ارقان تارتۋ
نارتايلار ەندى وڭعا قاراي بۇرىلدى. ول جاقتا دا ەل توپ-توپ بوپ جينالىپ الىپتى. بۇل جولى ۇستىنەن تۇسكەنى «ارقان تارتۋ» ەكەن.
شەتكە كەلىپ تۇرعاندارى سول سايىس الدىنداعى باسقا ءبىر تارتىستىڭ كۋاسى بولدى. وزدەرىنەن ءسال عانا ۇلكەن بوزبالالار ەكىگە ءبولىنىپ، سايىستا جەڭىلىپ قالعانداردىڭ وزدەرىنىڭ «ايىپتارىن» قالاي جۋىپ-شاياتىندارىنا كەلىسە الماي، قىزىلكەڭىردەك بولىپ جاتىپتى.
— كوكپار بەرسىن! — دەدى ءبىر بالا جىگىت الدىمەن ۇسىنىس تاستاپ. — ءسىرا، ءوزى لاق تارتقاندى جاقسى كورەدى.
— جوق، بولمايدى، — دەدى تاعى ءبىر بالا جىگىت الدىعا شىعىپ.
— كوكپار دەگەن قۋانىشقا، جاقسىلىققا بەرىلەتىن نارسە، جەڭىلىپ قالعانعا قالاي بەرەدى؟ باسقا نارسەگە كەلىسەيىك.
— وعان تالاسىپ قايتەسىڭدەر؟ جەڭىپ شىققانداردىڭ جۇلدەسى ونسىز دا بار ەمەس پە؟ — دەپ ءسوز قوستى شەتتە تۇرعان ءبىر بالا.
— جوق، اڭگىمە جەڭگەندەر تۋرالى ەمەس. ونسىز دا جۇلدە بار عوي، ءبىراق، جەڭىلگەندەر سونىمەن جەڭىل قۇتىلىپ كەتسە بولمايدى. بىردەڭە ىستەۋ كەرەك… — دەدى وزدەرىنىڭ جەڭىپ شىعاتىنىنا اسا سەنىمدى العاشقى بالا.
— وزدەرىڭ جەڭىلىپ قالساڭدار، قايتەسىڭدەر؟ — دەدى تاعى ءبىر بالا ونى مۇقاتپاق بولىپ.
— كەلىسكەن شارتتى ورىندايمىز، — دەدى الگى جىگىت بىردەن كەسىپ.
— جاقسى. وندا كەلىسەيىك. كەشكە ءبارىمىزدى قوناق قىلسىن… قالاي قارايسىڭدار؟
— جوق، كەشكە ەمەس. كۇندىز بولسىن، تاۋعا شىعايىق…
— كەشكە ۇيىڭنەن شىعا المايتىن بولدىڭ عوي، ءا؟ — دەپ كۇلدى ءبىر بالا.
تۇرعاندار قوسىلا دۋ كۇلدى.
— كۇلكىنى قويا تۇرىڭدار. ۋاقىت كەتىپ بارادى، تەز كەلىسەيىك، — دەدى العاش ءسوز باستاعان بالا.
— سول… تاۋعا شىققان دۇرىس قوي دەيمىن، — دەدى تاعى ءبىر بالا.
— سەن دە تۇندە ۇيدەن شىعا المايتىن بىرەۋ بولدىڭ عوي… سولاي-اق بولسىن، — دەدى تاعى ءبىر بالا كۇلىپ.
— قولداۋعا تۇراتىن ۇسىنىس، — دەدى ءبىر بالا قولىن كوتەرىپ.
قالعاندار دا كوتەردى قولدارىن. كەيبىرى قالىس قالىپ جاتتى. سوڭعى ەسەپتە كەلىسىم جاسالدى.
— كەلىسىپ بولدىڭدار ما؟ — دەدى ءدال وسى كەزدە ورتاعا كىرگەن ءادىلقازى.
جىگىتتەردىڭ جاۋاپ بەرۋىن كۇتكەن جوق، ءوز شارۋاسىنا كىرىسىپ كەتتى.
— ويىن ەرەجەسىن وزدەرىڭ جاقسى بىلەسىڭدەر، — دەدى ول جان-جاعىنا قاراپ. — سولاي بولا تۇرا، مىندەت بولعان سوڭ، تاعى ءبىر رەت ايتىپ وتكەن ارتىق بولماس. ارقان مىناۋ، — دەپ، جەردە جاتقان جۋان كەندىر ارقاندى نۇسقادى يەگىمەن. — وسى ارقاندى تارتامىز. ەكى جاقتاعى ادامدار سانى تەڭ، ون-وننان. ءدال ورتادا بايلانعان قىزىل ءجىپتى قاي جاق سىزىقتان وتكىزىپ، وزدەرىنە قاراي تارتىپ السا، جەڭىس سولاردا. دايىن بولساڭدار، جارىستى باستايمىز.
— دايىنبىز! — دەپ شۋ ەتە قالدى سايىسكەرلەر.
— وندا باستادىق!
ورتاداعى اشىق جەرگە بارىپ تۇرعان ءادىلقازى ارقاندى قولىنا الىپ، قاق جارىلعان بالالاردىڭ مىقتاپ ۇستاپ الۋىن كۇتتى.
— مەن ىسقىرماي تۇرىپ باستاۋعا بولمايدى، — دەدى سوسىن ەكى
جاققا كەزەك قاراپ. ەكى جاق ارقاننان مىقتاپ ۇستاپ، اياقتارىن جەرگە تىرەپ تۇرا قالدى.
ەكى قادام كەيىن شەگىنگەن ءادىلقازى قولىن كوتەرىپ، ىسقىرىپ قالدى.
ساقاداي ساي ەكى جاق شىرەنە كەرى تارتتى. ءبىرىن-بىرى الا الماي تەڭ ءتۇسىپ، ءبىراز تۇردى. جاقسى دايىندالعاندارى كورىنىپ تۇر. مۇنداي توپتىق سپورتتا بىرلىك اسا ماڭىزدى ەكەنىن جاقسى بىلەتىن سياقتى. شاشاۋ شىقپاي قاتار قيمىلداپ، تەڭ تارتىپ جاتىر. ءبىراق، «كۇش اكەسىن تانىماس» دەگەن. كوپ وتپەي سول جاقتا تۇرعانداردىڭ قايراتى باسىم ەكەنى بايقالدى. ارادا كوپ وتپەدى، ورتاداعى قىزىل ءجىپ سول جاققا اۋىپ كەتە باردى.
سونى بايقاعان ءادىلقازى ىسقىرىعىن ىسقىرىپ، تارتىستى توقتاتتى. جەڭگەن جاقتىڭ جانكۇيەرلەرى شۋ ەتىپ قولدارىن سوقتى.
You Might Also Like
-
ايجان — ءۇيدىڭ تۇڭعىشى، اجەسىنىڭ ەركەسى. ول ەركەلىگىن مەكتەپكە بارعان سوڭ دا قويمادى. ارينە، اجەسى كۇنى-تۇنى اينالىپ-تولعانسا، شولجاڭداعانىن قايدان قويسىن.
-
نارتايدىڭ جايلاۋدا كورگەن قىزىقتىرى كوپ بولدى. سولاردىڭ ءبىرى — كۇرەس. بالۋان كۇرەس. اتاسى ەلگە قۇرمەتتى ادام عوي. ونىڭ جايلاۋدا جۇرگەنىن ەستىگەن جۇرت ءجيى تويعا شاقىرادى. بۇل جولى نارتاي اتاسى...
