InfoHub Logo

ءپىر سايلاۋ جۇمىسىنا كىرىسكەندە تولە بي ءوزىنىڭ عۇلاماسى ماعزاماندى، قازىبەك بي ەر سەيتپەمبەتتى، ايتەكە ءمۇسالىنى (كەيىنگى لاقاپ اتى — ءسۇپىازى) وزدەرىمەن بىرگە ماجىلىسكە الا كەلەدى. ءپىر سايلاۋ ماجىلىسىنە بۇلاردان باسقا مولدالار مەن يشاندار، ايبىندى باتىرلار مەن بيلەر، ءسوز زەرگەرى شەشەندەر قاتىسىپ وتىرعان. ءپىر سايلاۋىندا ادام كوپتىڭ الدىندا ءوزىنىڭ كەرەمەتىن كورسەتۋى كەرەك. كەرەمەتى باسىم ادام ۇلىق ءپىر بولىپ سايلانا الاتىن بولعان.

ءتارتىپ بويىنشا ءۇش ءبيدىڭ عۇلاماسىنىڭ كەرەمەتى سىنالىپ بولعاننان كەيىن، ەڭ مىقتى دەگەنىن عانا ءپىر سايلاۋىنا جارامدى دەپ شەشىلەدى. بۇل ءار ءبيدىڭ وزدەرىنىڭ عۇلاماسىن قۇر بەكەر ماقتاپ، ۇسىنا بەرمەسىن دەگەن ويدان تۋسا كەرەك. كەرەمەت كورسەتۋ جونىندەگى ۇسىنىس ايتەكە بيدەن شىققان بولاتىن. ونىڭ بۇل ۇسىنىسى كوپتىڭ ىشىنەن قولداۋ تابادى دا، ايتەكە حالىق الدىنا ءبىر بۋاز سيىر اكەلدىرەدى. سوسىن عۇلامالارعا قاراپ:

— سيىردىڭ ىشىندەگى بۇزاۋدىڭ ءتۇرىن، ءتۇسىن، جىنىسىن جانە قانداي كۇيدە جاتىر سونى كوپكە بۇلجىتپاي ايتىپ بەرەسىڭدەر! سيىردى سويىپ، بۇزاۋدى العاندا قايسىسىنىڭ سوزىنە بۇزاۋدىڭ ءتۇر-تۇسى ءدال كەلسە، سول ءۇش جۇزگە ۇلىق ءپىر بولىپ سايلانادى، — دەيدى. بۇعان ءۇش بي كەلىسەدى.

العاشقى بولىپ تولە ءبيدىڭ عۇلاماسى شاقىرىلىپ:

— مىناۋ سيىردىڭ ىشىندە قانداي بۇزاۋ جاتىر؟ ونىڭ ءتۇرى، ءتۇسى جانە جىنىسى قانداي؟ سونى مىنا كوپكە ايتىپ بەر، — دەيدى ءۇش بي.

ماعزامان سيىرعا قاراپ تۇرىپ:

— بۇل سيىردىڭ ىشىندە: قارا، ۇرعاشى، اقتوبەل بۇزاۋ جاتىر، — دەپ توقتادى.

قازىبەكتىڭ عۇلاماسى ەر سەيىتپامبەت سيىرعا قاراپ تۇرىپ:

— مىنا سيىردىڭ ىشىندە ۇرعاشى، قارا بۇزاۋ جاتىر دەپ كىدىرەدى.

بۇدان سوڭ ءۇشىنشى بولىپ ايتەكەنىڭ عۇلاماسى ءمۇسىرالى سيىردى كوزىمەن ءبىر رەت ءسۇزىپ ءوتتى دە كوپكە قاراپ:

— بۇل سيىردىڭ ىشىندە ۇرعاشى، قارا، اق قۇيرىق بۇزاۋ جاتىر، — دەيدى.

ءۇش عۇلاما كورە كوزگە ءۇش ءتۇرلى ءسوز ايتقاندا وتىرعان كوپشىلىك كۋاگەر بولادى. وسىدان سوڭ سيىردىڭ ءىشىن جارىپ بۇزاۋدى الىپ قاراسا، بۇزاۋ — ۇرعاشى، قارا، اق قۇيرىق. بۇل ءمۇسىرالىنىڭ ايتقانى ەدى. سوندىقتان حالىق ءبىر اۋىزدان ۇلىق پىرگە ءمۇسىرالىنى سايلادى. ءمۇسىرالى ءوزىنىڭ وزىق
كورگەندىگىمەن ءۇش جۇزگە ءپىر بولادى.

ەندى وسى ءپىردى ەلگە الىپ كەتۋگە دە ۇلكەن تالاس بولادى. «ءۇش جۇزگە ورتاق بولعاندىقتان، ۇلىق ءپىر ورتا جۇزدە وتىرۋى قاجەت»، — دەپ وتىرىپ الادى قازىبەك. تولە بي مۇنى قۋاتتايدى. ايتەكە ءمۇسىرالىنى قالايدا وزىمەن بىرگە الىپ كەتۋ ءۇشىن ولارعا تاعى دا ۇسىنىس قويادى.

— ەرتەڭ ءۇش ءجۇز ءارقايسىسى ءوزىنىڭ ەلىنە قاراي قوسىنىن كوشىرسىن. ءبىز مۇسىرالىمەن تورتەۋىمىز توبەنىڭ باسىندا تۇرايىق. كوشتىڭ قاراسى ءۇزىلىپ كەتكەسىن ءمۇسىرالىنىڭ اتىن بوس جىبەرەيىك. ات قاي ءجۇزدىڭ كوشىنىڭ ارتىنان ەرىپ كەتسە، ءمۇسىرالى دە سول جۇزگە كەتە بەرسىن، — دەيدى ول. قازىبەك پەن تولە بي بۇعان قوسىلادى. ەرتەڭىنە ءدال وسىلاي جاساعاندا اقشا ات كىشى ءجۇزدىڭ كوشىنىڭ ارتىنان قۇيىنداتىپ شاۋىپ كەتەدى. مۇنى كورگەن ايتەكە:

— و، ساداعاڭ كەتەيىن، اۋليەم! — دەپ ءمۇسىرالىنى قۇشاقتاپ تاعزىم ەتەدى.

تۇرىپ قالۋعا ۇيالىپ، انا ەكى بي دە مۇسىرالىگە قول بەرىپ ەڭكەيەدى. ءسويتىپ، ءۇش بي تاتۋلىقپەن تارقاسىپ، ايتەكە ءمۇسىرالىنى قاسيەتتى قارا شاڭىراعىنا اكەلىپ قوندىرعان ەكەن.

---