ايازدىڭ ءپىرى — اياز اتا
كۇن سۋىتتى. قار جاۋدى جاپالاقتاپ. ءتۇرلى-تۇرلى ويۋلارمەن بەزەنگەن قار ۇلپالارى توڭىرەكتىڭ ءبارىن دە سيقىرلاۋدا. ءسويتىپ، ماڭايدى قيال-عاجايىپتارعا جەتەلەيتىن كەرەمەت سۋرەتتەرمەن بايىتا ءتۇستى. تاڭ اتقاننان بەرى جاۋعان قاردى الدەبىرەۋ تۋ-ۋ توبەدەن ءوز دەمىمەن تومەنگە قاراي ۇرلەپ جاتقانداي-اۋ، شىركىن!
— اتا، — دەدى باقىتبەك.
— اۋ، قاراعىم.
— مىنا قاردى ۇرلەپ، جاۋدىرىپ تۇرعان كىم ءوزى؟
اتاسى نەمەرەسىنىڭ قيالعا باي وي الەمىنە ريزا بولعانداي پەيىلمەن:
— ە-ە، بالام، بۇل قار مەن ايازدىڭ ءپىرى — اياز اتا، — دەپ جاۋاپ قاتتى.
سودان سوڭ ول ءوز ءسوزىن ودان ءارى جالعاستىردى:
— ەرتە، ەرتە زامانداردا قالىڭ ورمان ىشىندە اياز اتا ءومىر ءسۇرىپتى. قىس كەلگەندە، اسپاننان قار جاۋعاندا، ول نۋ ورمان ىشىنەن شىعادى ەكەن. اق كيىز بايپاق كيگەن اياقتارىن بالپاڭ-بالپاڭ باسىپ، ەل مەن جەردى تۇگەلدەي ارالايدى ەكەن.
قاباعىنا قار تۇرعان، اق ساقالى بەلۋارىنا تۇسكەن اياز اتا وزىمەن بىرگە اپپاق قاردى، ونىڭ ارتىنان ايازدى ەرتىپ اكەلۋدى ادەت ەتىپتى.
اتتارىن شاناسىنا جەگىپ الىپ، ۇزاق جولعا شىعادى ەكەن.
اتتارى ءتىپتى جۇيرىك كورىنەدى. زۋىلداعان كۇيى جەر بەتىن تەز ارادا شارلاپ شىعادى. اپ-ساتتە، كوزدى اشىپ-جۇمعانشا باسىپ وتكەن اۋىلدار مەن قالالار اق كورپەدەي قالىڭ قارعا ورانادى.
— اتا، ءبىزدىڭ اۋىلدىڭ ۇستىنەن دە اياز اتا ءوتتى مە سوندا؟— دەپ سۇرادى نەمەرەسى اتاسىنىڭ شىنايى ايتقان سوزدەرىنە ەشبىر كۇمان كەلتىرمەي.
— ءيا، بالام، ىسقىرىپ، شاۋىپ، زۋلاپ، انەكي، بارادى،— دەدى اتاسى دا بوراعان قاردىڭ ۋىلىنە قۇلاق سالىپ.
باقىتبەك اتاسىنىڭ ايتقان سوزدەرىنە رازى بولدى.
— ءجۇر، بالام، كۇن دە كەشكىرىپ قالىپتى. اينالانىڭ ءبارى اپپاق بولدى. ۇيلەردىڭ تەرەزەلەرىندە جارىق پايدا بولىپتى. قار توقتاعان سوڭ كۇن سۋىتىپ، اياز پايدا بولادى.
اتاسى مەن نەمەرەسى اياقتارىنا جابىسقان قاردى قاعىپ، ىشكە ەندى. ءۇيدىڭ ءىشى سىرتتاعىداي ەمەس، جىپ-جىلى. باقىتبەك ۇستىندەگى جىلى كيىمدەرىن شەشتى. ءسويتتى دە، تەرەزە سىرتىنا كوز سالدى.
دالادا ءبىر نوقات جوق. ءبارى اپپاق. اق تۇسكە ورانعان الەم.
You Might Also Like
-
اياعىن جاسقانا باسىپ، تالدىرماش بويلى ءبىر قىز بالا روبەرت كارلوۆيچپەن بىرگە سىنىپقا كىردى. ءوزى كىرشىكسىز بوپ كيىنگەن. جاسى ءبىز قاتارلاس. ون-ون بىرلەر شاماسىندا. قوس بۇرىمى كورىكتى كەسكىنىنە ادەمى ءسا...
-
— جانىبەك، سەنى ەرمەك شاقىرىپ تۇر، — دەدى كورشى ءۇيدىڭ بالاسى دارمەن قاقپا سىرتىنان داۋىستاپ.
