- نە انەكدوت ايتاتىن ەدى؟ نارتايدان ءبىر ءجونى ءتۇزۋ ءسوز شىعاتىن با ەدى؟ برەجنيەۆ جايلى ايتادى دا. ونى ەستىپ مامامنىڭ تۇنىمەن جۇرەگى اۋىرىپ شىققان. ءوزى جۇرەگى اۋىراتىن كىسى.
- تۇك تۇسىنسەم بۇيىرماسىن! - دەدى ناعي. - ول كىسىنىڭ برەجنيەۆ جايلى انەكدوتقا نەمەنەگە جۇرەگى اۋىرادى؟
- سونى ءبىر نارتاي ءجونى ءتۇزۋ ويمەن ايتىپ وتىر دەيسىڭ بە؟ سەن دە سول قۇساپ قارتايعانسىڭ، الجىدىڭ دەپ وتىرعان جوق پا وڭباعان نارتاي.
- ءوي، قويشى، سەن دە!..
- نە، قويشى! سەندەرگە سالسا، بىر-بىرلەرىڭدى جاقتاپ شىعا كەلەسىڭدەر. ونى ەستىپ ساپاگۇل جىلاپ. "كوگەرمەگىر نارتاي، تازاگۇلگە ايتقان انەكدوتتارى از بولعانداي، ەندى ىلاڭىن مامامنىڭ ۇيىنە بارىپ سالايىن دەگەن بە؟" دەپ. ول تازاگۇلگە زۆانداپ. ودان تازاگۇل جىلاپ. ول نارتايمەن ۇرسىسىپ. ايتەۋىر، سول كۇنى تازاگۇلدىڭ ۇيىندە ۇلكەن ءبىر ۇرىس بولعان. نارتايدىكى نە دەسەيشى وسى؟! تازاگۇلدى العانشا قانداي بولىپ ءجۇردى، بولماسا. سول تازاگۇلدى العاسىن شىعار قايتا باقىتى اشىلىپ وتىرعانى. نارتايدى كورسەم، يت تەرىسىن باسىنا قاپتايىن دەپ ەدىم. "سەن كىمدى باسىناسىڭ وسى؟ ادامى جوق ءۇي دەپ وتىرسىڭ با؟ ىزدەسە، تابىلادى ادام. كۇيەۋسىڭ بە، ءجونىڭدى ءبىل، شىراعىم! پايداڭدى تيگىزبەسەڭ دە، زيانىڭدى تيگىزبەي ءجۇر جۇرتقا!"
باسىم-اي! باسىم! ەكى شەكەم سولقىلداپ كەتەدى وسى، سويلەسەم.
- سولقىلداماي نەعىلادى، سويلەي بەرسەڭ؟
- سويلەيىن دەپ، سويلەپ وتىر دەيسىڭ بە؟! سەن سويلەتىپ وتىرعان جوقسىڭ با ادامدى؟!
سەن قىزعا بار دەپ وتىرمىن انا جاققا! بار دەپ وتىرمىن انا جاققا! نەگە ساباعىڭدى وقىمايسىڭ؟! مەنىڭ اۋزىما قاراپ اڭگىمە تىڭداپ وتىرا بەرگەنشە! جيناشى مىنا جەردى! سوسىن ساباعىڭدى وقى! الىپ كەت انا بالانى قاسىڭا! كىتاپ پا، داپتەر مە، بىردەڭە بەرىپ الداندىرىپ قوي. وسى تەلەفون قايدا؟ تازاگۇلگە زۆانداپ جىبەرەيىن. ءاي، قىز، تەلەفون قايدا دەيمىن ساعان؟! نە مەلشيىپ تۇر مىنا قىز؟! وسى قىز وسكەن سايىن جامان بولىپ بارا جاتىر ءبىراق! بار، قاراشى انا بولمەنى! ۇستەلدىڭ ۇستىندە قالدى ما ەكەن؟! اكەل بەرى!
- ال سويلەسىپ الىڭدار، - دەدى ناعي. - مەن انا بولمەگە شىعا تۇرايىن.
مىنا بولمەدەن قالدىگۇلدىڭ سىڭقىلداي كۇلگەن داۋسى ەستىلدى:
- ءالو! قالايسىڭدار؟ ءوي، قۇرىسىن! ەكى شەكەم سولق-سولق ەتىپ... نە بولاتىن ەدى؟ سول بايدىڭ مىرىڭى دا! قۇداي، ءوزى ءبىزدىڭ ءۇيدىڭ قىزدارىنىڭ باقىتى اشىلماي قويعان عوي. جۇرتتىڭ ءۇيىنىڭ قىزدارىنىڭ باقىتى گۇل-گۇل جايناپ اشىلا قالادى. ءيا... سول... تاعى دا انەكدوت... برەجنيەۆ تۋرالى.
You Might Also Like
-
ۇلكەن جەتىستىكتەر ءتارتىپ پەن كۇش جىگەردى تالاپ ەتەدى. ولارسىز ءبىزدىڭ ءار تالپىنىسىمىز ەموسيالار، جاعدايلار مەن وزگە ادامداردىڭ ىقپالىنا ۇرىنادى. بۇل جاعدايدان جالىقتىڭىز با؟ ۇسىنىپ وتىرعان كەڭەستەرى...
