ءارقاشان ءبىرىنشى!
ءبىزدىڭ ەلىمىز – جاس مەملەكەت. تاۋەلسىزدىك العانىمىزعا نەبارى 28-اق جىل بولدى. وسى 28 جىلدا ەلىمىزدى باسقارىپ، ونىڭ اياعىنان نىق تۇرۋىنا وزىندىك ۇلەسىن قوسقان تۇڭعىش پرەزيدەنتىمىز، ەلباسىمىز – نۇرسۇلتان ءابىش ۇلى نازاربايەۆ تۋرالى وي تولعاۋىمدى جازۋ ماقساتىندا قولىما قالام الدىم.
ءوزى اۋىلدىق جەردە دۇنيەگە كەلسە دە، ەل باسقارۋ دارەجەسىنە دەيىن كوتەرىلە العان، ەلىن كوركەيتكەن بۇل تۇلعا تۋرالى جازارىم كوپ. قاراپايىم جۇمىسكەر رەتىندە ەڭبەك جولىن باستاعاندىقتان بولار، ءابىش ۇلى نازاربايەۆ قاراپايىم حالىقتى ءتۇسىنىپ، حالىقتىڭ ويىمەن ساناسا ءبىلدى. «كەز كەلگەن مەملەكەتتىڭ قۋاتى حالقىندا» دەگەن سوزدەردى ۇران ەتتى. ءبىر شاڭىراق استىندا 130-دان اسا ۇلت پەن ۇلىس وكىلدەرىن سىيعىزا الدى. بىرلىگىمىزدى ءبىزدىڭ قارۋىمىزعا اينالدىرعان ءبىرتۋار ازاماتتىڭ كورەگەندىگىنە تاڭ قالاسىڭ. بۇل كەز-كەلگەن ادامنىڭ قولىنان كەلە بەرمەس.
ەلباسى ءبىر سۇحباتىندا: «كوپتەگەن ەلدەردى ارالادىم. تابيعاتى عاجايىپ تالاي ولكەنىڭ سۇلۋلىعىنا كوز قۇمارىمدى سۋاردىم. ءبىراق، ءبارى دە ءوزىم تۋىپ-وسكەن قازاعىمنىڭ جەرىنە، الاتاۋدىڭ ءبىر بوكتەرىنە جامباستاي جىعىلعان ءۇش قوڭىر توبەگە جەتپەدى. بالالىعىمنىڭ، ساعىنىشىمنىڭ التىن قازىعى سوندا ەكەن…»-دەپ ەدى. بۇل وتان-اناسىن، تۋعان جەرىن جانىنداي سۇيەتىن پەرزەنتتىڭ، ناعىز پاتريوتتىڭ ءسوزى. حالقىمىز جىرلاپ كەتكەن باتىرلار ءدال وسىنداي بولسا كەرەك. ەلىم دەپ، جەرىم دەپ كۇرەسكەن اتوم بومباسى سىندى زۇلىم كۇشتى جەڭگەن باتىرداي ەلەستەيمىن مەن ونى.
تۋ تىگىپ، تاۋەلسىز بولعانىمەن ءىس بىتپەيتىنىن تۇسىنگەندىكتەن بولار، تۇڭعىش پرەزيدەنتىمىز تاۋەلسىزدىكتى ساقتاپ قالۋ ءۇشىن زامان تالابىنا ساي ءجۇرۋ كەرەك ەكەندىگىن اسا ءبىر كورەگەندىكپەن ايتىپ كەتتى. راسىندا دا، ەسكىنى ۇمىتپاي، جاڭعىرتۋ، زامان تالابىنا ساي وزگەرە ءبىلۋ، وزگەرۋ كەرەك ەكەن دەپ تامىرىمىزدى جوعالتپاۋ قاجەت. سوندىقتان نۇرسۇلتان ءابىش ۇلى «رۋحاني جاڭعىرۋ» اتتى باعدارلاماسىن جۇزەگە اسىرۋدى قولعا الدى. بۇل باعدارلاما 6 باعىتتان قۇرىلعان: باسەكەلەستىك قابىلەت، پراگماتيزم، ۇلتتىق بىرەگەيلىكتى ساقتاۋ، ءبىلىمنىڭ سالتانات قۇرۋى، ەۆوليۋسيالىق دامۋ، سانانىڭ اشىقتىعى. «رۋحاني جاڭعىرۋ» باعدارلاماسىن وقىعان سايىن، تەرەڭىنە ۇڭىلگەن سايىن قارا سوزبەن حالقىنا وسيەت قالدىرعان ابايداي ەلەستەيمىن مەن ونى.
ەلباسى «بوي سالىستىراتىن زامان ەمەس، وي سالىستىراتىن» دەگەن ۇستانىمدى ۇستانىپ، جاستاردى شەت ەلگە جىبەردى، «بولاشاق» باعدارلاماسى اياسىندا ءبىلىم الۋىنا جاعداي جاسادى. بۇل باعدارلاماسىن ىسكە اسىرۋىنا كوز جۇگىرتە وتىرىپ، قاراڭعىدا اداسقان قازاق حالقىن جارىققا بوي تۇزەۋىنە جول اشقان اعارتۋشى ىبىراي التىنسارينداي ەلەستەيمىن مەن ونى.
بويىنا باتىرلاردىڭ كۇشىن جيناعان، تاعىلىمىمەن اباي مەن ىبىرايداي ۇلگى بولعان نۇرسۇلتان ءابىش ۇلى نازاربايەۆتىڭ ەرەن ەڭبەكتەرى ەشقاشان ۇمىتىلماق ەمەس. سوندىقتان دا بۇل تۇلعا قازاقستاندىقتار ءۇشىن ءارقاشان ءبىرىنشى بولىپ قالادى دەپ ويتولعاۋىمدى اياقتاعىم كەلەدى.
You Might Also Like
-
ەرتەدە ەشبىر تۋىس-تۋعانى جوق ءبىر جالقى جىگىت بولعان ەكەن. جالعىزدىق مۇڭىن ەشكىمگە ايتا الماعاندىقتان دومبىرا مەن سىبىزعىنى ەرمەك ەتىپ، ىشكى دەرتىن شىعارادى ەكەن.
-
باي بالاسى مەن كەدەي بالاسى سەرىكتەسىپ بەك تەرۋگە شىعادى. ىشەر اس پەن مىنەر كولىككە قىسىلىپ كورمەگەن باي بالاسى ەر-تۇرمانى كەلىسكەن اتقا ءمىنىپ شىعادى دا، اياق ارتارى جوق كەدەي بالاسى جاياۋ شىعادى.
