استانادا روبوتوتەحنيكادان Central Asia FIRST حالىقارالىق چەمپيوناتى ءوتىپ جاتىر
استانادا وقۋشىلار اراسىندا روبوتوتەحنيكا بويىنشا Central Asia FIRST Championship حالىقارالىق چەمپيوناتى ءوتىپ جاتىر.
اتالعان باسەكەدە قازاقستاننان جانە كورشى ەلدەردەن قاتىسۋشى وقۋشىلار وزدەرىنىڭ يننوۆاسيالىق جوبالارىن ۇسىنادى.
كەز كەلگەن جەتىستىك شاعىن قادامداردان باستالاتىنى انىق. سوندىقتان بۇگىنگى جوبالار شاعىن ماسشتابتا بولسا دا، كوپشىلىكتىڭ كوڭىلىنەن شىقتى.
«مەنى جاس تالانتتاردىڭ جوبالارى قۋانتتى. ايتا كەتەيىك، بيىل چەمپيونات ەنەرگيا تاقىرىبىنا ارنالعان، قاتىسۋشىلار ءوز ازىرلەمەسىن ۇلكەن ىقىلاسپەن تانىستىردى. جەڭىمپازدار الەمدىك باسەكەدە ەلدىڭ نامىسىن قورعاۋ ءۇشىن اقش-قا اتتانادى. بۇل بالالاردىڭ بارلىعى جاڭا تەحنولوگيالاردى دامىتىپ، ەلدىڭ دامۋىنا ۇلەس قوساتىن بولاشاق IT ماماندار، ينجەنەرلەر مەن عالىمدار. تەحنيكالىق ءبىلىمدى الۋعا ۇمتىلاتىن جاستار قازاقستاننىڭ وركەندەۋىنە ىقپال ەتەدى دەپ سەنەمىن، ويتكەنى ءبىزدىڭ ەكونوميكامىزدا تەحنيكالىق ماماندىقتاردىڭ وكىلدەرى جەتكىلىكسىز»، - دەپ جازدى وليمپيادا جايىندا ەلىمىزدىڭ سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين.
ونىڭ ايتۋىنشا، ينجەنەرلىك كوزقاراس بارلىق جەردە بولۋى كەرەك، سونىڭ ارقاسىندا يننوۆاسيالىق ونىمدەر پايدا بولادى.
FIRST - STEM ءبىلىم سالاسىنداعى ناتيجەلەرگە قول جەتكىزۋگە جانە ءححى عاسىردىڭ داعدىلارىن دامىتۋعا ىقپال ەتەتىن باعدارلاما.
الەمنىڭ جەتەكشى وقۋ ورىندارىنىڭ ءبىرى – ماسساچۋسەتس تەحنولوگيالىق ينستيتۋتىنا تۇسكەن ستۋدەنتتەردىڭ 10% FIRST باعدارلاماسىنىڭ تۇلەكتەرى.
جىل سايىن FIRST Alumni تۇلەكتەرىنە الەمنىڭ ۇزدىك جوعارى وقۋ ورىندارىنان ءتۇرلى ۇسىنىستار كەلەدى جانە ولار كوپتەگەن ءبىلىم ستيپەندياسىنا يە بولىپ جاتادى.
قازاقستان اۋماعىندا FIRST باعدارلاماسى 2020 جىلدان بەرى جۇزەگە اسىپ جاتىر.
You Might Also Like
-
اقپاراتتىق تەحنولوگيا – 21 عاسىردىڭ جەتەكشى باعىتى. جاڭا تەحنولوگيالار ءقازىر ناقتى ءومىردىڭ ءبىر بولىگىنە اينالدى. سوندىقتان IT سالاسىنداعى ساپالى مامان - تەك پروگرەستىڭ دامۋىنا عانا ەمەس، ادام...
