اسحات ايماعامبەتوۆ: ءبىلىم گرانتىنا ىلىنبەگەن تالاپكەرلەردىڭ ءالى دە اقىسىز وقۋعا مۇمكىندىگى بار
پارلامەنت ءماجىلىسىنىڭ دەپۋتاتى اسحات ايماعامبەتوۆ ءبىلىم گرانتىن جەڭىپ الماعاندارعا ءالى دە اقىسىز وقۋعا تۇسۋگە بولاتىنىن ايتتى.
اتاپ ايتقاندا، 5 تامىز كۇنى عىلىم جانە جوعارى ءبىلىم مينيسترلىگىنىڭ رەسمي سايتىندا جانە الەۋمەتتىك جەلىلەرىندە 2023-2024 وقۋ جىلىنا ارنالعان ءبىلىم گرانتى يەگەرلەرىنىڭ ءتىزىمى جاريالاندى.
جوعارى وقۋ ورىندارىنا قۇجاتتاردى تاپسىرۋ 25 تامىزعا دەيىن جۇزەگە اسىرىلادى.
«گرانتتى جەڭىپ الماعاندارعا نە ىستەۋگە بولادى؟ كوممەنتتەردە جانە جەكەمە دە وسىنداي سۇراق كوپ قويىلىپ جاتىر. سوندىقتان قىسقاشا ءوز ويىمدى جازايىن. باستىسى، ءالى دە گرانتتى جەڭىپ الۋعا مۇمكىندىك بار. نەگە؟ بىرىنشىدەن، يگەرىلمەگەن بىرنەشە مىڭ گرانت قايتادان ۇيلەستىرىلەدى. ياعني گرانت العان تالاپكەرلەردەن كەيىن تۇرعان تالاپكەرلەرگە ۇبت-دا جيناعان ۇپاي سانىنا سايكەس بەرىلەدى. سونى كۇتۋگە بولادى. ەكىنشىدەن، اكىمدىكتەردىڭ گرانتتارى بار. بىرنەشە مىڭ گرانت جەرگىلىكتى بيۋدجەتتەن بولىنەدى. ۇشىنشىدەن، «قازاقستان حالقىنا» قورىنىڭ گرانتتارى تاعى بار»، - دەپ جازدى ا. ايماعامبەتوۆ الەۋمەتتىك جەلىدەگى پاراقشاسىندا.
ونىڭ ايتۋىنشا، كەيبىر تالاپكەرلەر ءتۇرلى سەبەپ بويىنشا جەڭىپ العان گرانتتارىنان باس تارتۋى مۇمكىن. ولاردىڭ سانى دا از بولمايدى. بۇل گرانتتار دا قايتادان بولىنەدى.
«ءتىپتى ەشتەڭە بولماسا، ۋنيۆەرسيتەتكە اقىلى تۇردە ءتۇسىپ، كەيىن جاقسى وقىپ، GPA جوعارى بولسا، ءبىلىم الۋ كەزىندە بوساعان بوس گرانتتى ۇتىپ الۋعا بولادى. سونىمەن قاتار، «gap year» ارقىلى ءبىر جىل دايىندالىپ، قايتادان ۇبت تاپسىرىپ، گرانتتى جەڭىپ الۋ مۇمكىندىگى بار. ول مەنىڭ ءوز باسىمنان وتكەن وقيعا. بۇل دا جاقسى شەشىم»، - دەدى دەپۋتات.
«كوللەدجگە تۇسۋگە بولادى. كوللەدجدە گرانت كوپ، قاجەت ماماندىقتار بويىنشا كوللەدج بىتىرگەندەر نارىقتا تاپشى. كەرەك بولسا، كەيىن ءارى قاراي جوو-عا ءتۇسىپ، قىسقا مەرزىمدە جوعارى ءبىلىم الىپ شىعۋعا دا بولادى. كورىپ وتىرعاندارىڭىزداي مۇمكىندىكتەر وتە كوپ. ءبارى الدا. تولىق مالىمەت الۋ ءۇشىن ۋنيۆەرسيتەتتەردىڭ قابىلداۋ كوميسسياسىنا جولىعۋ كەرەك»، - دەدى اسحات ايماعامبەتوۆ.
You Might Also Like
-
ايتۋشى قارتتار، حانگەلدى نەمەرەسى رايىمبەك ءۇش جاستا ات باسىن الىپ ءجۇردى، بەس جاستا ءوزى ات ۇستاپ ءمىنىپ، جىلقى ايداپتى. جەتى جاسىندا بەلگىلى ءبىر جىگىتتىڭ ساپىندا جىلقى باعۋعا جارامدى ەدى.
-
رەسەيدەن قاشقان تورعاۋىتتاردى قۋالاعان قىرعىزدار (قازاقتار) اشىق دالادا دامىلداپ، قازانعا سۇرلەنگەن جىلقى ەتىن اسىپ، تورسىققا قۇرت ەزىپ، كۇنى بويىنا ءنار بولاتىنداي ەتىپ تاڭعى استارىن ءىشىپ وتىرادى. ...
