بالىقشىنىڭ بالاسى
ول قاشان كورسەڭ دە كوزى كۇلىمدەپ، تاپ-تۇيناقتاي جيناقى جۇرەدى. سۇيكىمدى بالا. ءبىز ەكى-اق كۇن بىرگە بولدىق، جۋاس سىقىلدى. تويعان قوزىداي تومپيعان تۇرىنە قاراپ، «ۇيالشاق شىعار» دەپ ويلايسىڭ.
ەكەۋمىز ويدا جوقتا تانىستىق. اۋىلعا جاقىنداپ قالعانبىز. جول جاعالاپ ءبىر بالا كەتىپ بارادى. اياعىن ءىلبي باسادى.
— مىنا باتىردى الا كەتەلىك،—دەپ، شوفەر جىگىتكە ءوتىنىش ايتتىم.
كابينا ەسىگى اشىلعاندا، بالا توقتاي قالدى..
— كەل، بالاقاي، وتىر— دەدى.
— سالەمەتسىز بە، اعا؟— دەپ، ول ىشكە ەندى.
— قايدان ءجۇرسىڭ؟
— تارتىمعا بارىپ ەدىم.
كىرشىكسىز اق كويلەگى، قىرى پىشاقتاي قارا شالبارى نازارىمدى اۋداردى.
— تويعا بارعان سياقتىسىڭ عوي.
— تويدان باسقا جەردە تازا كيىنۋگە بولماي ما؟!— دەپ، تاڭىرقاي كۇلىمدەدى.
— ە، نەگە بولماسىن؟! — دەدىم ساسقالاقتاپ.
تەڭىز قولتىعىنداعى بالىقشى اۋىلىنا جەتكەن سوڭ، بالا كولحوز كەڭسەسىنە جول سىلتەدى دە، جونىنە كەتتى. ەرتەڭىنە بالانى تاعى كەزدەستىردىم. مەكتەبى كەڭسەنىڭ قاسىندا ەكەن.
— سالەمەتسىز بە، اعا،— دەپ كۇلىمدەي امانداستى.
— جاقاش، نەشىنشىدە وقيسىڭ؟— دەپ سۇرادىم.
— ەكىنشى كلاستا.
— ساباق قالاي؟
— بەس،— دەدى ول، بۇعان پالەندەي ءمان بەرمەستەن. قايتاردا ءوزىنىڭ ءجۇزىم ءوسىرىپ جۇرگەنىن ايتتى. — ەرتەڭ ءبىزدىڭ ۇيگە كەلىپ، مەيمان بولىڭىز. مەنىڭ جۇزىمدىگىمدى دە، سالعان سۋرەتتەرىمدى دە كورەسىز. ساعاتەستە كەشىكپەڭىز!..
كەلەسى كۇنى تاعى دا تەڭىزگە باردىم، بالىقشىلارمەن جاقىنىراق تانىستىم. وزات زۆەنو جەتەكشىسى جاقسىبايدىڭ ىسىنە قاندىم.
— ۇيدەن ءدام تات،— دەدى جاقسىباي قارت.
وسى ارادا تۇيىققا تىرەلىپ قالدىم، جاقاشتىڭ ۇيىنە بارۋىم كەرەك ەدى.
— ايىپ ەتپەڭىز، وسىنداعى ءبىر ءىنىم شاقىرعان سوڭ، سوعان ۋادە بەرىپ قويىپ ەدىم.جاقسىباي قارت رەنجىگەن جوق.
دۇرىس، قاراعىم، ۋادە — قاسيەتتى سەرت. ءسوزىن جۇتقان ادامدا نە ءقادىر قالادى؟ جولىڭ بولسىن!
جاقاشتىڭ ۇيىنە كەلگەنىمدە، جاقسىباي قارت الدىمنان شىقتى. تاڭدانىپ قالدىم. سويتسەم ول كىسى كىشكەنتاي دوسىمنىڭ اكەسى ەكەن.
شاي ۇستىندە قارت جادىراي سويلەدى. سول كەيپى جاقانعا ۇقساپ كەتتى. ەكەۋىنىڭ كەسكىن-كەلبەتىندەگى ۇقساستىققا بۇعان دەيىن قالاي ءمان بەرمەگەم؟
سول ءسات كوز الدىما بايسالدى جىگىت بولىپ وسكەن، تولارساقتان سۋ كەشىپ، اۋ تارتىپ جۇرگەن زىڭگىتتەي جاقان ەلەستەپ كەتتى...
You Might Also Like
-
ق ر ءبىلىم جانە عىلىم مينيسترلىگى قاشىقتان وقىتۋ فورماتىنا قاتىستى جاڭا نۇسقاۋلىق شىعاردى.
-
ەكى شىركەي تۇنگى ورماندى ارالاپ كورمەكشى بولدى. بۇل ساتتە اڭ-قۇس بىتكەننىڭ ءبارى قالىڭ ۇيقىدا ەدى. قوس شىركەي توقىلداقتىڭ ۇياسىن، ورمەكشىنىڭ ورمەگىن تاماشالاپ كەلە جاتتى. كەنەت:
