InfoHub Logo

تاراعايدىڭ ورتانشى ايەلى تاكينا قاتىن وسى تەمىرگە ەكىقابات بولعان كەزىندە ءتۇس كورەدى. تۇسىندە قىزىر عالي ءاسسالام اۋليەدەن بالا سۇرايدى. اۋليە وعان دەنەسى تاستان، جۇرەگى دۇنيەنىڭ ەڭ نازىك گۇلدەرىنەن جارالعان ۇل بەرەدى. ەمشەگىن جوندەپ ەمە الماعان بالاسىن اناسى قۇيرىعىنان سالىپ قالعاندا، تاستان جارالعان بالانىڭ دەنەسىنەن قولى قاتتى اۋىرىپ كەتىپ، اناسى جىلاپ قويا بەرەدى. اناسىنىڭ جىلاعانىن كورىپ، جۇرەگى نازىك گۇلدەردەن جارالعان بالاسى ەندى قوسىلىپ جىلايدى. اناسى مەن بالاسىنىڭ كوزىنەن جاسى اعىل-تەگىل توگىلەدى. «قالاي، بالاڭ ۇنايدى ما؟» — دەگەن قىزىر عالي ءاسسالام اۋليەگە تاكينا قاتىن: «ماعان مۇنداي جىلاۋىق بالانىڭ كەرەگى جوق، باسقا بالا بەر»، — دەپ جالىنادى. سوندا اۋليە وعان كەرىسىنشە دەنەسى گۇلدەي جۇمساق، جۇرەگى تاستاي باسقا بالا بەرەدى. بۇل دا اناسىنىڭ ەمشەگىن دۇرىستاپ ەمە المايدى. اناسى بۇنى دا ۇرادى. ءبىراق قانشا ۇرسا دا، بالانىڭ كوزىنەن جاس شىقپايدى. بالاسىنىڭ بۇل مىنەزىنە قۋانعان اناسى سىلقىلداپ كۇلىپ جاتىپ ويانىپ كەتەدى. ەرتەڭىنە تاكينا قاتىن ءتۇسىن ءبىر بىلگىر كارى كەمپىرگە جورىتادى. «تۇسىڭدە جىلاساڭ، وڭىڭدە قۋانارسىڭ، ال تۇسىڭدە قۋانساڭ، وڭىڭدە جىلارسىڭ. بەكەر العاشقى بالاعا كونبەگەن ەكەنسىڭ. سەنىڭ مىنا تۋعالى تۇرعان بالاڭنىڭ دەنەسى ەت پەن سۇيەكتەن بىتكەن جۇمساق بولعانمەن، جۇرەگى تاستان دا قاتتى كەلەدى ەكەن، ءتۇبى وزگەنى قويعاندا ءوزىڭدى دە تالاي جىلاتار»، — دەگەن ەكەن.

---