ات ۇستىندەگى ايتىس
اسپان اينالىپ جەرگە تۇسكەندەي ىستىق، استىق ءپىسىپ، ماقتا گۇل اشىپ تۇرعان شاق. كولحوزشىلاردىڭ قاۋىرت جۇمىستاعى كەزى. اسىرەسە، اگرونومدار مەن بريگاديرلەردىڭ تىنىم تاپپايتىن ۋاقىتى. استىق باستىرۋ، ماقتانى باپتاۋ مەن سۋارۋ... بارىنە باسشىلىق كەرەك.
وسى قاۋىرت جۇمىستىڭ ۇستىندە ءۇش اتتى جارىسىپ، قىم-قيعاش شابۋىلمەن قيقۋلاسىپ كەلەدى. ايقاي-سۇرەڭ، الاي-تۇلەي شابىسپەن كەلگەندەر اتتان تۇسە-تۇسە قالدى.
ءبىرىنشى بولىپ كەلگەن اگرونوم بولدى دا، سوڭعى ەكەۋى: بريگاديرلەر ەكەن. اتتار اق كوبىكتەنىپ ەنتىگىپ تۇر، ايقايشىلار دا اپتىعىپ قالىپتى. اگرونوم شاپكاسىن ماقتانىڭ قوزاسىنا ءىلىپ قويىپ، ولەڭدى سوعىپ قويا بەردى:
"بۇل اۋىلدىڭ اڭىزدارى قايدا كەتكەن؟
كەلسىن بەرى، ولەڭمەن سويلەسەيىك!.."
تال تۇستە، جۇمىس باسىندا، قىز بەن جىگىتتەردىڭ ايتىسى ۇيىمداستىرىلماق بولدى. ءبىراق قاساقانا بۇگىن بريگادادا قىزدار جوق ەكەن. تەك 10 جاسار وقۋشى قىز تابىلدى. اگرونوم وسى بالاعا قايىمداپ ولەڭ سوقتى:
اق تاناۋ كەر دەگەنگە اق تاناۋ كەر،
قىسىلعاننان شىعادى ماڭدايدان تەر.
زاۋىممەنەن ارىپتەس بولىپ ەدىك،
ەڭ بولماسا، قۇداشا، ودەكلون بەر.
تۇتقيىلدان بولعان بۇل سەكىلدى "ات ۇستىندەگى ايتىستى" ەستىپ، كولحوز پرەدسەداتەلى ات شاپتىرىپ، شاقىرتىپ ەدى، الگى اۋەلى ءۇش بەيباق پىسقىرعاندا جوق. ءبىر ەمەس ءۇش كەلگەن شاقىرۋشى بوسقا قايتتى.
ولەڭ ءالى "قىزىپ جاتىر... تۇسكى دەمالىس بىتكەلى قاشان. كولحوزشىلاردىڭ جەۋگە كەلگەن تاماعىن جيىپ، ورتاسىنا ءۇيىپ قويىپ، ايدالادا الگى بەيباقتار ءالى سوعىپ وتىر. داۋىس قارلىعىپ، وزدەرى ەنتىگىپ، كوزدەرى ەجىرەيىپ كەتىپتى.
ورامالىن بەرمەسە "توي تارقارى" بولار ەمەس. مۇنى سەزگەن قىزدىڭ جەڭگەلەرى ورامال قاراستىردى. ويتكەنى قىزبالا جالاڭباس كەلىپتى. ويلاسىپ كەلگەندە ءبىر ايەلدىڭ جاۋلىعىن جىرتىپ، قىزدىڭ ورامالى جاسادى دا، بۇلارعا ۇسىندى. ورامالعا كوڭىل تولماعان "اقىندار" 10 جاسار قىزعا ولەڭ شىعاردى:
جاۋلىق پا، بۇل بەرگەنىڭ ورامال ما؟
كونە المايمىز، شىراعىم، بۇل امالعا.
كەشكە دەيىن قاقساتىپ جاۋلىق بەرىپ،
الا الماعان بىزدەردە ءوشىڭ، بار ما؟
جاس ايەلگە وڭەشىن سىزىپ ءبىر بريگادير:
قارسىداعى وتىرعان، اق كەلىنشەك،
بىزگە شارشى ورامال تاپ، كەلىنشەك.
تەرىمىزدى سۇرتەيىك ەڭ بولماسا،
كەيىن تولىق بىلەرسىز، جات كورىنسەك!.. —
دەپ سۇعاناقتانىپ سۋماڭداي جونەلدى.
سونىمەن ايتىستىڭ اياعى كوپكە سوزىلدى. كولحوزداعى جۇمىس توقتاپ قالدى. تال تۇستەگى توپىر، "ات ۇستىندەگى ايتىس" كۇن باتاردا ارەڭ تارادى. تەزىرەك تاراۋىنا سەبەپ بولعان شيشالاردىڭ كەلىپ قالۋى. ەگەر شيشالاردىڭ شىقىلى، تىعىنى اشىلىپ قۇيىلعانداعى لىقىل بولماعاندا، ريۋمكا تولىپ اۋىزعا قۇيىلماعاندا، ايتىس سوزىلا بەرۋى دە ءسوزسىز ەدى...
ولەڭ، ساۋىق ءومىر كوركى عوي! كولحوزشى جاستار جۇمىس تا ىستەي بىلەدى، جۇمىستان كەيىن ولەڭ ايتىپ، ءان شىرقاپ، مادەنيەتتى دەمالىپ كوڭىل كوتەرۋدى دە بىلەدى. اتتەڭ نە كەرەك، ءبىزدىڭ فەلەتوننىڭ كەيىپكەرلەرى سەكىلدى كەيبىر بەتىمەن كەتكەندەر — "شاش ال دەسە باس العاندار"، — كەيدە جاقسى سالتتىڭ ءوڭىن اينالدىرىپ-اق جىبەرەتىندەرى بار. "ات ۇستىندەگى ايتىس" سىقىلدى اپەرباقاندىققا كولحوز باستىقتارى ءاتۇستى قاراماسىن!
You Might Also Like
-
الدىمىزدا بۋدالانعان قاعاز جاتىر. مۇنىڭ ىشىندە نە جوق دەيسىز، ءبارى بار؛ انىقتاما كەرەك پە، مىنەزدەمە، بولماسا دالەلدەمە، قولحات، ءتىلحات، جولداما كەرەك پە؟ ەڭ ارعىسى بۇيرىق پەن جارلىق تا تابىلادى. و...
-
سونىمەن ديرەكتور اينالىپ وبلىستىق اتكومگە بارىپتى، ولار بۇل رەتتە تەلەفوندى قويىپ، ادەيىلەپ ارناۋلى قاتىناس جازىپ، ءراسىمدى تۇردە بۇيرىق بەرىپتى. بۇيرىعىندا: "اۆگۋست ايىنا كەلەتىن وتىننان پەدۋچ...
