InfoHub Logo

استانادا مەكتەپكە دەيىنگى ءبىلىم بەرەتىن مەكەمەلەردىڭ تاربيەشىلەرى، ورىس ءتىلدى باستاۋىش سىنىپ مۇعالىمدەرى، سونداي-اق پسيحولوگيالىق-پەداگوگيكالىق تۇزەتۋ ماماندارى جەتكىلىكسىز. بۇل تۋرالى استانا قالالىق ءبىلىم باسقارماسى حابارلايدى.

«ەۋرازيا گۋمانيتارلىق ينستيتۋتى (ەاگي) نەگىزىندە پەداگوگ مامانداردى قايتا دايارلاۋ ءۇشىن «بالالاردى مەكتەپكە دەيىنگى تاربيەلەۋ مەن وقىتۋ» توبى (25 ادام) اشىق. بۇدان بولەك، ەاگي، استانا قالاسى گۋمانيتارلىق كوللەدجىندە جانە مەنەدجمەنت جانە بيزنەس كوللەدجىندە جىل سايىن «بالالاردى مەكتەپكە دەيىنگى تاربيەلەۋ مەن وقىتۋ» ماماندىعى بويىنشا تەحنيكالىق كاسىبي جانە ورتا بىلىمنەن كەيىنگى ءبىلىم بەرۋ ماماندارىن دايارلاۋ ءۇشىن جىل سايىن مەملەكەتتىك ءبىلىم بەرۋ تاپسىرىسى جاريالانادى: 2013 جىلى 150 ادام، 2014 - 175، 2015 - 265، 2016 جىلى 265 ءبىلىم الۋشى»، - دەيدى باسقارمادا.  

سونىمەن قاتار، استانالىق ۆەدومستۆو ۇزدىك مۇعالىمدەردىڭ جەكە مەكتەپتەرگە اۋىسىپ جاتقانى جايلى تۇسىنىكتەمە جاسادى. «ۇزدىك مۇعالىمدەردىڭ ءبىلىم بەرەتىن جەكە ۇيىمدارعا اۋىسۋى بايقالماۋدا. ءبىلىم بەرەتىن جەكە ۇيىمداردىڭ ەڭبەكاقىسى جوعارى بولۋىنا قاراماستان، مەملەكەتتىك ۇيىمدارداعى جۇمىس - بۇل تۇراقتىلىقتى بىلدىرەدى (ەڭبەككە جارامسىزدىق پاراعىنىڭ تولەنۋى، دەنساۋلىعىنىڭ قالپىنا كەلۋىنە اقى تولەۋ، تولىعىمەن تولەنەتىن دەمالىس، كاسىپوداقتىڭ قورعاۋى، تۇرعىن ۇيمەن قامتاماسىز ەتىلۋى، بىلىكتىلىكتى ارتتىراتىن كۋرستارعا تەگىن قاتىسۋى). پەداگوگ مامانداردىڭ اۋىسۋى نەگىزىنەن جاڭا مەكتەپتەردىڭ اشىلۋىنا، سونداي-اق باسقا اۋداننان پاتەر الۋىنا بايلانىستى ورىن الادى. كادرلاردىڭ تۇراقسىزدىعى كوبىنە تاربيەشىلەر مەن كومەكشى تاربيەشىلەردىڭ ەڭبەكاقىلارىنىڭ تومەندىگىنە بايلانىستى مەكتەپكە دەيىنگى ۇيىمداردا ورىن الۋدا»، - دەيدى ول. 

ايتا كەتەيىك، مەملەكەتتىك ءبىلىم بەرەتىن ۇيىمداردا جۇمىس جاسايتىن بارلىق قىزمەتشىلەردىڭ ەڭبەكاقىسى قازاقستان رەسپۋبليكاسى ۇكىمەتىنىڭ 2015 جىلى 31 جەلتوقساندا قابىلدانعان №1193 «ازاماتتىق قىزمەتشىلەرگە، مەملەكەتتىك بيۋدجەت قاراجاتى ەسەبىنەن ۇستالاتىن ۇيىمداردىڭ قىزمەتكەرلەرىنە، قازىنالىق كاسىپورىنداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى» قاۋلىسىمەن بەلگىلەنەدى.

اتالمىش قاۋلى نەگىزىندە ءمۇعالىمنىڭ ورتاشا ەڭبەكاقىسى 75 385 تەڭگەنى (جالاقىعا قوسىمشا تولەمدى ەسەپكە الماعاندا: ساناتى، سىنىپقا جەتەكشىلىك ەتۋى، داپتەر، جازباشا جۇمىس تەكسەرۋى جانە تاعى باسقا). بۇرىندا استانا قالالىق ءبىلىم باسقارماسى ەلورداداعى وقۋشىلار ورنىنىڭ جەتىسپەۋ ماسەلەلەرىنىڭ شەشىلۋى، سونىمەن قاتار باس قالامىزداعى ۇزدىك مەكتەپتەر جايلى ايتقان بولاتىن. 

---