InfoHub Logo

كەرەي اتانىڭ كەلىنى ءايمي، كۇيەۋى ءولىپ، جەسىر قالعان سوڭ، توركىنىنە وتاۋىمەن كوشىپ بارىپ قونىستاسىپ قالادى. جەسىردى ەردەن كەتسە دە، ەلدەن كەتىرمەۋدى قاراستىرعان جەسىر يەلەرى بۇل جۇمىستى بەيسەنبىگە تاپسىرادى. سول زاماندا «قاسىم حاننىڭ قاسقا جولى»، «ەسىم حاننىڭ ەسكى جولى» جولى بويىنشا تۇل ايەلدىڭ ەر تاڭداۋ قۇقىعى بولادى ەكەن. كەڭەسكە قاتىسقان بيلەر ايميگە ەر تاڭداۋ قۇقىعىن بەرەدى. بيلەردى بارلاي قاراعان اسقاق سۇلۋ «كەرەيدە مەنى الاتىن جىگىت جوق» دەپ قارىسادى.

بيلەر كەڭەسى ايميگە: «سەن كەرەي جەسىرىسىڭ، كوزىڭ تۇسەر ەرىڭە، اياعىڭ جەتەر جەرىڭە توقتا، كەرەيدىڭ بىرىنەن اسساڭ دا، ون ەكى كەرەيدىڭ بىرىنە توقتايسىڭ» دەپ كەسىم جاسايدى. اقشا جۇزىندە نۇر ويناعان سۇلۋ ءايمي: «تۇل ايەلدىڭ ەر تاڭداۋ قۇقىعى وزىندە بولسا، وسى توپتاعى بيلەر قاۋىمىنا قۇلدىق ۇرايىن، كەرەي جەسىرى ەكەنىم راس، كەرەي ءبيى بەيسەنبىنى تاڭدادىم»، — دەپ قول قۋسىرىپ، باسىن يەدى. مىنا قويىلعان ورىنسىز تالاپ بەجەڭە وڭاي بولعان جوق. اباقتىڭ ءبىر جەسىرىن داۋعا ءتۇسىپ، اقىرىندا ءوزى السا، قانداي ادىلەت بولماق. بۇل ءىس بيلەر كەڭەسىنىڭ سارابىنا سالىنىپ، «تۇل ايەلدىڭ ەر تاڭداۋ قۇقىق زاڭى بويىنشا، ايەلدىڭ تالاپ-پىكىرى ورىندالۋى ءتيىستى»، — دەپ شەشىم جاسالدى. ءايميدىڭ تالابى ورىندالماسا، «بيلەر زاڭ بۇزدى» دەگەن حالىق نارازىلىعىنا قالار ەدى. وسىدان سوڭ بيلەردىڭ كەسىم جاساۋىمەن، جەسىر يەلەرىمەن اقىلعا كەلىپ، ءتيىستى قالىڭمال بوداۋىن تولەپ، بەجەڭ ءايميدى ايەل ۇستىنە الىپ، جار ەتتى.

ءايمي اقىل-پاراساتتى، ەل-جۇرتقا جاعىمدى، بەرەكەنىڭ ادامى بولدى. ءايمي ءوزىنىڭ زەردەلى، ۇنامدى ىس-ارەكەتى، اقجارقىن، مەيماندوس، ساۋىقشىل ونەرىمەن جۇرتقا دا، بەجەڭە دە ەرەكشە ۇنادى. ول ۇستاعان ءۇي تۇگەل تۇسەتىن، بەلدەۋىنەن ات كەتپەيتىن، بەيسەنبى ءبيدىڭ ارداقتى شاڭىراعىنا اينالدى. وسىنى كورە الماعان كۇندەسى قىزعانىش تۋدىردى. ءوزىنىڭ جاقىندارىن، ىرقىنا كونەتىن ادامدارىن ايميگە قاستاندىق جاساۋعا ايداپ سالدى. وسى قاتىگەز، قارانيەت قايشىلىق جاعدايىندا ءايمي سولاردىڭ قولىنان قازا تاپتى. بۇل كەزدە بەيسەنبى تاعى ءبىر سەز-
گە كەتكەن ەدى. ۇزاق جولدان ات سوعىپ، سۋىت كەلگەن بەجەڭ جار ولىمىنە قاتتى كۇيزەلدى. جۇرەگى ءتىلىنىپ، قابىرعاسى سوگىلدى. ەل-جۇرت، اقساقالدار اقىل-كەڭەس بەرمەسە، بەجەڭ دە قۇساعا بۋلىعىپ، تىرشىلىكتەن ۋاز كەشە جازدادى. وسى كۇيىكتى شەر «ارمان» اتتى كۇي بولىپ بىزگە جەتتى.

---