InfoHub Logo

اقتىق ساعاتى جاقىنداپ، احيرەتكە كوشكەلى جاتقان ءبىر ءدىندار ادام زەكەتى مەن ساداقاسى بەرىلگەن ادال دۇنيە-مۇلكىن بالاسىنا ميراس ەتىپ قالدىرماق نيەتپەن وعان: «بالام! ءومىر باقي ادال جولمەن تاۋىپ، جوق-جىتىككە اقىسىن بەرگەن مىنا دۇنيە-مۇلكىمدى ساعان تاستاپ بارامىن. ءبىراق سوڭعى وسيەتىم بار. مەن قايتىس بولعاننان كەيىن سۇيەگىمدى جۋعان مولداعا ايت، مەنىڭ دەنەمدى تابىتقا قوياردا اياعىمنىڭ بىرىنە جىرتىق، ەسكى شۇلىق كيگىزسىن»، — دەيدى. اكەسىنىڭ سوزدەرىن زەر سالىپ تىڭداعان بالاسى ونىڭ وسى وسيەتىن ورىنداۋعا ۋادە بەرەدى.

كوپ وتپەي الگى ادام ناۋقاستانىپ، ارتىنان كوز جۇمادى. بارلىق الىس-جاقىندارى جيىلىپ «جاقسى ادام ەدى» دەپ كوڭىل ايتىسادى. مولدا دا شاقىرىلىپ، سۇيەگى جۋىلادى. وسى كەزدە بالاسى مولدانىڭ قۇلاعىنا اكەسىنىڭ وسيەتىن ايتىپ سىبىرلايدى. مولدا دۇنيەدەن وتكەن ادامعا مۇنداي جورالعىلار جاساۋ شاريعاتقا قايشى ەكەنىن ايتىپ رۇقسات ەتپەيدى.

ءبىراق بالاسى اكەسىنىڭ باسىندا تۇرىپ: «وندا تۇرعان نە بار؟ اكەمنەن مىناۋ جىرتىق شۇلىقتى دا اياپ تۇرسىڭدار ما؟»، — دەپ شۇلىقتى وعان كيگىزبەك بولادى. سوندا ءبىر قاريا كەلىپ: «بالام، اكەڭ ماعان ولەر الدىندا ساعان ارنايى جازىلعان ءبىر حات قالدىردى. «بالاما مىنا حاتتى مەنىڭ سۇيەگىمدى تابىتقا قويىپ جاتقاندا بەر» دەگەن ەدى. ال، قانە اش، وقى، نە جازعانىن كورەلىك»، — دەيدى. سول جەرگە جينالعان حالىق تىڭداۋعا اسىعىپ قۇلاق قويعاندا، بالاسى حاتتى داۋىستاپ وقي جونەلەدى: «بالام! مۇنشاما بايلىققا يەلىك ەتكەن مەنىڭ ءحالىمدى مىنە كورىپ تۇرسىڭ. مەن ارتىما وسىنشاما داۋلەت قالدىرعانمەن ولار ماعان ەسكى شۇلىق تا كيگىزۋگە رۇقسات ەتپەي جاتىر. ءبىر كۇنى مەن سەكىلدى ساعان دا ەكى مەتر بوزدەن باسقا ەش نارسە بۇيىرمايدى. ماعان قاراپ عيبرات ال. ساعان قالدىرعان بايلىعىما ماستانىپ، تاكاپپارلانىپ، ءدىنىڭدى ۇمىتىپ كەتۋشى بولما. جوق-جىتىكتىڭ جاي-كۇيىن ءبىلىپ، ولاردىڭ جانىنا تەرەڭ ءۇڭىل. مىنە، ءوزىڭ كورگەنىڭدەيقانشا باي بولساڭ دا، ءبارىبىر ولگەن سوڭ دۇنيەڭ قول بۇلعاپ ارتىڭدا قالماق. قابىرگە كىرەردە ۇستىڭە جىبەك شاپان تۇرماق، اياعىڭا جىرتىق شۇلىق تا بۇيىرمايدى!».

---