InfoHub Logo

بالالارىمىزدىڭ ومىرىنە جاقسى نەمەسە جامان اسەر ەتەتىن تاربيەشىلەردىڭ كوپ ەكەنىن بايقادىق. سول تاربيەشىلەردىڭ ىشىندەگى ەڭ اسەرلىسى — اكە-شەشە. ياعني، بالانىڭ تالىم-تاربيەسىندە اكە-شەشە باستى رولدە وينايدى.

اكە-شەشەنىڭ ورنىن ەشكىم باسا المايدى، ءوزىنىڭ ءرولىن تاستاپ ەشقايدا قاشا المايدى. «قاشا المايدى» دەپ جاتقان سەبەبىمىز، كەيدە اتا-انا قول ۇستاسىپ الىپ، بالا تاربيەسىندەگى جاۋاپكەرشىلىگىنەن قاشقىسى كەلەدى. ءسويتىپ، جاۋاپكەرشىلىكتى اتا-اجەگە، بالا كۇتۋشىگە، بالاباقشا تاربيەشىسىنە نەمەسە مەكتەپتەگى مۇعالىمگە لاقتىرعىسى كەلەدى. كەيدە اتا-انالاردان «مىنا مەكتەپ نەگە دۇرىس تاربيە بەرمەيدى»، «بالاما ادەپتى ۇيرەتپەي ءمۇعالىم قايدا قاراپ ءجۇر؟» دەگەن شاعىمداردى ءجيى ەستيمىز. مىنە، وسىلاردىڭ ءبارى جاۋاپكەرشىلىكتەن قاشۋدىڭ بەلگىسى. نەگىزىندە، مەكتەپتىڭ جانە مەكتەپ مۇعالىمدەرىنىڭ باستى جاۋاپكەرشىلىگى بالانىڭ ءبىلىمى ەكەنى بارشامىزعا ءمالىم. ال بالانىڭ تاربيەسىنە تىكەلەي جاۋاپتى — بالانىڭ اتا-اناسى.

حالىق دانالىعىندا «ءبىر اكەنىڭ تاربيەسىن ءجۇز مەكتەپ بەرە المايدى» دەگەن تاماشا ءسوز بار.

كەيدە اكە بالا تاربيەسىن تۇگەلىمەن دەرلىك ايەلىنىڭ موينىنا ىلە سالادى. جالپى العاندا، بالا تاربيەسىندەگى ەڭ باستى ءرول — اكەنىكى. ءبىراق قوعامىمىزدا كوپتەگەن اكەلەر بۇل جاۋاپكەرشىلىكتى سەزىنە الماي جۇرگەنى قىنجىلتادى. كوپتەگەن اكەلەر بالانىڭ ماتەريالدىق قاجەتتىلىگىن قامتاماسىز ەتۋمەن عانا شەكتەلۋدە. ياعني، بالالارىن مەكتەپكە الىپ بارىپ، الىپ كەلۋ، تاماعىن، كيىمىن قامتاماسىز ەتۋ سەكىلدى عانا قىزمەتتەرمەن شەكتەلەدى. ارينە دەگەنمەن بۇگىنگى قوعامدا ماتەريالدىق جاعداي الدىڭعى ورىندا. ءبىراق بالاڭىزعا رۋحاني، يماني تاربيە بەرۋ ماتەريالدىق جاعداي جاساۋدان بۇرىن تۇرۋى كەرەك.

ە.ەرتاي ۇلى

---