InfoHub Logo

تومەنگى سىنىپتا وقيتىن ۇل بالا ەدى. جۇرت قاتارلى سىنىپتان سىنىپقا كوشىرىلگەن. ءبىراق ساباعى وتە ناشار. اكەسى بۇلاردى الدەقاشان تاستاپ كەتىپتى. بۇل جورگەكتە جاتقاندا بولعان دەيدى. ول جونىندە ءوزى ماردىمدى ەشتەڭە دە بىلمەيدى.

اناسى مۇنىڭ ساباق ۇلگەرىمىنە قاتتى رەنجيدى. نامىستانادى. سەنىڭ بولاشاعىڭ بولۋ كەرەك ەدى دەيدى. ءۇمىت كۇتىپ وتىرعاندا دەيدى. مۇندايدا كوزىن تومەن سالاتىن ەدى. ءوزىن كىنالى سانايدى.

اناسىنا كومەكتەسكىسى-اق كەلەدى. اناسى سوڭعى كەزدەرى ءجيى اۋىراتىن بولىپ الدى. بالا وسىنى ۋايىمدايدى.

اناسى كەيدە مۇنىڭ قايراتتى قارا شاشىنان سيپاپ وتىرىپ، سەن بەستىك العان كۇنى جازىلامىن دەيدى. وسىنى سەندىرىپ ايتادى. بالا وسىعان يلاندى.

دايىندىق، ءوزىن-وزى قيناۋ، قىستاۋ ەش ناتيجە بەرمەدى. مۇعالىمنەن بەستى سۇراپ الا المايسىڭ عوي. كوزى قاراۋىتتى. وزىنە ارتىق سالماق سالعانىن عانا بىلەدى. جانۇشىرىپ، الاسۇرىپ قايتا كىرىسەدى. ۇمتىلعان بيىكتىكتى ءبارىبىر الا المادى. بيىكتىكتى الۋ ءۇشىن مۇمكىن الدەبىر ايلا-شارعىلار دا كەرەك شىعار. ونداي نارسەلەردى بالانىڭ جان-دۇنيەسى ويلاپ تا جاتا الماس ەدى. مۇنداعى بار كۇش تەك اناسىنا
دەگەن جاناشىرلىق سەزىمى عانا.

بۇگىن جەڭدى. داپتەرىنە تۇڭعىش رەت "5"-تىك باعا ءتۇستى. سول كۇنى ساباق بىتىسىمەن ۋ-شۋ بولىپ جاتقان جولداستارىنا دا بۇرىلىپ قاراۋعا مۇرشاسى كەلمەدى. ءوڭىرى اشىلىپ كەتكەن كىشكەنتاي كوستيۋمىنىڭ ەتەگى جەلگە جەلبىرەگەن كۇيى، سومكەسىن قولتىعىعىنا قىسىپ الىپ ۇيىنە قاراي بار پارمەنىمەن جۇگىردى-اي كەلىپ.

اۋلاسىنا كىرە بەرگەندە قالت توقتادى. جەدەل جاردەم كولىگى تۇر ەدى. اناسى... تاعى دا اۋىرىپتى. كورشىسى تامارا اپاي شاقىرعان ەكەن.

بالا ۇمسىنىپ قالعاندا، كولىك سىرعي ءجۇرىپ كەتتى. تامارا اپاي بالاعا ءوزىنىڭ ۇيىنە ءجۇرۋىن ءوتىندى.

كورشىسىنىڭ ۇيىنە ىقىلاسسىز كىردى. تامارا اپاي تاماق دايىنداۋعا كىرىسكەندە، بالا سومكەسىنەن "5"-تىك باعا قويىلعان داپتەرىن الىپ الدى.
داپتەرىنە قاراپ وتىرىپ قىستىعىپ جىلادى.

دايىندالعان تاماققا دا زاۋقى سوقپادى.

سالىپ بەرگەن توسەككە جاتپاس بۇرىن سومكەسىن اشىپ "5"-تىك باعا قويىلعان داپتەرىن ۇقىپتاپ سۋىردى. جاستىعىنىڭ استىنا سالدى.

ءتۇس كورىپتى. تۇسىندە اناسى سونداي ءبىر ريزا كەيىپپەن كۇلىمسىرەي قارايدى ەكەن. قۇلان-تازا ايىعىپتى.

---