InfoHub Logo

نيشاپۋر قالاسىنا ءوز كاسىبىنىڭ شەبەرى، ونىڭ ۇستىنە جاراتىلىس-تابيعاتى كۇلدىرگى ءبىر قايىرشى كەلدى دەگەندى ءبىر قاريادان ەستىگەنىم بار. ول ءبىر وعاش قوناق ۇيگە توقتاپتى. قالا قايىرشىلارىنىڭ ءبارى سوندا جينالىپتى دا، الگى قايىرشى سولاردىڭ مەيمانى بولىپتى. ول:

— قايىر-ساداقا سۇراعانداعى مەنىڭ قولداناتىنىم — ءوز ءىسىمىز شەبەرلەرىنىڭ ويىنا دا كىرىپ شىقپاعان ءادىس، مەنىڭ ءايلا-تاسىلىم ەشكىمنىڭ قاپەرىندە دە بولعان ەمەس، — دەپ وتىرعانداردىڭ نامىسىنا تيە باستايدى.

كەلەسى كۇنى جيىن شاقىرادى. قوناق قايىرشى بيىكتەۋ جەرگە شىعادى دا، ءبىراز ۋاقىت سويلەيدى، جۇرتتىڭ ءبارى ۇيىپ تىڭداپ، قايران قالادى. ول:

— زامانىمىزدىڭ يگى جاقسىلارى-اۋ، مەيىرىمى مول ادامدار! مىنا مەن مۇساپىرگە قۇلاق قويىڭدارشى. ايتقان انتىن بۇزۋى سەبەپتى يزرايل اۋلەتىنىڭ ءبىرىنىڭ سىن-سيپاتى وزگەرىپ، مايمىلعا اينالىپ كەتكەنىن ەستىگەن بولارسىزدار. مىنە، مەن دە سولاردىڭ اۋلەتىنەن تاراپپىن، بويىمدا دالەلدەمەم دە بار. ول مىناداي — مايمىلدىڭ قۇيرىعى ءتارىزدى قۇيرىعىم بار. قازىرگىدەي ماسقاراشىلىقتى، بۇل سىرىمدى ەشكىمگە ايتپاۋشى ەدىم، ءبىراق ءقازىر ولشەۋسىز جوقشىلىق كورىپ، جاعدايىم جوسىقسىز اۋىر كۇيگە تاپ بولعاندىقتان، باسىمدى ۇياتسىزدىققا بايلاپ، كەمشىلىك سىرىمدى ايتپاسقا امالىم جوق. سول قۇيرىعىمدى وزدەرىڭە كورسەتەيىن، ءبىراق ءارقايسىڭ راقىمشىلىق ىستەپ، وزىمە قايىر-ساداقا بەرىپ، مەيىرىمىن بىلدىرەر دەگەن ۇمىتپەن عانا كورسەتەم. وندايلىق وعاش سۇمدىققا ءبىر قاراۋ دەگەن — سەندەر ءۇشىن ەستەرىڭنەن كەتپەس ەرسى وقيعا. مۇنداي عالاماتتى سەندەر ەندى قايتىپ ەشقاشان كورمەيسىڭدەر دە، ەستىمەيسىڭدەر. سول جەردە تۇرعاندار ونىڭ الاقانىنا: بىرەۋ — التىن ۇنتاعىن، بىرەۋ — سىڭعىرلاعان التىن تەڭگەلىگىن، بىرەۋ — كۇمىسىن سالىپ، اجەپتاۋىر سوما جينالىپتى. اقشانى ساناپ الىپ، ەڭىرەپ قويا بەرەدى:

— باۋىرلار، ۇياتتان ولە جازداپ وتىرعانىم. قۇيرىعىم ارت جاعىمدى بولۋشى ەدى، ەندى قاتتى قىسىلعاندىعىمنان بولار، الدىڭعى جاعىما اۋىسىپتى. ايەلدەر دە، اقسۇيەكتەر دە جينالىپ تۇرعاندىقتان، مەنى جالاڭاشتاپ ولاي ماسقارالاۋعا جول بەرمەيتىندەرىڭدى بىلەمىن. بۇلاردىڭ كوزىنشە ابىرويىمدى ايرانداي توگە المايمىن.

تۇرعانداردىڭ ءبارى شەك-سىلەسى قاتا كۇلىپتى. كەيبىرەۋلەرى تاپقىر ەكەن دەپ مۇنى ماقتاي باستاپ، وزگەلەرى قارعىستى جاۋدىرىپتى-اي كەلىپ، ءبىراق بۇل اقشاسىن الىپ قويعان ەدى. قايىرشىلار اراسىندا وسىنداي ايلاكەرلەرى دە بولىپتى.

---