InfoHub Logo

دۇرىس تاماقتانۋدى قولعا العان ءاربىر ادام سالاۋاتتى دەنە مەن سىمباتتى ءمۇسىن ءۇشىن ءار ازىقتىڭ ءوز ماڭىزى بار ەكەنىن جاقسى تۇسىنەدى.

ۇيلەسىمدى دۇرىس تاماقتانۋ كەزىندە تاعامداردىڭ ءارتۇرلى بولۋىنا دا نازار اۋدارۋ كەرەك. ءبىز ءسىزدىڭ اس ءمازىرىڭىزدى جاڭارتىپ قانا قويماي، اعزاڭىزعا پايدالى بولاتىن كەرەمەت ازىقتاردىڭ ءتىزىمىن جاسادىق. بۇل ءتىزىمدى كۇندەلىكتى تۇتىناتىن ازىق-تۇلىكتىڭ بالاماسى رەتىندە اس ۇيىڭىزگە ساقتاپ قويىڭىز.

ءجۇزىم تاسى

ءجۇزىم تاسى  - شاراپ ءوندىرىسى كەزىندە الىناتىن، ۇنتاقتالىپ، نان ونىمدەرىن ءپىسىرۋ كەزىندە قولدانىلاتىن كاليي تۇزى. ونى قامىر يلەگەن كەزدە اشىتقىنىڭ نەمەسە سودا، ليمون قىشقىلى جانە كراحمالدان تۇراتىن اسپازدىق ۇنتاقتىڭ ورنىنا پايدالانادى.

ەگەر ءسىز گليۋتەنسىز ديەتا ۇستاپ جۇرسەڭىز نەمەسە تاماق ازىرلەۋدە ەرەكشە دامدەۋىشتى پايدالانىپ كورگىڭىز كەلسە، ءجۇزىم تاسىن بايقاپ كورۋ – تابىلعان وي! ونىڭ قۇرامىندا تەمىر، ماگنيي، كاليي جانە يود بار. ەندى ءسىز كەكستەرىڭىزدىڭ، قۇيماقتارىڭىز بەن ناندارىڭىزدىڭ قانداي پايدالى بولاتىنىن ەلەستەتىپ كورىڭىز!

كوكوس مايى

ءقازىر ءزايتۇن مايىن ءتۇرلى مايلارمەن الماستىرۋ كەڭ قولدانىستا. دۇكەندەردىڭ سورەسىندە دايىن وسىمدىك مايلارىنىڭ ءتۇر-تۇرىن تابۋعا بولادى: بادام مايى، كۇنجىت مايى، جەرجاڭعاق مايى، كەدىر مايى، پالما مايى جانە تاعى باسقالار. ولاردىڭ ءارقايسىنىڭ وزىنە ءتان قاسيەتى، ەرەكشە ءدامى بار.

ءبىز سىزگە كوكوس مايىن تاڭداۋعا كەڭەس بەرەمىز. بۇل مايدى سۋىق سىعىمداۋ ادىسىمەن عانا الاتىن بولعاندىقتان، ونىڭ قۇرامىنداعى پايدالى زاتتار تولىق دەرلىك ساقتالىپ قالعان. قىزدىرىپ وڭدەۋ كەزىندە كوكوس مايى كانسەروگەندەر بولمەيدى. دەمەك، ونى دەنساۋلىعىمىز ءۇشىن الاڭداماستان تاماق قۋىرۋعا پايدالانا بەرۋىمىزگە بولادى ەكەن.

كەروب

سىمباتىنا كوڭىل بولەتىن، ءتاتتى جەگىش ارۋلار ۇنەمى شوكولاد پەن قۇرامىندا شوكولادى بار دەسەرتتەردىڭ ورنىن الماستىرا الاتىن تاعام ىزدەپ جۇرەدى. نەگىزى، ءبىز شوكولادتىڭ (مولشەرىنەن اسپاعان، قارا شوكولاد بولسا عانا) پايداسىن جوققا شىعارمايمىز. ءبىراق، ەگەر ءسىز ءتاتتى كالورياسىن ۇنەمدەگىڭىز كەلسە وندا كەروبتى پايدالانىپ كورۋدى ۇسىنامىز. 

اۋەلدە كەروب شاشىراتقىدان (سيكوريا) كەيىنگى كوفەنى الماستىراتىن ۇنتاق رەتىندە اتى شىققان. ايلاۋىقتىڭ كەپكەن جەمىستەرىنەن الىنعان بۇل ۇنتاقتى دەمدەگەن كەزدە جەڭىل كوفە ءدامى بار ءتاتتى سۋسىن الىنادى. وعان ءسۇت قوسساڭىز – ناعىز ديەتالىق كاكاو دايىن بولادى. كەروبتى شوكولاد ءدامىن كىرگىزۋ ءۇشىن نان ونىمدەرىنە دە قوسادى.

