استانادا بالاباقشا كىتاپتارىنا ۇزىن-سونار كەزەك پايدا بولدى
استانادا بالاباقشا كىتاپتارىنا دەگەن سۇرانىس كۇرت ارتىپ، اتا-انالار سەرگەلدەڭگە ءتۇستى.
كىتاپ ساتاتىن دۇكەندەردە ۇزىن-سونار كەزەك قالىپتاسىپ، تۇرعىندار الەۋمەتتىك جەلىدە شۋ كوتەردى.
اتا-انالاردىڭ ايتۋىنشا، ءبىر بالاعا شامامەن 10-15 كىتاپتان ساتىپ الۋ كەرەك، ونىڭ جالپى قۇنى 12 مىڭ تەڭگەدەن اسىپ جىعىلادى.
«ەكى بالام بار، بىرەۋى 3-تە، ەكىنشىسى 4-تە. بالاباقشادا كىتاپ ءتىزىمىن بەرگەننەن سوڭ، ساتىپ الدىق. ءارقايسىسىنا 12 مىڭنان استام تەڭگە كەتتى، ەكى بالاعا 25 مىڭ تەڭگە»، - دەيدى قازاقپارات تىلشىسىنە بەرگەن سۇحباتىندا ەكى بالانىڭ اكەسى ر.نۇسىپبەك.
«ەكى بالام دا مەملەكەتتىك بالاباقشاعا بارادى. وقۋلىقتاردىڭ ءتىزىمىن بەردى. جالپى 25 مىڭعا تاياۋ قاراجات كەتتى»، - دەيدى اينۇر ەسىمدى انا. ول دا الماتى كىتاپ دۇكەنىنىڭ الدىندا كەزەك كوپ بولعان سوڭ، استانانىڭ ورتالىق بازارىنان كىتاپ ساتىپ العان.
«بارلىعى مەكتەپ وقۋلىقتارى تۋرالى ماسەلەنى كوتەرەدى، ءبىراق بالاباقشا كىتاپتارى تۋرالى ءۇن جوق. بىزگە 15 كىتاپتىڭ ءتىزىمىن بەردى. ولاردىڭ ىشىندە 2-ەۋى ءالى باسپادان شىقپاپتى. بۇگىن 6 دانا كىتاپ الدىم، شامامەن 7500 تەڭگە جۇمسادىق. كىتاپ دۇكەن سورەلەرىندە ءبىتىپ قالعان»، - دەيدى فەيسبۋك قولدانۋشىلارىنىڭ ءبىرى سايا حاسەن.
ەگەر جاعداي وسىلاي كەلەسى جىلى قايتالاناتىن بولسا، بالانى مەكتەپكە بەرۋگە تۋرا كەلەدى دەپ قالجىڭدايدى ول.
«نەشە جاستان الادى كەلەسى جىلى مەكتەپكە؟ بىزگە قازان ايىندا 5 جاس تولادى. ءبىز سول باقىتتى جانداردىڭ قاتارىندا بولا الامىز با؟» - دەيدى س.حاسەن. - نەگە بالاباقشا ادىستەمەشىلەرىنە تۇسىنىكتەمە جۇمىستارىن جۇرگىزبەيدى، ولارعا نەگە تۇسىندىرمەيدى؟ ەشكىم ەشتەڭە بىلمەيدى. جاڭا وقۋ جىلىندا بۇل نە قىلعان دايىندىق؟»
فەيسبۋك پايدالانۋشىلارىنىڭ ءبىرى مادينا كارىبايەۆا دۇكەن الدىندا جينالعان جۇرتتىڭ سونشالىقتى ابىگەرگە تۇسكەندىگىن جازىپ، اتالعان جاعدايدىڭ نەدەن پايدا بولعانىن تاپپاي دال.
«الماتىكىتاپ» الدى تولعان ءنوپىر ادام، ءبىرىن-بىرى باسىپ جاتىر، كەزەك كوشەگە دەيىن سوزىلىپ جاتىر. بىر-بىرلەپ كىرگىزەدى. وندا كەيبىر وقۋلىقتار جوق، قولدا بار كىتاپتاردىڭ ءتىزىمىن سىرتتا ءىلىپ قويدى. ورتالىق بازاردا دا وسىنداي جاعداي. بارلىق كىتاپتى تاپپايسىڭ. بالا سانى مەن كىتاپ تيراجدارىن دۇرىس ەسەپتەمەگەن شىعار. ءبىز مەكتەپ الدى ءبىلىم بەرۋ ورتالىعىندا وقيمىز، 10 كىتاپ الۋ كەرەك، 6 وقۋلىقتى ساتىپ الدىق، 10500 تەڭگە بولدى»، - دەيدى م.كارىبايەۆا.
«بالاباقشا اتا-انالارى مەنى تۇسىنەتىن شىعار. «الماتىكىتاپ» دۇكەندەرىنىڭ ءبىرى. كەڭەس زامانىنا ءقايتىپ ورالدىم، كەزەكتە سوڭىنا دەيىن تۇرۋ كەرەك، بىرنەشە ادامنان عانا كىرگىزەدى. وسىنى اۆتوماتتاندىرىپ، ينتەرنەت ارقىلى ساتىپ الۋدىڭ جولىن جاساۋعا بولمايدى ما؟!» - دەپ جازادى ايگۇل ءامىرحانوۆا فەيسبۋككە دۇكەن الدىندا جينالعان جۇرتتىڭ فوتوسۋرەتىن سالىپ.
«مىنا كەزەك كسرو كەزىندەگى گاسترونومداردىڭ الدىندا بولعان كەزەكتى ەسكە سالادى. وقۋ باستالعاندا جىل سايىن بولاتىن وقيعا، وسىنى جۇيەلەۋگە بولمايتىن با ەدى؟! وقۋلىقتاردى بىردەن ءبىلىم مەكەمەلەرىنە جەتكىزىپ نەمەسە ينتەرنەت دۇكەن اشۋعا بولمايدى ما، "قازپوشتانىڭ" postmarket.kz الاڭى بار، بالاماسىن جاساۋعا دا بولار ەدى عوي»، - دەپ شاعىمدانادى فەيسبۋك پايدالانۋشىلارىنىڭ ءبىرى قۋانىش ريزانوۆ.
You Might Also Like
-
كۇن ىشىندەگى سترەسس، جۇمىستىڭ شيەلەنىسۋى نەمەسە باسقا دا پسيحولوگيالىق سەبەپتەرگە بايلانىستى كەيدە ۇيىقتاي الماي جاتاتىن كەزدەر بولادى. قانداي امال قولدانسا دا وڭايلىقپەن ۇيىقتاي المايتىن ادامدار ءۇ...
