InfoHub Logo

اقان سەرى قۇلاگەرى ءولىپ، قايعىنىڭ قاماۋىندا كەلە جاتقان ۋاقىتىندا ءوز ەلىنىڭ حالقى تايلى-تاياعىمەن قىلىشپاي اۋلىنا كەلىپ توسقان ەكەن. حالقى كەلىپ، قىلىشپاي اۋىلىنا ءتۇسىپ، قوي سويدىرىپ، اس دايىنداتىپ وتىرعاندا، «اقان سەرى كەلىپ قالدى» دەگەن حابار ەسىتىلىپ، سوندا ەلىنىڭ يگى جاقسىلارى الدىنان شىعىپ، تاعام دايىندالىپ جاتقان ۇيگە اكەلىپ، كوڭىل ايتقان ەكەن.

سوندا ءۇي يەسى، ەل ادامى قىلىشپاي اقانعا بىلاي دەپ ءسوز باستاعان ەكەن:

—ۋا، اقانىم، سەنىڭ قۇلاگەرىڭنىڭ وسى جولى ولەتىن رەتى كەلدى. ويتكەنى سەن تويعا بارا جاتقاندا قاسيەتتى قىلىشپاي اۋىلىنا كەلىپ، ءدام تاتپاي كەتتىڭدەر، سىرتتان وتە باردىڭدار،—دەپ ءسوز باستاپتى.

قىلىشپايدىڭ تابالاعان ءسوزىن ەستىگەن اقان سەرى وتىرعان ورنىنان ۇشىپ تۇرەگەلىپ، قىلىشپايعا قاراپ:

—ەي، قىلىشپاي، دۇرىس ايتاسىڭ. ول زاماندا پايعامباردىڭ كۇيەۋى، اللانىڭ ارىستانى عازىرەت عالىنىڭ ءدۇلد ۇلى توپعا شاۋىپ، ورعا قۇلاپ ولگەن دەسەدى. ءدۇلدۇل دە ءسىزدىڭ ەلدەن ءدام تاتپاعان سوڭ ءولدى مە؟—دەگەن ەكەن.

سوندا كەكەتكەن قىلىشپاي اۋىزىنا قۇم قۇيىلعانداي ءۇن جوق، اقاننان توسىلىپ وتىرىپ قالعان ەكەن. ورتا جولدان وسىلاي قامىققان اقان سەرى قاپالانىپ، ەلىنە بارىپ، قولدان كەلگەن ءومىرىن جاساي بەردى دەپ ايتادى ۇلكەن ادامدار.

---