قۇرما قانتى

تابيعي ونىمدەردى ۇناتاتىن جاندار قۇرما قانتىنىڭ قاسيەتىن باعالاپ تا ۇلگەرگەن. قۇرما قانتى – زياندى اق قانتتىڭ كەرەمەت بالاماسى. دەنساۋلىعىڭىز بەن سۇلۋ ءمۇسىنىڭىز ءۇشىن الاڭداساڭىز، وندا تاعامداردى تاتتىلەگىش رەتىندە ءدال وسى قۇرما قانتىن پايدالانىڭىز.

قۇرما قانتى دەگەنىمىز...مايدالاپ تۋرالعان قۇرمانىڭ ءدال ءوزى! بۇل ەشقانداي قوسىمشا وڭدەۋدەن وتپەگەن، ءجۇز پايىز تازا ءونىم. ونى شىرىندارعا، نان ونىمدەرىنە، سۇزبە مەن سمۋزيگە قوسىڭىز.

زىعىر ءدانى

زىعىر ءدانى – جاقىندا عانا ايگىلى بولا باستاعان ءونىم. بۇل كەرەمەت ءداندى ءوزىن عانا جەي بەرۋگە بولادى. كۇنىنە بىر-ەكى قاسىق زىعىر ءدانىن جەسەڭىز، اعزاڭىز ماڭىزدى دارۋمەندەرمەن جانە باعا جەتپەس ميكروەلەمەنتتەرمەن، انتيوكسيدانتتارمەن، اقۋىزبەن، ومەگا-3 ماي قىشقىلدارىمەن تولىعادى. ۆەگاندار نان ونىمدەرىن پىسىرگەن كەزدە جۇمىرتقانىڭ ورنىنا زىعىر داندەرىن پايدالاندى. ول ءۇشىن ءداندى الدىن-الا ۋاتىپ، سۋعا سالىپ قوياسىز. سول كەزدە كوپسىتىلگەن جۇمىرتقاعا ۇقساس كەرەمەت قويۋلاندىرعىش پايدا بولادى. ونى پايدالانىپ ءيى قانعان جاقسى قامىر يلەۋگە بولادى.

كۇلگىن گيمالاي تۇزى

گيمالاي تۇزىن اس تۇزىنا بالاما رەتىندە پايدالانادى. ونىڭ قۇرامى ۇيلەسىمدى تاماقتانۋ ءۇشىن تاپتىرمايتىن، وزىنە ءتان ەرەكشە، قانىق ءدام بەرەتىن ءتۇرلى مينەرالدارعا وتە باي.

بۇل تۇزدى تاعام دايىن بولاردىڭ الدىندا قوسۋ كەرەك. ويتكەنى، ول كۇندەلىكتى جەپ ۇيرەنىپ قالعان تاعامنىڭ وزىنە ەرەكشە جاڭا ءدام بەرەدى. مۇنداي تۇزدى ءمولدىر ىدىسقا ساقتاۋ كەرەك. سوندا ونىڭ ادەمى كوگىلدىر ءتۇسى اسۇيىڭىزگە ەرەكشە ءسان بەرىپ تۇرادى.

لەمونگراسس

سيترۋستىڭ جۇپار ءيىسى اڭقىعان بۇل دامدەۋىش پايدالى تاعامداردى تۇتىناتىن ادامداردىڭ اسحاناسىنان مىندەتتى تۇردە تابىلادى. لەمونگراسستىڭ تاعى ءبىر ارتىقشىلىعى – ونى ءوز ۇيىڭىزدە دە وسىرۋگە بولادى. ول ءۇشىن تەك سۋ، كۇننىڭ نۇرى جانە جىلۋ كەرەك.

ليمون ءشوبى جۇمساق (ليمون سياقتى قىشقىل ەمەس)، جەڭىل سيترۋس ءدامىن بەرىپ، بالىق تاعامدارىمەن كەرەمەت ۇيلەسەدى.

گۇلشەتەن

گۇلشەتەن (روزمارين) — ەرتەدەن كەلە جاتقان امبەباپ دامدەۋىش. ءقازىر كەز-كەلگەن ايەلدىڭ اس ۇيىنەن گۇلشەتەن دامدەۋىشىن تابۋعا بولادى. ول بارلىق كوكونىس تاعامدارىنا، ەت (قۇس ەتى دە) جانە بالىق تاعامدارىنا كەرەمەت ءدام بەرەدى.

تاعامداردى بالعىن گۇلشەتەنمەن دە دايىنداپ كورىڭىز. ونى ءتۇرلى مارينادتارعا، تاعامداردى بۇقتىرۋعا، ءتىپتى داستارحانعا قوياتىن ءدامدى تاعامداردى ساندەۋگە دە پايدالانۋعا بولادى.

---