InfoHub Logo

اڭلاماس قۇسبەگى، اڭشىلىق، بالىقشىلىعىمەن اتاعى سىر بويى مەن قىر وڭىرىنە كەڭىنەن تاراعان. بىردە قىر ەلىنىڭ ءبىر اتاقتى بايى اڭلاماستىڭ اتاعىن ەسىتىپ، ونى سىناماققا قاسىنا بىرنەشە قوسشىلارى مەن شەشەن-بيلەرىن ەرتىپ سىر بويىنا كەلىپتى دەيدى. ول كەزدە سىرداريا وزەنىنىڭ ەكى بەتى جايىلعان سۋ، قالىڭ نۋ قامىس، توعايى تولعان اڭ بولعان كورىنەدى. قازىرگى تەرەڭوزەك اۋدانىنىڭ «تەرەڭوزەك»، «شىركەيلى» جانە «يليچ» اتىنداعى سوۆحوزدارىنا ارنالعان ءوڭىر تۇتاسقان كول — «دالاكول»، «كۇمىسكول» ت.س.س. بولىپتى.

باي كەلگەندە اڭلاماس ءبىر توپ تۋىستارىمەن سول كولدەر جاعاسىن جايلاپ وتىرعان ەكەن. باي:

— اڭلاماس، سەنىڭ بالىقشىلىق اتاعىڭ سىردان اسىپ قىرعا جەتتى. قاي بالىق قاي جەردە جايىلاتىنىن ءدال بىلەدى دەيدى. سەنىڭ وسى ءىسىڭنىڭ راستىعىنا كوز جەتكىزە كەلدىك. بىزگە ءبىر شاباق ۇستاپ بەر، — دەپتى.

باي اڭلاماس ۇستاپ بەرگەن شاباققا قولىنداعى التىن جۇزىگىن كيگىزىپ، قولىنان كولگە جىبەرىپ:

— اڭلاماس، كەلەر جىلى وسى ۋاقىتتا كەلەمىز، سوندا وسى بالىقتى ۇستاپ بەرەسىڭ، — دەپ ءجۇرىپ كەتەدى.

ايتقانىنداي، باي كەلەسى جىلى وسىنداي ۋاقىتتا كەلىپ:

— ۋادەلى ۋاقىتتا كەلىپ تۇرمىز، ءبىزدىڭ بىلتىرعى بالىعىمىزدى تاۋىپ بەر، — دەپتى.

اڭلاماس سالعا ءمىنىپ، قولىنا بالىق ۇستايتىن قۇرالدارىن الىپ كولگە ءتۇسىپ، ءبىراز ۋاقىتتان كەيىن ۇزىندىعى مەترگە جۋىق ءبىر بالىقتى ۇستاپ اكەلىپ:

— بايەكە، مىناۋ ءسىزدىڭ بىلتىرعى شاباعىڭىز، — دەپ الدىنا تاستاپتى.

باي وتكەن جىلعى قارىسقا تولار-تولماس شاباقتىڭ وسىنشالىقتى وسكەنىنە جانە سول شاباقتىڭ ءوزى ەكەنىنە سەنىمسىزدىك جاساپ، قالتاسىنان  پىشاعىن الىپ بالىقتى سويىپ كورسە، باياعى التىن جۇزىك ىشىنەن شىعىپتى. باي اڭلاماستىڭ ىسىنە ريزا بولىپ، كوپ سىي-سياپات بەرىپ، قوناق بولىپ ەلىنە قايتىپتى.

---